हरिश्चंद्र देसाई महाराष्ट्राला लाभलेले फणसकिंग

महाराष्ट्राला लाभलेले फणसकिंग – हरिश्चंद्र देसाई

सजग संपादकीय

रत्नागिरी जिल्ह्यातील, लांजा तालुक्यातील झापडे ह्या गावात श्री हरिश्चंद्र देसाई ज्यांना अक्खा महाराष्ट्र #फणसकिंग म्हणून ओळखतो व त्यांच्या सोबत त्यांच्या मुलगा मिथिलेश देसाई (B. Tech Agriculture Engg, Rahuri) त्यांनी आगळी वेगळी अशी फणस लागवड केली आहे.

जगभरात फणसाच्या साधारण १२८ व्हरायटी आहेत त्यातील देसाई ह्यांनी ७२ व्हरायटी सध्या लावल्या आहेत, आणि मिथिलेश याचे ध्येय अस आहे की किमान १२८ पैकी १०० व्हरायटी तरी लागवड करायची. देसाई यांची सध्या तब्बल १२५० फणस झाडांची लागवड झाली आहे आणि इतक्या व्हरायटी आणि इतकी लागवड करणारे ते महाराष्ट्रातील, गोव्यातील आणि कर्नाटक मधील एकमेव शेतकरी आहेत. आता सर्वांना फणसाच्या फक्त दोन प्रकार माहिती आहेत, कापा म्हणजे कडक Shell वाला आणि बरका म्हणजे नरम Shell वाला फणस पण Commercially काप्या फणसाला खूप डिमांड असल्याने देसाई ह्यांची ७२ व्हरायटी आणि १२५० लागवड ही काप्या फणसाची आहे. मग सगळ्यांना फणसाच्या गाऱ्याचा रंग पिवळा इतका माहिती आहे पण ह्यांच्याकडे भगवा, पांढरा, लाल, पिंक किंवा वर्षातून दोन वेळा येणारे फणस किंवा निर फणस अश्या वेग वेगळ्या जाती आहेत.

देसाई यांचे म्हणणं आहे, फणस फक्त थंड हवे च ठिकाण सोडल्यास सगळीकडे फणस येऊ शकतो म्हणजे सर्वांना वाटत की फणस फक्त कोकणात येतो तर तस नाही, देसाई यांच्या कडील ७२ व्हरायटी पैकी संशोधन करून देसाई यांनी आशा काही व्हरायटी निवडल्या आहेत ज्या पश्चिम महाराष्ट्र, उत्तर महाराष्ट्र, मराठवाडा आणि विदर्भ आशा सर्व विभागांमध्ये येऊ शकतात आणि फणस हे अस एक मेव झाड आहे जे पूर्ण पणे ऑरगॅनिक आहे, रासायनिक फवारणी नको व झाडाचं आयुष्य किमान १०० ते जास्तीत जास्त ३०० वर्ष इतकं आहे. देसाई यांच्या नावाने म्हणजे देसाई कापा म्हणून कोकणातील त्यांनी विकसित केलेली फणसाची व्हरायटी केरळ राज्यात विकली जात आहे, आणि आपल्या सर्वांसाठी अभिमानाची बाब आहे.

मिथिलेश यांचे अस म्हणणं आहे की लोकांनी किमान हळू हळू आता कोंकण सोडता महाराष्ट्राच्या वेग वेगळ्या भागांमध्ये फणसाची लागवड ट्रायल बेसिस वर सुरवात केली पाहिजे. यावर्षी पहिल्यांदाच देसाई यांनी फणसाची नर्सरी सुरू केली असून तब्बल ३००० फणस झाड त्यांनी दिली असून यावर्षी महाराष्ट्रात पहिल्यांदाच फणसाची लागवड झाली. मिथिलेश च म्हणणं असे आहे की, जसे Jackfruit Mission for Kerala , JF Mission for Andhra, Jackfruit Mission for Meghalaya आहे तसे अपल्याकडे #Jackfruit_Mission_for_Maharashtra सुरू केलं पाहिजे. फणस हे अस फळ आहे ज्याच्या कडे फळ म्हणून न पाहता अन्न म्हणून पाहिल पाहिजे कारण फणस हे येत्या काळातील #Global_Fruit असणार आहे. देसाई यांचा ह्या प्रकल्पाला सरकार ची पाहिजे ती साथ मिळाल्यास मिथिलेश व त्या वडिलांना त्यांचा इथे #Jackfruit_Research_Centre उभारायच आहे,जेणे करून महाराष्ट्राला फणस लागवड करता येईल. येत्या काळात लवकरच त्यांचं स्वतः Food Processing Plant देखील सुरू होणार असून फणस हा Main Product ठेऊन बाकी Innovative Food Products राहणार आहेत.

फणसकिंग हरिश्चंद्र देसाई
9422624101

मिथिलेश देसाई
Jackfruit Enterpreneur
8275455176 (Whatsapp)

Read more...

तालुका टॅंकरमुक्‍त करण्याच्या दृष्टीने चिल्हेवाडी पाईपलाईन प्रकल्प महत्वाचा – आ.अतुल बेनके

तालुका टॅंकरमुक्‍त करण्याच्या दृष्टीने चिल्हेवाडी पाईपलाईन प्रकल्प महत्वाचा – आ. अतुल बेनके

सजग वेब टिम, जुन्नर

जुन्नर | जुन्नर तालुक्यातील चिल्हेवाडी येथील धरण प्रकल्पातून बंदिस्त पाइपलाईन प्रकल्पाचा पहिला टप्पा तब्बल वीस वर्षांनी पूर्णत्वास जात आहे. या प्रकल्पाचे काम सध्या प्रगतीपथावर आहे. डोमेवाडी येथे मंगळवारी माजी आमदार वल्लभ बेनके यांच्या वाढदिवसाचे औचित्य साधून माजी आमदार बाळासाहेब दांगट यांच्या हस्ते या प्रकल्पाचे जलपूजन करण्यात आले.

या प्रकल्पा अंतर्गत चिल्हेवाडी पाचघर ते बेल्हे रानमळापर्यंत सुमारे ३९ किमी भूमिगत पाईपलाईन करण्यात येत आहे. यापैकी १२.५ किमीचा पहिला टप्पा पूर्ण झालेल्या पाईपलाईनचे जलपूजन करण्यात आले. या प्रकल्पामुळे चिल्हेवाडी, पाचघर, आंबेगव्हाण, रोहोकडी, अहिनवेवाडी, ओतूर या गावांना सध्या लाभ होणार आहे.

शेतकरी हिताचे निर्णय घेऊन जलवाहिनीच्या कामाची पूर्तता करण्यासाठी मी प्रयत्नशील राहणार आहे. माजी आमदार बाळासाहेब दांगट व वल्लभशेठ बेनके साहेब यांनी या प्रकल्प उभारणीसाठी मेहनत घेतली आहे. दोघांचा राजकीय संघर्ष हा विचारांचा आणि तालुक्‍याच्या विकासाचा होता. पाण्याचा हक्‍क सर्वांचा आहे. या चिल्हेवाडी प्रकल्पामुळे तालुक्‍यातील ६ हजार ३७२ हेक्‍टर इतके जमीन क्षेत्र ओलिताखाली येणार आहे. संपूर्ण तालुका टॅंकरमुक्‍त करण्याच्या दृष्टीने हा प्रकल्प महत्वाचा आहे आणि हा प्रकल्प पूर्ण करण्याचा माझा मानस आहे असे प्रतिपादन आमदार अतुल बेनके यांनी यावेळी बोलताना केले आहे.

या उद्घाटनप्रसंगी कृषी उत्पन्न बाजार समितीचे सभापती ऍड. संजय काळे, जिल्हा परिषद सदस्य पांडुरंग पवार, ओतूर पोलीस ठाण्याचे सहायक निरीक्षक परशुराम कांबळे, कुकडी प्रकल्पाचे कार्यकारी अभियंता एस. जे. माने, सहायक अभियंता श्रेणी १ एम. के. शिंदे, सहायक अभियंता श्रेणी २ चे डी. एम. नाईकनवरे, कनिष्ठ अभियंता सी. जी. वैद्य, इंडियन ह्युम पाईप इंडिया लि. कंपनी मुंबईचे असिस्टंट मॅनेजर एस. वाय. शेख, ओतूर, डोमेवाडी, रोहोकडी, उंब्रज, खामुंडी, पाचघर आदी गावातील मान्यवर ग्रामस्थ उपस्थित होते.

Read more...

उंडेखडक येथे पाच गावातील शेतकऱ्यांना आमदार अतुल बेनके यांच्या हस्ते मोफत खत वाटप

उंडेखडक येथे पाच गावातील शेतकऱ्यांना आमदार अतुल बेनके यांच्या हस्ते मोफत खत वाटप

सजग वेब टिम, जुन्नर

जुन्नर| कोविड १९ च्या पार्श्वभूमीवर शेतकऱ्यांना मदत म्हणून घेण्यात येत असलेल्या मोफत खत वाटप कार्यक्रमाअंतर्गत सोपेकॉम संस्था पुणे आणि निलेशभाऊ रावते युवा मंच यांच्या संयुक्त विद्यमाने आज उंडेखडक गावठाण याठिकाणी १०० गोणी युरिया खताचे वाटप करण्यात आले. आदिवासी भागातील उंडेखडक, अजनावळे, घाटघर जळवंडी व चावंड या गावातील शेतकऱ्यांना याचा लाभ झाला. आमदार अतुल बेनके यांच्या हस्ते या सर्व शेतकऱ्यांना खताचे वाटप करण्यात आले. तसेच जिल्हा परिषद प्राथमिक शाळेच्या डिजिटल शाळा उपक्रमासाठी दोन LED सेट ग्रामपंचायत उंडेखडक यांच्यावतीने देण्यात आले.

यावेळी बोलताना आमदार अतुल बेनके यांनी उंडेखडक गावातील शाळेच्या बांधकामासाठी व रावते वस्ती व मुंडे वस्ती वरील रस्त्यासाठी निधी उपलब्ध करून दिला जाईल असे आश्वासन दिले. खत वाटपाच्या या सामाजिक उपक्रमाबद्दल त्यांनी सोपेकॉम संस्था पुणे आणि निलेशभाऊ रावते युवा मंच यांचे आभार मानले.

या कार्यक्रमास प्रमुख पाहुणे म्हणून सरपंच गायत्रीताई रावते, सभापती विशाल तांबे, राष्ट्रवादी काँग्रेसचे प्रवक्ते भाऊसाहेब देवाडे, प. स. सदस्य अनघाताई घोडके, निलेश रावते, अॅड.ललित जोशी, किरण लोहकरे, देवराम नांगरे गुरुजी, बाळासाहेब सदाकाळ, युवराज लांडे, बाळासाहेब पवार, ग्रामसेवक गाडेकर भाऊसाहेब, शिक्षक वृंद आरोग्य कर्मचारी, आशा वर्कर,अंगणवाडी सेविका आदी मान्यवर, कर्मचारी आणि ग्रामस्थ उपस्थित होते.

Read more...

नुकसानग्रस्तांना मदतीचे वाटप तालुकास्तरावर सुरू- जिल्‍हाधिकारी नवल किशोर राम

नुकसानग्रस्तांना मदतीचे वाटप तालुकास्तरावर सुरू- जिल्‍हाधिकारी नवल किशोर राम

सजग वेब टिम, पुणे

पुणे (दि.७) | पुणे जिल्ह्यात ‘निसर्ग’ चक्रीवादळामुळे जीवित व वित्तहानी झालेली आहे. तसेच शेतीपीक, पॉलीहाऊस व शेडनेट यांचेदेखील मोठ्या प्रमाणात नुकसान झालेले आहे. त्यामुळे बाधित नागरीक व शेतकरी यांना शासन निर्णयाप्रमाणे देय मदतीचे वाटप तालुकास्तरावर सुरू असल्‍याची माहिती जिल्‍हाधिकारी नवल किशोर राम यांनी दिली.

आपत्ती व्यवस्थापन कायदा २००५ मधील कलम २५ अन्वये जिल्हा आपत्ती व्यवस्थापन प्राधिकरणाची स्थापना करण्यात आलेली असून जिल्हाधिकारी नवल किशोर राम हे या प्राधिकरणाचे पदसिध्द अध्यक्ष आहेत. शासन निर्णयाप्रमाणे देय मदतीची रक्कम तहसिल कार्यालयामार्फत नागरीक व शेतकरी यांच्या बँकेतील खात्यावर चेक व आर.टी.जी.एस.व्दारे जमा करण्‍यात येत आहे. परंतु, नैसर्गिक आपत्तीमुळे मदत म्हणून दिलेली रक्कम नागरीक व शेतकरी यांच्या खात्यावरून परस्पर त्यांच्या कर्ज खाते व इतर खाती यामध्ये समायोजीत किंवा कपात करण्यात येऊ नये, अशा सूचना जिल्‍हाधिकारी राम यांनी सर्व राष्ट्रीयकृत, सहकारी व खाजगी बँकांना दिल्‍या आहेत.

सर्व राष्ट्रीयकृत, सहकारी व खाजगी बँकांनी नैसर्गिक आपत्तीमुळे मदत म्हणून देय रक्कम नागरीक व शेतक-यांच्‍या अन्य कर्ज खाती व इतर खाती यांच्यामध्ये परस्पर समायोजित किंवा कपात करण्‍यात येवू नये असे स्‍पष्‍ट केले आहे. अशी बाब निदर्शनास आल्यास संबंधितांवर आपत्ती व्यवस्थापन अधिनियम २००५ अन्वये कायदेशीर कारवाई करण्‍यात येईल, असा इशारा जिल्‍हाधिकारी राम यांनी दिला आहे.

Read more...

जुन्नरच्या आंब्याला मिळणार ऐतिहासिक नाव

जुन्नरच्या आंब्याला मिळणार ऐतिहासिक नाव

सजग वेब टिम, जुन्नर

जुन्नर | जुन्नर तालुक्यातील अनेक भागांमध्ये आंब्याच्या बागा पाहायला मिळतात. पश्चिम पट्टयातील येणेरे, काले तांबे, पारुंडे या गावांमध्ये अनेक वर्षांपासून आंब्याची शेती केली जाते. जुन्नरच्या आंब्यालाही कोकण च्या आंब्याप्रमाणे विशिष्ट चव आहे. जुन्नर च्या या आंब्याला आता ऐतिहासिक नाव मिळणार आहे.

आज पुणे याठिकाणी झालेल्या निसर्ग वादळ आढावा बैठकीदरम्यान जुन्नर तालुक्यातील आंब्याला विशेष ओळख मिळवून देण्यासाठी आमदार अतुल बेनके यांनी हि मागणी उपमुख्यमंत्री अजित पवार यांच्याकडे केली.

जुन्नरच्या आंब्याला ‘जुन्नर हापूस’ हे नवीन नाव मिळावे यासाठीची महत्वपूर्ण ऐतिहासिक मागणी आजच्या बैठकीत बेनके यांनी केली आहे. ‘जुन्नर हापूस’ आंबा हे नाव शासनाने जीआय मानांकन यादीत समाविष्ट करण्यासाठी अनुकूलता दर्शविली आहे याबाबतची बैठक मुंबईमध्ये लवकरच होणार आहे अशी माहिती आमदार बेनके यांनी सजग टाईम्स शी बोलताना दिली आहे.

Read more...

‘आंबा’ पिकाची विमा मुदत ३० जून पर्यंत करावी – आ.अतुल बेनके

आंबा’ पिकाची विमा मुदत ३० जून पर्यंत करावी – आ.अतुल बेनके

– “निसर्ग” वादळ आढावा बैठक 

सजग वेब टिम, जुन्नर

पुणे | “निसर्ग” चक्रीवादळामुळे झालेल्या नुकसानीचा आढावा घेण्यासाठी आज उपमुख्यमंत्री आणि पुणे जिल्ह्याचे पालकमंत्री अजित पवार यांनी जिल्हाधिकारी, विविध खात्याचे प्रमुख अधिकारी तसेच पुणे जिल्ह्यातील नुकसानग्रस्त भागातील सर्व खासदार, आमदार यांच्यासोबत कौन्सिल हॉल, पुणे येथे आढावा बैठक आयोजित केली होती.

या बैठकीत आमदार बेनके यांनी जुन्नर तालुक्यातील संपुर्ण आढावा जिल्हाधिकाऱ्यांसमोर मांडला. त्याचबरोबर त्यांनी काही प्रमुख मागण्याही या बैठकीत मांडल्या.

– पीकविमाबाबत एक पत्र उपमुख्यमंत्री आणि जिल्हाधिकारी नवलकिशोर राम यांना देण्यात आले होते.

त्यात प्रामुख्याने आंबा पिकाबाबत एक महत्वाची मागणी करण्यात आली होती. जुन्नर तालुक्यातील आंबा हा जून मध्ये म्हणजे थोडा उशिरा चालू होतो त्यामुळे आंबा या पीकाची विम्याची मुदत ३० जून पर्यंत वाढविण्यात यावी अशी मागणी करण्यात आली होती. हि मागणी आजच्या बैठकीत शासनाने मान्य करून त्याबाबत कार्यवाही करण्यासाठी सकारात्मकता दर्शविली आहे

– तसेच या वादळाच्या नैसर्गिक संकटाच्या पार्श्वभूमीवर जुन्नर तालुक्यासाठी एक अतिरिक्त केरोसीन टँकर ची मागणी करण्यात आली आहे.

– आदिवासी भागातील बाळहिरडा या पिकाचाही नुकसान भरपाईसाठीच्या पिकांच्या यादीत समाविष्ट करण्यात यावे.

– आदिवासी भागातील आणि इतर भागातील घरांच्या नुकसानीचे पंचनामे करून ते लवकरात लवकर सादर करावेत, घर खासगी असो किंवा सरकारी पंचनामा झाले असेल तर ते मदतीस पात्र असेल असे बेनके यांनी या बैठकीत अधिकाऱ्यांना सूचित केले आहे.

अशा नैसर्गिक आपत्तीवेळी राज्य शासन सर्व शेतकऱ्यांच्या पाठीमागे खंबीरपणे उभे असून सर्वतोपरी मदत करण्यास कटिबद्ध आहे. नुकसानग्रस्त कुटुंबाना शासनाकडून तातडीने मदत करण्याचे आश्वासन उपमुख्यमंत्री अजित पवार यांनी या बैठकीत दिले आहे.

Read more...

निसर्ग चक्रीवादळामुळे झालेल्या नुकसानीचे तात्काळ पंचनामे करा – खा.डॉ.अमोल कोल्हे

निसर्ग चक्रीवादळामुळे झालेल्या नुकसानीचे तात्काळ पंचनामे करा – खा.डॉ.अमोल कोल्हे

सजग वेब टिम, पुणे

पुणे | निसर्ग चक्रीवादळामुळे शिरूर लोकसभा मतदारसंघातील विविध तालुक्यात झालेल्या नुकसानीचे तत्काळ पंचनामे करा अशी मागणी खासदार डॉ. अमोल कोल्हे यांनी जिल्हाधिकारी श्री. नवल किशोर राम यांना पत्र पाठवून केली आहे.

आज निसर्ग चक्रीवादळाने मुंबई, कोकण परिसरात धडक दिल्यानंतर या चक्रीवादळाचा परिणाम पुणे जिल्ह्यात जाणवायला सुरुवात झाली होती. मात्र दुपारनंतर जोरदार वादळी वाऱ्यासह झालेल्या पावसामुळे अनेक घरांवरील पत्रे व छप्परं उडून गेली. तसेच घरांचे, वाहनांचे व शेतीचेही मोठे नुकसान झाले आहे. या नुकसानीची तातडीने दखल घेऊन खासदार डॉ. कोल्हे यांनी जिल्हाधिकारी नवल किशोर राम यांना पत्र पाठवून नुकसानीचे पंचनामे करण्याचे आदेश महसूल प्रशासनाला देण्याची मागणी केली आहे.

कोरोनाच्या संकटामुळे आधीच आर्थिक अडचणीत असलेल्या शेतकऱ्यांना निसर्ग चक्रीवादळामुळे मोठा फटका बसला असून त्यातून सावरण्यासाठी त्यांना प्रशासनाने मदत करण्याची गरज आहे असे डॉ. कोल्हे यांनी सांगितले.

Read more...

उसतोडणी कामगारांची काळजी यापुढेही घेतली जाईल – सत्यशिल शेरकर

विघ्नहर सह.साखर कारखान्याकडुन कारखान्याच्या ऊसतोडणी मजुर व कामगार यांना किराणा मालाचे वाटप

सजग वेब टिम, जुन्नर

शिरोली बु.| कोरोनामुळे देशभरात लाॅकडाऊन असल्याने अनेक गोरगरिब, मोलमजुरी करणार्‍या नागरिकांचा जेवनाचा प्रश्न निर्माण झाला आहे. त्यासाठी अनेक व्यक्ती व संस्थासह शासन पातळीवरही उपाययोजना करण्यात येत आहे.

त्यात आता विघ्नहर सहकारी साखर कारखाना लि. जुन्नर/आंबेगावनेही सर्व ऊस तोडणी मजूर व कामगार यांच्या प्रत्येक कुटुंबास सहा दिवस पुरेल एवढा किराणा मालाचे वितरण करत सामाजिक बांधिलकी जपत यापुढेही उसतोडणी कामगारांची काळजी घेतली जाईल अशी ग्वाही चेअरमन सत्यशिल शेरकर यांनी यावेळी बोलताना दिली.

यानिमित्तानं चेअरमन सत्यशिल शेरकर, व्हाईस चेअरमन अशोक घोलप, संचालक संतोष खैरे, कार्यकारी संचालक राजेंद्र जंगले, सचिव अरुण थोरवे, गटविकास अधिकारी विकास दांगट, पोलिस निरीक्षक युवराज मोहिते यांसह संचालक, पोलिस व कारखान्याचे कर्मचारी उपस्थित होते.

Read more...

शिरूरमधील अधिकाऱ्यांनी आपल्या कार्यक्षेत्रात थांबावे – विजयसिंह नलावडे

शिरूरमधील अधिकाऱ्यांनी आपल्या कार्यक्षेत्रात थांबावे – विजयसिंह नलावडे

शिरूर |आंतरराष्ट्रीय स्तरावर व देशांतर्गत कोरोना विषाणूचा वाढत असलेला प्रादुर्भाव लक्षात घेऊन शिरूर शहर व ग्रामीण भागातील परिस्थिती नियंत्रित करण्यासाठी गावकामगार तलाठी, ग्रामसेवक, कृषी सहायक, सोसायटी सचिव, कोतवाल व पोलीस पाटील यांनी पूर्णवेळ आपापल्या कार्य क्षेत्रात थांबून कोरोना विषाणूचा संसर्ग रोखण्यासाठी आवश्यक त्या उपाययोजना राबवण्याबाबत शिरूरच्या तहसीलदार श्रीमती लैला शेख यांनी दिनांक २७/०३/२०२० रोजी आदेश काढून सूचना दिल्या आहेत.गावातील मुख्य रस्त्यावर ग्रामपंचायत कर्मचारी, कोतवाल याचे तपासणी पथक तयार करून गावाबाहेरील लोकांची चौकशी करावी.

शासन स्तरावरून येणाऱ्या आदेशाची नागरिकांना माहिती द्यावी. कार्य क्षेत्रात पूर्ण वेळ थांबावे व विनापरवानगी कार्यक्षेत्र सोडू नये असे आदेश असताना सुद्धा ग्रामसेवक, तलाठी, पोलीस पाटील, सोसायटी सचिव या आदेशाचे पालन करताना दिसत नाही. या बाबत विचारणा केली असता, अनेक ग्रामसेवक व तलाठी यांना दोन – तीन गावे असल्यामुळं आम्ही तरी या आदेशाचे पालन कसे करणार.असे सांगण्यात येत आहे. तर तालुक्यातील अनेक अधिकारी गावाकडे फिरकलेच नाहीत. “ग्रामसेवक जर गावात थांबले नाहीत तर कारवाई केली जाईल.”असा ईशारा शिरूरचे गटविकास अधिकारी विजयसिंह नलावडे यांनी दिला आहे.

ग्रामीण भागात पुणे, मुंबई व इतर शहरातून आलेल्या नागरीकांची संख्या लक्षणीय आहे.त्यामुळे आवश्यकती दखल न घेतल्यास ग्रामीण भागातही कोरोनाचा प्रसार होण्याची शक्यता नाकारता येत नाही. त्यामुळे अश्या परिस्थितीत तहसीलदारांनी काढलेला आदेश हा कागदावरच आहे का? असा सवाल ग्रामीण भागातील नागरीकांकडून व्यक्त केला जात आहे. तर या घटनेची दखल घेत प्रांताधिकारी व तहसीलदार यांच्याशी चर्चा करणार असल्याची माहिती कामगार मंत्री दिलीप वळसे पाटील यांनी दिली.

Read more...

राज्य आर्थिकदृष्टया सक्षम करण्याची ग्वाही शेतकरी हाच राज्य विकासाचा ‘केंद्रबिंदू’ – अजित पवार

राज्य आर्थिकदृष्टया सक्षम करण्याची ग्वाही शेतकरी हाच राज्य विकासाचा ‘केंद्रबिंदू’
– वित्त व नियोजनमंत्री अजित पवार

मुंबई दि. ६ | बळीराजाला कर्जमुक्त करण्यासाठी शासनाने अत्यंत सोपी, सुलभ अशी ‘महात्मा जोतिराव फुले शेतकरी कर्जमुक्ती योजना’ आणली असून बळीराजांनी घेतलेल्या कर्जाची मुद्दल व व्याज यांची थकीत रक्कम माफ करण्यासाठी एकूण 22 हजार कोटी रुपयांची तरतूद करण्यात आली असल्याचे वित्त व नियोजनमंत्री अजित पवार यांनी सांगितले.
आज राज्याचा सन 2020-21 वर्षाचा अर्थसंकल्प उपमुख्यमंत्री तथा वित्त व नियोजन मंत्री अजित पवार यांनी विधानसभेत तर विधानपरिषदेत वित्त व नियोजन राज्यमंत्री शंभुराज देसाई यांनी हा अर्थसंकल्प सादर केला.

आर्थिक मंदी दूर होईल हा विश्वास
आज देशात आर्थिक मंदीचे वातावरण आहे. राज्य कर्जबाजारी आहे किंवा राज्यातील आर्थिक स्थिती चांगली नाही. तरीही येणाऱ्या काळात महाराष्ट्रात अधिकाधिक उद्योगक्षेत्राला चालना देऊन राज्याची अर्थव्यवस्था बळकट करण्याचा राज्य शासनाचा प्रयत्न असल्याचे श्री. पवार यांनी यावेळी सांगितले. हे सांगताना श्री. पवार यांनी दिवंगत कवी हरिवंशराय बच्चन यांची कविता सादर करीत सांगितले. ‘असफलता एक चुनौती है, स्वीकार करो,क्या कमी रह गई, देखो और सुधार करो.’

बळीराजासाठी 22 हजार कोटींची तरतूद
सन 2019-20 मध्ये 15 हजार कोटी आणि सन 2020-21मध्ये 7 हजार कोटी अशी तरतूद करण्यात आली आहे. 13 लाख 88 हजार 854 शेतकऱ्यांच्या खात्यांवर 9 हजार 35 कोटी रुपयांची रक्कम यापूर्वी अदा करण्यात आली आहे. तसेच उर्वरित पात्र शेतकऱ्यांच्या खात्यावरही खरीप हंगाम संपण्यापूर्वी रक्कम वर्ग करण्यात येईल. शेतकऱ्यांनी 2015-16 ते 2018-19 या कालावधीत घेतलेले व दिनांक 30 सप्टेंबर 2019 पर्यंत थकीत खात्यावरील मुद्दल व व्याज दोन लाख रुपयांहून अधिक नाही अशी थकीत व परतफेड न झालेली रक्कम माफ करण्याचा निर्णय घेतला आहे.

बळीराजाला चिंतामुक्त करण्यासाठी आणखी दोन योजना

शासन शेतकऱ्यांना चिंतामुक्त करण्यासाठी काम करत असल्याचे स्पष्ट करून शासन शेतकऱ्यांच्या पाठीशी खंबीरपणे उभे असल्याचेही त्यांनी स्पष्ट केले. शासनाने यापूर्वीच ‘महात्मा जोतिराव फुले शेतकरी कर्जमुक्ती योजना’ आणली आहे. आजच्या अर्थसंकल्पात आणखी दोन योजना घोषित करण्यात आल्या. 1 एप्रिल 2015 ते 31 मार्च 2019 या कालावधील घेतलेल्या पीक कर्ज, पीक कर्जाचे पुनर्गठित केलेले कर्ज यांचे मुद्दल व व्याजासह दोन लाखांपेक्षा जास्त थकबाकी असलेल्या शेतकऱ्यांसाठी ‘एकवेळ समझोता योजना’ (One Time Settlement)आणली आहे. या योजनेनुसार दोन लाख रुपयांवरील त्यांच्या हिश्‌श्याची संपूर्ण रक्कम बँकेत जमा केल्यावर शासनामार्फत दोन लाख रुपये शेतकऱ्यांना अदा करण्यात येणार आहे. तसेच सन 2017-18 ते 2019-20 या तीन वर्षात घेतलेल्या पीक कर्जाच्या रक्कमेवर जास्तीत जास्त 50 हजार रुपये प्रोत्साहनपर रक्कम शेतकऱ्यांना देण्यात येईल. मात्र सन 2018-19 या वर्षात घेतलेल्या व त्याची पूर्णता परतफेड केलेल्या पीक कर्जाची रक्कम 50 हजार रुपयांपेक्षा कमी असल्यास, अशा शेतकऱ्यांना त्यांनी सन 2018-19 या वर्षात प्रत्यक्ष घेतलेल्या पीक कर्जाच्या रक्कमेइतका प्रोत्साहनपर लाभ देण्यात येईल.

आशियाई विकास बँकेच्या सहकार्यातून शेतकऱ्यांसाठी योजना
शेतीपंपासाठी उर्वरित महाराष्ट्रात नवीन वीज जोडण्या देण्यात येणार आहे. आशियाई विकास बँकेच्या सहकार्यातून शेतकऱ्यांसाठी योजना राबविण्यात येणार आहे. शेतीला दिवसा वीज पुरवठा करण्यासाठी पुढील 5 वर्षात दरवर्षी 1 लाख याप्रमाणे एकूण 5 लाख सौर कृषी पंप बसविण्यात येणार आहेत. या योजनेसाठी सुमारे 10 हजार कोटी रुपये खर्च अपेक्षित असून येत्या 5 वर्षात यासाठी निधी उपलब्ध करुन देण्यात येणार आहे. सन 2020-21 या वर्षासाठी 670 कोटी रुपये निधी प्रस्तावित करण्यात आला आहे.

शिवभोजन थाळी
अन्न, नागरी पुरवठा व ग्राहक संरक्षण विभागामार्फत सहा महानगरपालिका क्षेत्रात प्रायोगिक तत्वावर 10 रुपयांमध्ये शिवभोजन थाळी उपलब्ध करुन देण्यात येत आहे. या येाजनेत प्रत्येक केंद्रावर दररोज 500 जणांना भोजन उपलब्ध करुन देण्यात येत असून आता या योजनेअंतर्गत लाभार्थींची संख्या दुप्पट करण्यात येणार आहे. या योजनेसाठी यावर्षी 150 कोटी रुपयांची तरतूद करण्यात आली आहे.

महाराष्ट्र समृद्धी महामार्ग
हिंदुह्दयसम्राट बाळासाहेब ठाकरे महाराष्ट्र समृद्धी महामार्ग योजनेच्या आर्थिक संरचनेत बदल करण्यात आला आहे. या प्रकल्पासाठी शासनामार्फत 8 हजार 500 कोटी रुपये उपलब्ध्‍ा करुन देण्यात आल्यामुळे व्याजावरील रक्कमेमध्ये बचत होणार आहे. या महामार्गावर कृषी समृद्धी केंद्रे निर्माण करण्याचा निर्णय घेण्यात आला असून येत्या वर्षात 4 कृषी समृद्धी केंद्रे उभारण्यात येतील.

मा.बाळासाहेब ठाकरे स्मृती मातोश्री ग्रामपंचायत बांधणी योजना
राज्यातील एकूण 28,006 ग्रामपंचायतीपैकी जवळपास 4,252 ग्रामपंचायतींना स्वत:च्या कार्यालयासाठी इमारत नाही. 1,074 ग्रामपंचायतींना सन 2020-21 मध्ये इमारत बांधणीकरिता 150 कोटी रुपयांची तरतूद करण्यात आली आहे. राज्यातील सर्वच ग्रामपंचायतींना सन 2024 पर्यंत स्वत:चे कार्यालय मिळणार असून यासाठी शासनाकडून निधी उपलब्ध करुन दिला जाईल.

मुख्यमंत्री जलसंवर्धन योजना
राज्यात विविध योजनांमधून जलसंधारणाची कामे होती घेण्यात आली आहेत. या योजनांमधून अधिक जलसंचय व्हावा यासाठी सुमारे 8 हजार जलसंधारण योजनांचे पुनरुज्जीवन करण्यासाठी ‘मुख्यमंत्री जलसंवर्धन योजना’ प्रस्तावित करण्यात आली आहे. या योजनेमुळे विकेंद्रित जलसाठे निर्माण होण्याबरोबरच भूजल पातळीत वाढ होणार आहे. या योजनेसाठी 450 कोटी रुपयांची तरतूद करण्यात आली आहे.

अपूर्ण सिंचन प्रकल्प कालबध्द कार्यक्रमाद्वारे पूर्ण करण्यात येणार
शेतकऱ्यांचे उत्पन्न वाढविण्याकरिता शाश्वत सिंचन हा प्रभावी उपाय आहे. राज्यात सध्या 313 प्रकल्प अपूर्ण स्थितीत आहेत. अपूर्ण सिंचन प्रकल्प कालबध्द कार्यक्रमाद्वारे पूर्ण करण्यासाठी सुमारे 10 हजार 235 कोटी रुपयांची तरतूद करण्यात आली आहे.
*महिला व बालकांसाठी लिंगभाव व बाल अर्थसंकल्प*
राज्यातील लोकसंख्येमध्ये 60 टक्क्यांहून अधिक असलेल्या महिला व बालकांसाठी प्रथमच महिला व बालकांसाठी लिंगभाव व बाल (जेंडर अॅण्ड चाईल्ड बजेट) अर्थसंकल्प सादर करण्यात येणार आहे. शासनाच्या उपाययोजनांचा महिला, तृतीयपंथी व बालकांना होणाऱ्या लाभाचे व संबंधित योजनांचे यामधून मूल्यमापन करता येणार आहे. राज्यातील महिला बचत गटाच्या चळवळीस गतिमान करुन महिलांना अधिकाधिक रोजगार व्यवसायाच्या संधी उपलब्ध होणार आहे. राज्य शासनामार्फत करावयाच्या एकूण खरेदीतील सुमारे 1 हजार कोटी रुपयांपर्यंतची खरेदी प्राधान्याने महिला बचतगटाकडून करण्याबाबत शासनामार्फत विचार होत आहे. महिलांना अधिक सक्षम करण्यासाठी विभागीय आयुक्त स्तरावर महिला आयोगाचे कार्यालय स्थापन करण्यात येणार आहे. तसेच प्रत्येक जिल्ह्यात सर्व अधिकारी व कर्मचारी महिला असणाऱ्या किमान एका महिला पोलीस ठाण्याची स्थापना करण्यात येणार आहे.
हिरक महोत्सवी वर्षानिमित्त कार्यक्रम
राज्य स्थापनेला येत्या 1 मे 2020 रोजी 60 वर्षे पूर्ण होत आहे. यानिमित्ताने महाराष्ट्र राज्याचा हिरक महोत्सव साजरा करण्यात येणार असून यासाठी 55 कोटी रुपयांची तरतूद करण्यात आली आहे. तर शंभराव्या अखिल भारतीय नाटय संमेलनाकरिता 10 कोटी रुपये अनुदान देण्यात येणार आहे.

जागतिक तापमानवाढ व पर्यावरण बदल यावरील उपाययोजनांसाठी तरतूद
जागतिक तापमानवाढ व पर्यावरण बदल यावरील उपाययोजनांसाठी विशेष निधीची तरतूद करण्यात आली आहे. नदी कृती आराखडा तयार करण्याबरोबरच पर्यावरण विभागासाठी 230 कोटी रुपयांची तरतूद करण्यात आली आहे. तर वन विभागाकरिता या वर्षी 1 हजार 630 कोटी रुपयांची तरतूद करण्यात आली आहे.
मुंबईतील विविध पर्यटन कामांसाठी 100 कोटी रुपयांची तरतूद
मुंबईतील विविध पर्यटन कामांसाठी या वर्षीच्या अर्थसंकल्पात 100 कोटी रुपयांच्या निधीची तरतूद करण्यात आली आहे.

वरळीत आंतरराष्ट्रीय स्तराचे पर्यटन संकुल
वरळी येथील दुग्धशाळेत आंतरराष्ट्रीय स्तराचे पर्यटन संकुल उभारण्यात येणार असून यासाठी सुमोर एक हजार कोटी रुपयांची तरतूद करण्यात आली आहे. या पर्यटन संकुलामध्ये आंतरराष्ट्रीय दर्जाच्या मत्सालयाचा समावेश असणार आहे.
*पर्यटन व सांस्कृतिक कार्य* विभागासाठी या वर्षासाठी एकूण 1 हजार 400 कोटी रुपयांची तरतूद अर्थसंकल्पात करण्यात आली आहे.

तीर्थक्षेत्र विकासासाठी निधी
नांदेड येथील माहूरगड, बीडमधील परळी वैजनाथ, हिंगोलीतील औंढा नागनाथ, जि.हिंगोली, हिंगोलीतील नर्सी नामदेव, परभणीतील पाथरी, अंबरनाथ येथील प्राचीन शिव मंदिर, मिरज येथील हजरत ख्वाजा शमनामिरा दर्गा या तीर्थक्षेत्रांच्या विकासाकरिता निधी उपलब्ध करुन देण्यात येणार आहे.
राष्ट्रपिता महात्मा गांधी यांच्या 150 वी जयंतीसाठी सन 2020-21 करिता 25 कोटी रुपयांची तरतूद करण्यात आली आहे. तर प्रज्ञासूर्य, बोधीसत्व भारतरत्न महामानव डॉ. बाबासाहेब आंबेडकर यांच्या स्मृतीप्रित्यर्थ लंडन स्कूल ऑफ इकॉनॉमिक्स येथे त्यांच्या नावे अध्यासन सुरु करण्यात येणार आहे.

आरोग्य सेवेचे बळकटीकरण
राज्यातील आरोग्य सेवेचे बळकटीकरण करण्यात येणार आहे. राज्यात 75 नवीन डायलेसिस केंद्रे स्थापन करण्यात येणार आहे. 102 क्रमांकाच्या जुन्या रूग्णवाहिका बदलून यावर्षी नवीन 500 रूग्णवाहिका खरेदी करण्यात येणार आहे. यासाठी 87 कोटी रुपये उपलब्ध करून देण्यात येणार असून यापैकी 25 कोटी रूपयांची तरतूद या वर्षासाठी करण्यात आली आहे.
सार्वजनिक आरोग्य सेवेकरिता 2 हजार 456 कोटी रुपये आणि वैद्यकीय शिक्षणासाठी 950 कोटी रुपयांची तरतूद करण्यात आली आहे. याशिवाय नंदूरबार येथील शासकीय वैद्यकीय महाविद्यालय सन 2020-21 व सातारा, अलिबाग व अमरावती येथील शासकीय वैद्यकीय महाविद्यालये सन 2021-22 या शैक्षणिक वर्षांपासून सुरू करण्याचे नियोजन करण्यात आले आहे.
महात्मा जोतिबा फुले जनआरोग्य योजनेंतर्गत एकंदर 996 उपचार प्रकारांचा समावेश करण्यात आला असून. आता प्राधिकृत रूग्णालयांची संख्या 493 वरून 1000 करण्यात आली आहे. पॅलिएटीव्ह केअरसंबंधी नवीन धोरण निश्चित करण्यात येणार आहे. तर सातारा येथील पाटण येथील ग्रामीण रूग्णालय व भंडारा येथील साकोली येथे उपजिल्हा रूग्णालयाचे 100 खाटांच्या रूग्णालयामध्ये रूपांतर करण्यात येणार आहे.

प्रत्येक तालुक्यात किमान 4 आदर्श शाळा
पुढील 4 वर्षात 500 कोटी बाह्य सहाय्यित अर्थसहाय्याद्वारे प्रत्येक तालुक्यात किमान 4 अशा एकूण 1500 शाळांना आदर्श शाळा म्हणून नावारूपास आणण्यात येणार आहे. रयत शिक्षण संस्थेच्या शतक महोत्सवी वर्षानिमित्त 11 कोटी रूपयांच्या निधीची तरतूद करण्यात आली आहे. क्रीडा विकासासाठी तालुका क्रीडा संकुलाची अनुदान मर्यादा 1 कोटी रुपयांवरून 5 कोटी रुपये तर जिल्हा क्रीडा संकुलासाठी 8 कोटी रुपयांवरून 25 कोटी रुपये आणि विभागीय संकुलाची अनुदान मर्यादा 24 कोटीं रुपयांवरून 50 कोटी रुपये वाढविण्याचे प्रस्तावित करण्यात आले आहे. शिवछत्रपती क्रीडा संकुल म्हाळुंगे-बालेवाडी, पुणे येथे आंतरराष्ट्रीय दर्जाच्या क्रीडा विद्यापीठाची स्थापना करण्यात येणार आहे. शिक्षण विभागासाठी 2 हजार 525 कोटी रुपये तर उच्च व तंत्र शिक्षण विभागासाठी 1 हजार 300 कोटीं रुपयांची तरतूद करण्यात आली आहे.

महाराष्ट्र शिकाऊ उमेदवारी योजना’
राज्यातील किमान दहावी उत्तीर्ण झालेल्यांना रोजगार व स्वयं रोजगाराच्या संधी उपलब्ध करून देण्यासाठी नवीन ‘महाराष्ट्र शिकाऊ उमेदवारी योजना’ कार्यान्वित करण्यात येणार आहे. या योजनेअंतर्गत 5 वर्षात 21 ते 28 वयोगटातील 10 लाख सुशिक्षीत बेरोजगार युवक-युवतींना शिकाऊ उमेदवारी कायदा, 1961 मधील तरतुदीनुसार प्रशिक्षण देण्यात येणार आहे. या योजनेसाठी आगामी 5 वर्षात एकूण 6 हजार कोटीं रुपयांची तरतूद करण्यात आली आहे.

रस्ते विकासासाठी दोन नवीन योजना
रस्ते विकासासाठी दोन नवीन योजना करण्यात आल्या आहेत. ग्रामीण सडक विकास योजनेअंतर्गत येत्या 5 वर्षात 40 हजार किमी रस्त्यांचे बांधकाम करण्यात येणार आहे. तर नागरी सडक योजनेसाठी 1 हजार कोटी रुपयांचा निधी उपलब्ध करुन देण्यात येणार आहे.
*अर्थसंकल्पातील महत्त्वाच्या तरतुदी-*
• कोकण विभागात काजूफळ पिकावर प्रक्रिया करणाऱ्या उद्योगाला चालना देणार.
• अश्वशक्तीच्यावरील यंत्रमागधारकांना प्रती युनिट विजेच्या अनुदानात 75 पैसे वाढ.
• कोकण सागरी महामार्गास तीन वर्षात मूर्त स्वरूप देण्यासाठी 3500 कोटीं रुपयांची तरतूद करण्यात येणार.
• पुणे शहरात बाहेरून येणारी वाहतूक शहराबाहेरून वळविण्यासाठी 170 किमीचा रिंग रोड बांधणार. यासाठी 15 हजार कोटी रूपयांचा खर्च अपेक्षित.
• पुणे, पिंपरी चिंचवड मेट्रोअंतर्गत शिवाजीनगर ते शेवाळेवाडी, मान ते पिरंगुट या नवीन मार्गिका, वनाज ते रामवाडी या मेट्रोचा विस्तार चांदणी चौक-वनाज-रामवाडी-वाघोलीपर्यंत विस्तार. मेट्रोसाठी 1 हजार 657 कोटींची तरतूद.
• वसई-ठाणे-कल्याण जलमार्गावर मिरा-भाईंदर ते डोंबिवली प्रवासी वाहतूक सुरू करण्यास तत्वत: मान्यता.
• महाराष्ट्र राज्य मार्ग परिवहन महामंडळाच्या बस ताफ्यातील जुन्या बस बदलून आरामदायी व सुविधादायक नवीन 1600 बस विकत घेण्यासाठी आणि बस स्थानके अत्याधुनिक करण्यासाठी 401 कोटी रुपयाची तरतूद.
• दिल्ली-मुंबई औद्योगिक कॉरिडॉरच्या धर्तीवर बेंगळुरू-मुंबई आर्थिक कॉरिडॉर अंतर्गत सातारा जिल्ह्यात 4 हजार कोटी खर्चून आंतरराष्ट्रीय दर्जाच्या औद्योगिक वसाहती विकसित करणार.
• राज्यातील सर्व शासकीय औद्योगिक प्रशिक्षण संस्थांच्या दर्जात वाढ करुन आधुनिक कौशल्य प्रशिक्षण केंद्रात रुपांतर करण्यात येणार. यासाठी खाजगी उद्योजकांकडून रुपये 12 हजार कोटींची गुंतवणूक अपेक्षित असून शासनाकडून येत्या काळात 1500 कोटीं रुपयांची गुंतवणूक करण्यात येणार.
• स्थानिकांना रोजगारांसाठी आरक्षण कायदा करण्यात येणार.
• मराठवाडा वॉटरग्रीडसाठी 200 कोटी रुपये निधी प्रस्तावित.
• जल जीवन मिशनसाठी 1 हजार 230 कोटी रुपये निधी प्रस्तावित.
• पाणीपुरवठा व स्वच्छता विभागास 2 हजार 42 कोटी रुपये इतका नियतव्यय प्रस्तावित.
• मराठी भाषेचा विकास, प्रचार व प्रसिद्धीकरिता मुंबई येथे मराठी भाषा भवन बांधण्यात येणार
• वडाळा येथे वस्तू व सेवाकर भवन बांधण्याकरिता 118.16 कोटी रुपये इतका नियतव्यय प्रस्तावित.
• नवी मुंबई येथे महाराष्ट्र भवन बांधण्यात येणार
• न्यायालयीन इमारती व निवासस्थाने बांधण्याकरिता सन 2020-21 करिता 911 कोटी रुपये नियतव्यय प्रस्तावित.
• आमदार स्थानिक निधीमध्ये 2 कोटी रुपयांवरुन 3 कोटी रुपये वाढ.
• जिल्हा वार्षिक योजनेकरिता रुपये 9 हजार 800 कोटी इतका निधी प्रस्तावित मागील वषाच्या तुलनेत रुपये 800 कोटींनी वाढ.
• सार्वजनिक उपक्रमातील कर्मचाऱ्यांना 7 वा वेतन आयोग लागू करण्यात येणार.
• पुणे येथे नोकरी करणाऱ्या मागासवर्गीय महिलांसाठी 1000 निवासी क्षमतेचे वसतिगृह उभारण्यात येणार
• मुंबई व पुणे विद्यापिठात मागासवर्गीय मुला-मुलींसाठी 500 निवासी क्षमतेची वसतिगृहे उभारण्यात येणार
• सामाजिक न्याय व विशेष सहाय्य विभागाकरिता सन 2020-21 करिता रुपये 9 हजार 668 कोटी इतका नियतव्यय प्रस्तावित.
• लोकनेते स्व.गोपीनाथ मुंडे ऊसतोडणी कामगार महामंडळास निधी उपलब्ध करुन देण्यात येणार
• तृतीयपंथीयांचे हक्काचे संरक्षण आणि कल्याणासाठी मंडळ स्थापन करण्यात येणार, या मंडळासाठी 5 कोटी रुपयांची तरतूद.
• आदिवासी विकास विभागासाठी सन 2020-21 करिता 8 हजार 853 कोटी रुपयांची तरतूद
• अल्पसंख्यांक विभागासाठी सन 2020-21 करिता रुपये 550 कोटी रुपयांची तरतूद
• हज यात्रेकरुंच्या सुविधेसाठी ठाणे जिल्ह्यांत मुंब्रा कळवा येथे हज हाऊसचे बांधकाम करण्यात येणार
• इतर मागासवर्ग बहूजन कल्याण विभागासाठी सन 2020-21 करिता 3 हजार कोटी रुपये इतका नियतव्यय प्रस्तावित.
• जिल्हा वार्षिक योजना सन 2020-21 मध्ये रुपये 9800 कोटी.
• जिल्हा वार्षिक योजनेमधील 3 टक्केपर्यंतचा निधी पोलिसांच्या वाहनाकरिता राखीव ठेवण्यात येणार.
• शासकीय शाळा खोल्या दुरुस्ती व अंगणवाडी बांधकामासाठी विविध योजनेमधून निधी उपलब्ध करुन देणार.
• वार्षिक योजना 2020-21 करिता रुपये 1 लक्ष 15 हजार कोटी निधी प्रस्तावित. अनुसूचित जाती उपयोजनेसाठी रुपये 9 हजार 668 कोटी नियतव्यय. आदिवासी विकास उपयोजनेसाठी रुपये 8 हजार 853 कोटी नियतव्यय प्रस्तावित.
अर्थसंकल्पीय भाषणाची ठळक वैशिष्ट्ये : भाग- दोन
• मुद्रांक शुल्क सवलत – मुंबई महानगर प्रदेश विकास प्राधिकरण क्षेत्र आणि पुणे, पिंपरी-चिंचवड व नागपुर या महानगरपालिका क्षेत्रातील दस्त नोंदणीच्यावेळी भराव्या लागणाऱ्या एकंदरीत मुद्रांक शुल्क व इतर निगडीत भारामध्ये पुढील दोन वर्षांच्या कालावधीकरिता 1 टक्के सवलत
• वीज शुल्क सवलत – औद्योगिक वापरावरील वीज शुल्क सध्याच्या 9.3 टक्क्यावरून 7.5 टक्के करण्यात येईल.
• मूल्यवर्धित कराच्या दरात वृध्दी – पेट्रोल व डिझेलच्या विक्रीवर सध्या अस्तित्वात असलेल्या कराव्यतिरिक्त, अतिरिक्त 1 रुपये प्रति लिटर कर वाढ.
‘ हाच माझा देश, ही माझीच माती, येथले आकाशही माझ्याच हाती | आणला मी उद्याचा सूर्य येथे लावती काही करंटे सांजवाती || या कवी सुरेश भट यांच्या कवितेच्या ओळी सादर करुन श्री. पवार यांनी अर्थसंकल्पाचा शेवट केला.

Read more...
Open chat
Powered by