निसर्ग चक्रीवादळामुळे झालेल्या नुकसानीचे तात्काळ पंचनामे करा – खा.डॉ.अमोल कोल्हे

निसर्ग चक्रीवादळामुळे झालेल्या नुकसानीचे तात्काळ पंचनामे करा – खा.डॉ.अमोल कोल्हे

सजग वेब टिम, पुणे

पुणे | निसर्ग चक्रीवादळामुळे शिरूर लोकसभा मतदारसंघातील विविध तालुक्यात झालेल्या नुकसानीचे तत्काळ पंचनामे करा अशी मागणी खासदार डॉ. अमोल कोल्हे यांनी जिल्हाधिकारी श्री. नवल किशोर राम यांना पत्र पाठवून केली आहे.

आज निसर्ग चक्रीवादळाने मुंबई, कोकण परिसरात धडक दिल्यानंतर या चक्रीवादळाचा परिणाम पुणे जिल्ह्यात जाणवायला सुरुवात झाली होती. मात्र दुपारनंतर जोरदार वादळी वाऱ्यासह झालेल्या पावसामुळे अनेक घरांवरील पत्रे व छप्परं उडून गेली. तसेच घरांचे, वाहनांचे व शेतीचेही मोठे नुकसान झाले आहे. या नुकसानीची तातडीने दखल घेऊन खासदार डॉ. कोल्हे यांनी जिल्हाधिकारी नवल किशोर राम यांना पत्र पाठवून नुकसानीचे पंचनामे करण्याचे आदेश महसूल प्रशासनाला देण्याची मागणी केली आहे.

कोरोनाच्या संकटामुळे आधीच आर्थिक अडचणीत असलेल्या शेतकऱ्यांना निसर्ग चक्रीवादळामुळे मोठा फटका बसला असून त्यातून सावरण्यासाठी त्यांना प्रशासनाने मदत करण्याची गरज आहे असे डॉ. कोल्हे यांनी सांगितले.

Read more...

उद्योगांचे अर्थचक्र सुरळीत करण्यासाठी खा.अमोल कोल्हे यांनी घेतला पुढाकार

उद्योगांचे अर्थचक्र सुरळीत करण्यासाठी खा.अमोल कोल्हे यांनी घेतला पुढाकार

सजग वेब टिम, पुणे

पुणे | लॉकडाऊन शिथिल झाल्यानंतर उद्योगांचे अर्थचक्र सुरळीत करण्यासाठी चाकण एमआयडीसीतील कंपन्यांना कामगार उपलब्ध करून देण्यासह विविध समस्या सोडविण्यासाठी सर्वतोपरी सहकार्य करणार अशा शब्दांत शिरूर लोकसभा मतदारसंघाचे खासदार डॉ. अमोल कोल्हे यांनी आज फेडरेशन ऑफ चाकण इंडस्ट्रीज (एफसीआय) समवेत आयोजित केलेल्या व्हिडिओ कॉन्फरन्स बैठकीत कंपनी प्रतिनिधींना आश्वस्त केले.

एका बाजूला लॉकडाऊन शिथिल करून कंपन्या सुरू करण्यास शासनाने परवानगी दिली असताना दुसऱ्या बाजूला राज्यातील व परराज्यातील हजारो कामगार त्यांच्या घरी परत गेले. त्यामुळे कंपन्यांना पुरेसे मनुष्यबळ उपलब्ध होत नाही. शिवाय सतत बदलणारा कन्टेन्मेंट झोन लक्षात घेता उपलब्ध कामगारांना कामावर येताना अनेक अडचणींचा सामना करावा लागत आहे. या पार्श्वभूमीवर जिल्हा प्रशासन, एमआयडीसी व कामगार उपायुक्त कार्यालय आदींकडून योग्य माहिती व मार्गदर्शन कंपन्यांना मिळावे. तसेच त्यांचे विविध प्रश्न सोडविण्यासाठी खासदार डॉ. कोल्हे यांच्या पुढाकाराने आज फेडरेशन ऑफ चाकण इंडस्ट्रीजच्या सदस्य कंपन्यांच्या प्रतिनिधींची व्हिडिओ कॉन्फरन्स बैठक आयोजित करण्यात आली होती. या बैठकीला एमआयडीसीचे प्रादेशिक अधिकारी अविनाश हदगल, पुण्याचे कामगार उपायुक्त शैलेंद्र पोळ, खेडचे प्रांत अधिकारी संजय तेली, एफसीआयचे दिलीप बटवाल, मोहन पाटील तसेच विविध कंपन्यांचे आदी उपस्थित होते.

कंपन्यांच्या अडचणी सोडविण्यासाठी डॉ. कोल्हे यांनी घेतलेल्या पुढाकाराबद्दल सर्वच कंपनी प्रतिनिधींनी आनंद व्यक्त करताना त्यांच्यासमोर अनेक समस्या मांडल्या. यामध्ये प्रामुख्याने बाहेरून येणाऱ्या कामगारांचे १४ दिवस विलगीकरण करण्याची अट, बाहेरगावी गेलेल्या कायमस्वरूपी कामगारांना परत येण्यासाठी पोलीस परवानगी मिळण्यात येणारे अडथळे व पुरेसे मनुष्यबळ उपलब्ध न होणे आदींचा समावेश होता. या सर्व प्रश्नांवर कामगार उपायुक्त श्री. पोळ, एमआयडीसीचे प्रादेशिक अधिकारी श्री. हदगल तसेच खेडचे प्रांत अधिकारी श्री. तेली यांनी समर्पक उत्तरे व माहिती देऊन मार्गदर्शन केले. एफसीआय व प्रशासन यांच्यात माहिती व शासनाचे वेळोवेळी निघणारी परिपत्रके व दररोज बदलणाऱ्या कन्टेन्मेंट झोनची माहिती यांचे आदानप्रदान करण्यासाठी एफसीआयने नोडल अधिकारी नियुक्त करावा असा निर्णय या बैठकीत घेण्यात आला.

पुरेसे मनुष्यबळ उपलब्ध व्हावे यासाठी एफसीआयला आवश्यक सहकार्य करण्यासाठी आपल्या वेबसाइटवर एक प्लॅटफॉर्म तयार करून स्थानिक परिसरातील व महाराष्ट्रातील विविध भागांतील तरुणांकडून अर्ज मागविले जातील. हे अर्ज एफसीआयच्या माध्यमातून कंपन्यांना पाठवले जातील. त्यातून कंपन्यांनी आपल्याला आवश्यक उमेदवारांची निवड करावी. या माध्यमातून मनुष्यबळाचा प्रश्न सोडवू शकतो या डॉ. कोल्हे यांच्या सूचनेचे सर्वच कंपनी प्रतिनिधींनी स्वागत केले. येत्या दोन-तीन दिवसांत आपल्या वेबसाइटवर यासाठी प्लॅटफॉर्म तयार करून देण्याचा आपला प्रयत्न राहिल असे डॉ. कोल्हे यांनी सांगितले.

राज्याचे मुख्यमंत्री व उपमुख्यमंत्री यांनी उद्योगांचे अर्थचक्र सुरळीत करण्याला प्राधान्य दिले आहे. त्यामुळे “पुनश्च हरी ओम” म्हणत आपल्याला अर्थव्यवस्था रुळावर आणण्याला प्राधान्य देण्याचे सुतोवाच केले आहे. या पार्श्वभूमीवर खासदार डॉ. कोल्हे यांनी आयोजित केलेल्या या बैठकीला चांगला प्रतिसाद मिळाला. तसेच आपण सातत्याने एकमेकांच्या संपर्कात राहून तुमच्या अडचणी सोडविण्यासाठी एकत्रित प्रयत्न करू असे आवाहन डॉ. कोल्हे यांनी केले.

Read more...

शेरकर – बोऱ्हाडे वादात आमदार अतुल बेनके यांची यशस्वी मध्यस्थी

शेरकर – बोऱ्हाडे वादात आमदार अतुल बेनके यांची यशस्वी मध्यस्थी

सजग वेब टिम, जुन्नर

जुन्नर | शिरोली बु. येथील शिवऋण प्रतिष्ठानचे अक्षय बोऱ्हाडे व श्री विघ्नहर सहकारी साखर कारखान्याचे अध्यक्ष सत्यशील शेरकर यांच्यातील वादावर आज रविवार (दि.३१) रोजी अखेर पडदा पडला आहे.
जुन्नर तालुक्याचे आमदार अतुल बेनके यांनी हा वाद मिटवण्यासाठी महत्त्वाची भूमिका निभावली. आज हा वाद मिटविण्यात बेनके तसेच शिरोली ग्रामस्थांना अखेर यश आले आहे. राष्ट्रवादी युवकचे तालुका अध्यक्ष सुरज वाजगे, युवा सेना प्रमुख गणेश कवडे यांनी देखील यात महत्वाची भूमिका निभावली.

फेसबुक लाईव्हच्या माध्यमातून बोऱ्हाडे यांनी व्हायरल केलेल्या व्हिडीओ मुळे संपुर्ण राज्यात या प्रकरणी उलटसुलट चर्चा सुरू झाल्या होत्या. शिवजन्मभूमी जुन्नर विषयी होत असलेल्या चर्चेस पूर्ण विराम मिळावा व गावातील भांडण गावातच मिटले जावे या हेतूने आमदार बेनके यांनी ग्रामस्थांच्या सहकार्याने दोघांमध्ये चर्चा घडवून आणली.

यावेळी दोघांनी एकमेकांविषयी झालेले समज- गैरसमज दूर करत आपली चूक मान्य करत दिलगिरी व्यक्त केली. दोघांनीही आपआपले सामाजिक काम एकमेकांच्या सहकार्याने एकत्रितपणे करण्याची भूमिका ग्रामस्थांसमोर जाहीर केली.

सध्या तालुक्यात कोरोनाचा प्रादुर्भाव वाढत आहे आणि त्यातच या प्रकरणास वेगळे वळण लागून कायदा व सुव्यवस्थेचा प्रश्न निर्माण होऊ नये यासाठी हा वाद मिटविण्यासाठी पुढाकार घेतला असल्याचे आमदार बेनके यांनी यावेळी बोलताना सांगितले.
बोऱ्हाडे-शेरकर प्रकरणात आपल्या शिवजन्मभूमीची बदनामी होऊ नये हा वाद कुठेतरी थांबावा या उद्देशाने सर्वांनीच प्रयत्न केले . गावातील सरपंच, उपसरपंच, ग्रामपंचायत सदस्य, पोलिस पाटील, तंटामुक्ती अध्यक्ष, ग्रामविकास समिती व ग्रामस्थांनी बैठक घेऊन सत्यशील शेरकर व अक्षय बोऱ्हाडे यांना समक्ष घेऊन चर्चेतून हा वाद सामोपचाराने मिटवला.

खासदार डॉ. अमोल कोल्हे, आमदार अतुल बेनके, सूरज वाजगे , गणेश कवडे, जालिंदर शिंदे, प्रदिप कंद, सनी निम्हण यांनी महत्वपूर्ण भूमीका पार पाडली. या प्रकरणी सोशल मीडियावर कोणीही उलटसुलट चर्चा करू नये असे आवाहन आमदार बेनके यांनी केले आहे.

Read more...

ज्या जिल्हयात जाणार तेथील जिल्हाधिकारी यांची परवानगी व वैद्यकीय तपासणीनंतरच पास मिळणार – नवल किशोर राम

विस्थापित, कामगार,यात्रेकरु, पर्यटक, विद्यार्थी व इतर व्यक्ती यांना ज्या जिल्हयात जाणार तेथील जिल्हाधिकारी यांची परवानगी व वैद्यकीय तपासणीनंतरच पास मिळणार
-जिल्हाधिकारी नवल किशोर राम

सजग वेब टिम, पुणे

पुणे (दि.०२)| पुणे जिल्हयातून अन्य राज्यात अथवा महाराष्ट्रातील इतर जिल्हयामध्ये जाणारे मजूर, विद्यार्थी, यात्रेकरु व अन्य व्यक्ती यांनी covid19.mhpolice.in या लिंकवर ऑनलाईन पध्दतीने अर्ज करावा. पुणे पोलीस आयुक्त व पिंपरी-चिंचवड पोलीस आयुक्त यांचे हद्दीतील अर्जावर संबंधित आयुक्तालयातील नोडल अधिकारी तथा पोलीस उपआयुक्त हे निर्णय घेतील असा निर्णय घेताना मजूर, विद्यार्थी, यात्रेकरु व अन्य व्यक्ती यांची यादी पोलीस उपआयुक्त, जिल्हाधिकारी, यांच्यामार्फत ते ज्या जिल्हयात अथवा राज्यात जाणार आहेत तेथील जिल्हाधिकारी यांची परवानगी प्राप्त करुन घेतील व त्यानंतरच पास देण्यात येईल, अशी माहिती जिल्हाधिकारी नवल किशोर राम यांनी दिली.

महाराष्ट्र शासनाच्या निर्णयानुसार विस्थापित कामगार, यात्रेकरु, पर्यटक, विद्यार्थी व इतर व्यक्ती यांचे प्रवासाकरीता आदेश निगर्मित केले आहेत. या आदेशानुसार सदर व्यक्तींची प्रवास व्यवस्था व त्याचे नियोजन करण्यात आल्याची तसेच याकरीता नोडल अधिका-यांची नियुक्ती करण्यात आली असल्याचे सांगून जिल्हाधिकारी राम म्हणाले, पुणे जिल्हयातील ग्रामीण क्षेत्रातील इतर जिल्हयात व इतर राज्यांमध्ये जाणा-या मजूर, विद्यार्थी, यात्रेकरु व अन्य व्यक्ती यांची यादी संबंधित तहसिलदार करतील. व ते ज्या जिल्हयांमध्ये जाणार असतील तेथील जिल्हाधिकारी यांची परवानगी जिल्हाधिकारी, पुणे यांचेमार्फत घेतील.जोपर्यंत मजूर, विद्यार्थी, यात्रेकरु व अन्य व्यक्ती यांना ते ज्या जिल्हयात जाणार आहेत तेथील जिल्हाधिकारी यांची परवानगी प्राप्त झाल्याशिवाय त्यांना पास दिला जाणार नसल्याचेही त्यांनी स्पष्ट केले.

मजूर, विद्यार्थी, यात्रेकरु व अन्य व्यक्ती यांनी कोणत्याही नोंदणीकृत वैद्यकीय व्यावसायिक यांचे कोरोना विषाणूचे कोणतेही लक्षणे नसल्याबाबतचे प्रमाणपत्र घेवून लिंकवर अपलोड करणे अनिवार्य आहे. नागरिकांना लिंकवर माहिती भरण्यामध्ये काही अडचणी असतील तर त्यांनी ग्रामीण भागासाठी दूरध्वनी अथवा ई मेल द्वारे संपर्क साधावा.

याकरीता नोडल अधिकारी म्हणून उपजिल्हाधिकारी सुभाष भागडे ( दूरध्वनी क्रमांक 020-26111061 / 26123371) यांच्याकडे स्थलांतरीत कामगार ( परराज्यात, जिल्हयात जाणारे) , उपजिल्हाधिकारी, भूसंपादन क्र.3 श्रीमंत पाटोळे ( दूरध्वनी क्रमांक 020-26111061/26123371) यांच्याकडे स्थलांतरीत कामगार (परराज्यात, जिल्हयात येणारे), उपजिल्हाधिकारी, भूसंपादन क्र.26 निता सावंत-शिंदे ( दूरध्वनी क्रमांक 020-26111061/26123371) यांच्याकडे विद्यार्थी, यात्रेकरु, पर्यटक ( परराज्यात, जिल्हयात जाणारे ), उपजिल्हाधिकारी, स्वागत शाखा, अमृत नाटेकर (दूरध्वनी क्रमांक 020-26111061/26123371) यांच्याकडे विद्यार्थी, यात्रेकरु, पर्यटक ( परराज्यात / जिल्हयात येणारे ) यांची नियुक्ती करण्यात आल्याचे जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष नवल किशोर राम यांनी सांगितले आहे.

Read more...

हिंजवडी इंडस्ट्रियल असोसिएशनच्यावतीने ५० लाख रूपयांचा सहायता निधी

हिंजवडी इंडस्ट्रियल असोसिएशनच्यावतीने ५० लाख रूपयांचा सहायता निधी

सजग वेब टिम, पुणे

पुणे दि.२८| हिंजवडी इंडस्ट्रियल असोसिएशनच्यावतीने ५० लाख रूपयांचा सहायता निधी कर्नल सालणकर यांनी जिल्हाधिकरी नवल किशोर राम यांच्याकडे सुपूर्त केला. यामध्ये वीस लाख रूपये पंतप्रधान सहायता निधी, २० लाख रूपये मुख्यमंत्री सहायता निधी कोवीड-१९ , आरोग्य विभागास पाच लाख रूपयाचे पीपीइ किट व उपविभागीय अधिकारी पुणे शहर व तहसीलदार मुळशी यांच्यकडे पाच लाख रूपयांचे 850 धन्य किट देण्यात आले.

 

विभागीय आयुक्त् कार्यालयात धनादेश प्रधान करतेवेळी जिल्हा परिषदेचे मुख्य कार्यकारी अधिकारी आयुष प्रसाद, उपविभागीय अधिकारी संतोषकुमार देशमुख उपस्थित होते.

Read more...

ससून रुग्णालयाला प्लाझ्मा फोरेसेस मशीन भेट – डॉ. दीपक म्हैसेकर

ससून रुग्णालयाला प्लाझ्मा फोरेसेस मशीन भेट – विभागीय आयुक्त डॉ.दीपक म्हैसेकर

प्लाझ्मा फोरेसेस मशिन वापरण्यासाठीचा प्रस्ताव आयसीएमआरकडे सादर

सजग वेब टिम, पुणे

पुणे दि.(२७)| कोरोनाच्या रुग्णांवर प्रायोगिक तत्वावर प्लाझ्मा उपचाराबाबत प्रशासनाच्या वतीने प्रयत्न सुरु आहेत. कोरोनाच्या वाढत्या रुग्णसंख्येवर मात करण्याच्या दृष्टीने प्रतिबंधात्मक उपाय म्हणून ससून रुग्णालयाला उद्योजक अविनाश भोसले यांनी प्लाझ्मा फोरेसेस मशीन भेट दिली आहे, अशी माहिती विभागीय आयुक्त डॉ.दीपक म्हैसेकर यांनी आज दिली.

प्लाझ्मा फोरेसेस मशिन वापरण्यासाठी परवानगी देण्याबाबतचा प्रस्ताव आयसीएमआरकडे पाठविण्यात आला असून परवानगी प्राप्त झाल्यावर उपचार सुरु करण्याबाबतची कार्यवाही करण्यात येणार आहे. या मशिनव्दारे प्लाझ्मा वेगळा काढला जावू शकतो आणि हा प्लाझ्मा कोविड रुग्णाच्या उपचारासाठी वापरला जावू शकतो. असा प्लाझ्मा १८ वर्षावरील पुरुष किंवा महिला व्यक्ती देवू शकते. तथापी संबंधित महिला अद्यापर्यंत गर्भवती राहिलेली नसावी. तसेच त्या व्यक्तीचे वजन ५५ किलो पेक्षा जास्त असणे आवश्यक आहे.

प्लाझ्मा देणाऱ्या व्यक्तीच्या कोविड-१९ च्या शेवटच्या दोन्ही चाचण्या निगेटिव्ह असणे आवश्यक आहे. यानंतर १४ दिवसांनी संबंधित व्यक्ती कोरोनाच्या रुग्णाला प्लाझ्मा देवू शकतात. तथापी प्लाझ्मा डोनेट करण्यापूर्वी मागील २८ दिवसात या व्यक्तीमध्ये कोविड-१९ ची कोणतीही लक्षणे आढळलेली नसावीत. संबंधित व्यक्ती हिपॅटाइटिस- बी तसेच एचआयव्ही बाधित नसणे आवश्यक आहे. त्याचबरोबर रक्तदान करताना तपासणी करण्यात येणारा रक्तगट व आवश्यक त्या सर्व बाबींची काळजी देखील घेण्यात येईल असेली डॉ.म्हैसेकर यांनी सांगितले.

Read more...

‘को एक्झिस्टींग विथ कोरोना’ असा प्लॅन केंद्र सरकारने तयार करावा – खा. डॉ.अमोल कोल्हे

‘को एक्झिस्टींग विथ कोरोना’ असा प्लान केंद्र सरकारने तयार करावा – खा. डॉ.अमोल कोल्हे

सजग वेब टिम, पुणे

पुणे | लॉकडाऊन दीर्घकाळ पर्यंत थांबवणं आपल्या अर्थव्यवस्थेला, उद्योगांना, कामगार, नोकरदार आणि सर्वसामान्य जनता यापैकी कुणालाच परवडणारं नाही. त्यामुळे ज्याप्रमाणे आपण टीबी, मलेरिया, H 1 N 1 अशा आजारांसह दैनंदिन आयुष्य जगतोय त्याच धर्तीवर ‘को एक्झिस्टींग विथ कोरोना’ असा प्लान केंद्र सरकारने तयार करावा अशी सूचना शिरूर लोकसभा मतदारसंघाचे खासदार डॉ. अमोल कोल्हे यांनी केंद्रीय पथकासमवेत झालेल्या व्हिडिओ कॉन्फरन्स बैठकीत केली.

कोरोना रोखण्यासाठी राज्य सरकार करीत असलेल्या उपाययोजनांची पाहणी करण्यासाठी आलेल्या केंद्रीय पथकाने आज पुणे येथील विभागीय आयुक्त कार्यालयात जिल्ह्यातील खासदार, आमदार आदींसमवेत व्हिडिओ कॉन्फरन्स बैठक घेतली. या बैठकीत डॉ. कोल्हे यांनी अतिशय अभ्यासपूर्ण मुद्दे मांडून अनेक महत्त्वाच्या बाबींकडे या पथकाचे लक्ष वेधले. ते म्हणाले की, लॉकडाऊन केला आहे मात्र आपण मास टेस्टींग करत नाही हे विसंगत आहे तेव्हा मास टेस्टींग करावं अशी मागणी करून ते म्हणाले की, ‘को एक्झिस्टींग विथ कोरोना’ प्लान तयार करून प्रथम ग्रीन झोन मध्ये त्याची अंमलबजावणी तत्काळ सुरू करावी. त्यानंतर टप्प्याटप्प्याने ऑरेंज आणि रेड झोनमध्ये हा प्लान राबवावा असे डॉ. कोल्हे यांनी सांगितले.

राज्य सरकार, जिल्हा प्रशासन, आरोग्य विभाग, डॉक्टर्स, परिचारिका यासह विविध विभागांनी आतापर्यंत अतिशय चांगली कामगिरी बजावली असून त्यामुळे कोरोना विषाणूंचा संसर्ग आटोक्यात आहे अशा शब्दांत ठामपणे बाजू मांडत डॉ. कोल्हे यांनी राज्यातील कोरोना विरोधात लढणाऱ्या सर्व यंत्रणांचे कौतुक केले.

राज्य सरकार परराज्यातून आलेल्या कामगारांची चांगली काळजी घेत आहे. त्यांना व केशरी रेशनकार्ड धारकांना धान्य पुरवीत आहे. परंतु परराज्यातून आलेल्या कामगारांना घराची ओढ लागली आहे. त्यामुळे आतापासूनच त्यांना त्यांच्या गावी परतण्यासाठी विशेष ट्रेन्सचे नियोजन करण्याची उपमुख्यमंत्री व पालकमंत्री अजितदादा पवार यांची मागणी मान्य करावी अशी सूचनाही डॉ. कोल्हे यांनी केंद्रीय पथकाकडे केली.

सर्वात महत्त्वाचे म्हणजे वैद्यकीय उपचार करणाऱ्या स्टाफची इंटरव्हलला नियमित तपासणी करण्यात यावी. उपचार करणारी रुग्णालये कोरोना संसर्गाची केंद्रीय बनणार नाहीत याची दक्षता घेणे आवश्यक असल्याचे सांगून डॉ. कोल्हे यांनी “टायफाईड मेरी” या बहुचर्चित घटनेप्रमाणे घडू नये अशी अपेक्षा व्यक्त करताना इटली सारख्या देशात एकाच वेळी अनेक रुग्णांलयात कोरोना रुग्णावर उपचार केले. त्यामुळे आरोग्य कर्मचाऱ्यांना संसर्ग होऊन परिस्थिती अधिक गंभीर बनली याकडे केंद्रीय पथकाचे लक्ष वेधून सर्वण कोविड रुग्णालयात एकाच वेळी रुग्ण दाखल करून उपचार करण्याऐवजी एका रुग्णालयाची खाटांची क्षमता संपेपर्यंत दुसऱ्या रुग्यालयात दाखल कोरोनाचा रुग्ण दाखल करू नये अशी सूचनाही डॉ. कोल्हे यांनी केली.

आयुष मंत्रालयाच्या मार्गदर्शक सूचना अतिशय अस्पष्ट (व्हेग) आहेत. त्यामुळे आयुर्वेद, युनानीसह सर्व शाखांचा ‘कंबाईन इंटिग्रेटेड मेडिकल अॅप्रोच’ केंद्र सरकारने तयार करावा अशी सूचनाही या व्हिडिओ कॉन्फरन्स बैठकीत आपले मुद्दे मांडताना डॉ. कोल्हे यांनी केंद्रीय पथकाला केली.

Read more...

पुणे विभागात कोरोना बाधित ०१ हजार ३१ रुग्ण विभागीय आयुक्त डॉ.दीपक म्हैसेकर यांची माहिती

पुणे विभागात कोरोना बाधित ०१ हजार ३१ रुग्ण
विभागीय आयुक्त डॉ.दीपक म्हैसेकर यांची माहिती

पुणे विभागात १७२ कोरोना बाधित रुग्ण बरे

विभागामधील ४७ लाख ५१ हजार ८०२ घरांचे सर्वेक्षण पूर्ण

०१ कोटी ८२ लाख ७१ हजार ८५७ व्यक्तींची तपासणी

सजग वेब टिम, पुणे

पुणे दि.२३| विभागातील कोरोना बाधीत रुग्णांची संख्या ०१ हजार ३१ झाली असून विभागात १७२ कोरोना बाधित रुग्ण बरे होऊन घरी गेले आहेत. ॲक्टीव रुग्ण ७९४ आहेत. विभागात कोरोनाबाधीत एकुण ६५ रुग्णांचा मृत्यू झाला आहे. तसेच १३ रुग्ण गंभीर असून उर्वरीत निरीक्षणाखाली आहेत, अशी माहिती विभागीय आयुक्त डॉ.दीपक म्हैसेकर यांनी दिली.

विभागात ०१ हजार ३१ बाधित रुग्ण असून ६५ रुग्णांचा मृत्यू झाला आहे. यापैकी पुणे जिल्हयात ९३६ बाधीत रुग्ण असून ५९ रुग्णांचा मृत्यू झाला आहे. सातारा जिल्हयात २१ बाधीत रुग्ण असून २ रुग्णांचा मृत्यू झाला आहे. सोलापूर जिल्हयात ३७ बाधीत रुग्ण असून ३ रुग्णांचा मृत्यू झाला आहे. सांगली जिल्हयात २७ बाधीत रुग्ण असून एका रुग्णाचा मृत्यू झाला आहे. कोल्हापूर जिल्हयात १० बाधीत रुग्ण आहेत.

आजपर्यत विभागामध्ये एकुण ११ हजार ७०७ नमूने तपासणीसाठी पाठविणेत आले होते त्यापैकी ११ हजार ४६ चा अहवाल प्राप्त झाल असून ६६२ नमून्यांचा अहवाल प्रतीक्षेत आहे. प्राप्त अहवालांपैकी ९ हजार ९६४ नमून्यांचा अहवाल निगेटीव्ह असून ०१ हजार ३१ चा अहवाल पॉझिटिव्ह आहे.

आजपर्यंत विभागामधील ४७ लाख ५१ हजार ८०२ घरांचे सर्वेक्षण पूर्ण करण्यात आले असून त्याअंतर्गत १ कोटी ८२ लाख ७१ हजार ८५७ व्यक्तींची तपासणी केली आहे. त्यापैकी ९२७ व्यक्तींना अधिक तपासणीसाठी संदर्भीत करण्यात आले आहे.

Read more...

‘मदत नव्हे कर्तव्य’ आ.सुनील शेळके यांचा विधायक उपक्रम

‘मदत नव्हे कर्तव्य’ उपक्रमांतर्गत मावळातील १४ हजार कुटुंबांना जीवनावश्यक वस्तू वाटप

मावळचे आमदार सुनील शेळके यांचा विधायक उपक्रम

तालुक्यातील वाडी-वस्तीवरसुद्धा घरपोच मिळणार अन्नधान्य

मावळ | कोरोनाच्या पार्श्वभूमीवर सध्या सुरू असलेल्या ‘लॉकडाउन’मुळे अनेकांचा रोजगार बुडाला. हजारो कुटुंबांच्या पोटाचा प्रश्न निर्माण झाला. मात्र, सामाजिक बांधिलकी आणि कर्तव्य म्हणून मावळातील २० हजार गरजु कुटुंबांना किमान महिनाभर पुरेल अशा जीवनावश्यक वस्तू मोफत देण्याचा उपक्रम आमदार सुनील शेळके यांनी हाती घेतला आहे.
तालुका प्रशासन आणि आमदार सुनील शेळके मित्र परिवार यांच्या वतीने तहसील कार्यालय येथे सोमवारी (दि.१३एप्रिल २०२०) येथे सकाळी ११ वाजता या उपक्रमाची औपचारिक सुरूवात करण्यात येईल. पहिल्या टप्प्यात १४ हजार कुटुंबांना, तर दुसऱ्या टप्प्यात सहा हजार कुटुंबांना धान्यवाटप करण्यात येणार आहे. याप्रसंगी मावळचे उपविभागीय अधिकारी संदेश शिर्के, तहसीलदार मधुसूदन बर्गे, गटविकास अधिकारी शरदचंद्र माळी, तसेच सामाजिक संस्था, सभासद यावेळी उपस्थित राहणार आहेत.

याविषयी बोलताना आमदार सुनील शेळके म्हणाले की, कोरोना विषाणुविरुद्धचे युद्ध जिंकण्यासाठी प्रशासन आणि लोकप्रतिनिधी संयमाने लढा देत आहेत. कोरोनामुळे अडचणीत असलेल्या कुटुंबांना आम्ही मदत नव्हे तर कर्तव्य भावनेतून ह्या उपक्रमासाठी पुढाकार घेतला आहे.

‘सोशल डिस्टंसिंग’चे पालन करुनच जीवनावश्यक वस्तू वाटप …
वाटप करताना प्रशासनाने दिलेल्या ‘सोशल डिस्टंसिंगबाबत सूचनांचे पालन करण्यात येणार आहे. गरजु कुटुंबियांना एक महिना पुरेल इतका किराणासह अत्यावश्यक ११ वस्तुंचा संच तयार केला आहे. ग्रामीण भागातील आंदर मावळ, नाणे मावळ, पवन मावळ येथील गरजु कुटुंबांसह १९ आदिवासी गावे, डोंगर पठारावर असणारे पाडे, वाड्या वस्त्यांवर जावून घरपोच धान्यवाटप केले जाणार आहे. विशेष म्हणजे, याकामी शासकीय अधिकारी, तलाठी, ग्रामसेवक यांचीही मदत घेतली जाईल, असेही आमदार सुनील शेळके यांनी म्हटले आहे.

Read more...

पुण्यात सॅम्पल तपासणीचे प्रमाण वाढले – डॉ. म्हैसेकर

पुण्यात सॅम्पल तपासणीचे प्रमाण वाढले

कोविड-19 ने मृत्यू झालेल्या व्यक्तींमध्ये मधुमेह व उच्च रक्तदाब विकाराच्या ज्येष्ठांचे प्रमाण अधिक
-विभागीय आयुक्त डॉ.दीपक म्हैसेकर

सजग वेब टिम, पुणे

पुणे, दि.०९ 😐 पुणे शहरात कोविड-१९ रुग्णांची संख्या वाढत आहे. ही वस्तुस्थिती असली तरी तपासणीसाठी घेण्यात आलेल्या एकूण सॅम्पल पैकी साधारण ३.९ टक्के केसेस पोझिटिव्ह तर साधारण ८९ टक्के केसेस निगेटीव्ह आहेत. पुण्यात कोरोना बाधित रुग्णांच्या मृत्यूचे प्रमाण वाढत आहे. ही चिंतेची बाब आहे. मृत पावलेल्या एकूण व्यक्तींपैकी साधारणपणे ८० टक्के व्यक्ती ज्येष्ठ नागरिक आहेत. शिवाय यातील बहुतांशी व्यक्तींना मधुमेह व उच्च रक्तदाब हा विकार दिसून आला आहे, अशी माहिती विभागीय आयुक्त डॉ.दीपक म्हैसेकर यांनी आज दिली.

०५ ते ३१ मार्च २०२० या कालावधीत ०१ हजार २३५ सॅम्पल घेण्यात आले होते. यापैकी ४८ सॅम्पल पॉझिटिव्ह तर १ हजार ११० सॅम्पल निगेटीव्ह आले आहेत. म्हणजे तपासणी करण्यात आलेल्या एकूण सॅम्पलपैकी साधारण ३.९ टक्के सॅम्पल पॉझीटीव्ह तर ८९ टक्के सॅम्पल निगेटीव्ह आले आहेत. मार्च महिन्याच्या तुलनेत १ एप्रिल ते ८ एप्रिल या दरम्यान साधारणपणे चार पट जास्त सॅम्पलची तपासणी करण्यात आली आहे. या कालावधीत पॉझीटीव्ह केसेसची संख्या ही झपाटयाने वाढल्याचे दिसून येते. तपासणी दरम्यान पॉझीटीव्ह केसेस जास्त आढळून आल्यामुळे त्यांच्यावर वेळेत उपचार करणे शक्य झाले आहे. त्यामुळे नागरिकांनी चिंता करु नये.

कोरोना पॉझीटीव्ह १ व्यक्ती सुमारे ४०० व्यक्तींना बाधित करु शकते. बाधित व्यक्तीने मास्क वापरला तर सुमारे २०० व्यक्ती बाधित होण्याइतके प्रमाण कमी होते. त्यामुळे प्रत्येक नागरिकाने मास्कचा वापर करावा, असे आवाहन डॉ. दीपक म्हैसेकर यांनी केले आहे.

Read more...
Open chat
Powered by