श्री विघ्नहर सहकारी साखर कारखाना निवडणूकीचे शांततेत मतदान

श्री विघ्नहर सहकारी साखर कारखाना निवडणूकीचे शांततेत मतदान

१९,१५४ मतदारांपैकी १०,६५५ मतदारांनी बजावला सरासरी ५५.६२% मतदानाचा हक्क

उद्या सोमवार (दि.१०) श्री.क्षेत्र ओझर येथे मतमोजणीनंतर जाहीर होणार निकाल

सजग वेब टीम जुन्नर 

शिरोली बु. । जुन्नर तालुक्यातील श्री विघ्नहर सहकारी साखर कारखान्याची निवडणूक आज रविवार (दि.९) सकाळी ८ ते सायंकाळी ५ वाजेपर्यंत कालावधीत शांततेत मतदान पार पडले. जुन्नर,शिरोली बु.||., ओतूर, पिंपळवंडी आणि घोडेगाव असे पाच गट तसेच महिला राखीव प्रवर्ग, इतर मागास प्रवर्ग, अनुसूचित जाती जमाती प्रवर्ग आणि भटक्या विमुक्त जाती जमाती प्रवर्ग यासाठी ५५.६२% सभासद मतदारांनी मतदानाचा हक्क बजावला असल्याची माहिती निवडणूक निर्णय अधिकारी स्नेहा जोशी व सहाय्यक निवडणूक अधिकारी श्रीखंडे साो. यांनी दिली

विघ्नहर कारखान्याचे एकूण १९१५४ सभासद आहेत. त्याकरिता जुन्नर, शिरोलीबु.||., नारायणगाव, ओतूर, पिंपळवंडी, बोरी बु.||. आणि मंचर अशी एकूण-७ मतदार केंद्र तयार करण्यात आली होती.

(नारायणगाव मतदान केंद्र येथे विजयी मुद्रा दाखवताना चेअरमन सत्यशिल शेरकर, संतोषनाना खैरे, कुंडलिक गायकवाड, गणेश कवडे व कार्यकर्ते )

जुन्नर गटामध्ये ३०५० पैकी १८३८ (६०.२६%), शिरोली बु.||. गटामध्ये ४३४६ पैकी शिरोली बु. येथे १४०६ ( ६४.४६%) व नारायणगाव येथे १२४५ ( ५७.५०%), ओतूर गटामध्ये ३३८८ पैकी १७०६ (५०.३५% ), पिंपळवंडी गटामध्ये ६१६५ पैकी पिंपळवंडी येथे १८१२ ( ५१.०९% ) व बोरी बु .|| येथे १५७६ ( ६०.१७% ) तर घोडेगाव गटामध्ये २२०५ पैकी १०७२ ( ४८.६१% ) मतदारांनी आपली मतदानाचा हक्क बजावला.

वरील सर्व आकडेवारी पाहता श्री विघ्नहर सहकारी साखर कारखान्याच्या एकूण १९१५४ सभासद मतदारांपैकी १०, ६५५ मतदारांनी मतदान केले असून सरासरी ५५.६२% मतदान झाले आहे. उद्या सोमवार ( दि.१०) श्री क्षेत्र ओझर येथे मतमोजणी झाल्यानंतर निकाल जाहीर केला जाणार असल्याचे निवडणूक कार्यालयाकडून सांगण्यात आले.

या निवडणुकीबाबत बोलताना शिवनेर पॅनलचे प्रमुख सत्यशिल शेरकर म्हणाले की, शेतकरी वर्गाविषयी असलेली तळमळ आणि पारदर्शक कारभारामुळे ही निवडणूक पूर्णतः सभासद मतदारांनी हातामध्ये घेतली होती. त्यामुळे सभासद मतदारांचा विश्वास आणि उस्फूर्तपणे केलेल्या मतदानामुळे शिवनेर पॅनलचे सर्व उमेदवार मोठ्या मताधीक्क्याने विजयी होतील, असा विश्वास त्यांनी यावेळी व्यक्त केला.

Read more...

माझा लाव रे तो व्हिडिओ करु नका – आमदार अतुल बेनके

माझा लाव रे तो व्हिडिओ करु नका – आ.अतुल बेनके

विघ्नहर कारखान्याने पारदर्शक कारभार करुन शेतकरी, सभासद, कामगार यांचे हित जोपासले – चेअरमन सत्यशिल शेरकर

कारखाना प्रयोगशिल, प्रगतीशील असल्याने शेतकर्‍यांचीही प्रगती झाली – कृषिरत्न अनिल मेहेर

२१ – ० असा निकाल देऊन विरोधकांना जागा दाखवा – जि.प.सदस्या आशाताई बुचके

आर्थिक सुबत्तेबरोबर आरोग्य विकासासाठी कारखान्याने प्रयत्न करावे – सरपंच योगेश पाटे

सजग वेब टीम नारायणगाव

नारायणगाव । श्री.विघ्नहर सहकारी साखर कारखाना लि.जुन्नर आंबेगाव संचालक मंडळ निवडणुक २०२० चा शिरोली गटाची उस उत्पादक व सभासदांची सभा शिवनेर पॅनेलचे प्रमुख चेअरमन सत्यशिल शेरकर यांच्या प्रमुख उपस्थित नारायणगाव जयहिंद पॅलेस येथे मोठ्या उत्साहात संपन्न झाली.

या सभेचे प्रास्तविक लोकनियुक्त सरपंच योगेश पाटे यांनी करत विजय शिवनेर पॅनेलचा आहे. विघ्नहर कारखान्याने तालुक्यात आर्थिक सुबत्ता आणली आहेच परंतु तालुक्यातील कॅन्सर आजाराचे प्रमाण पाहता, आर्थिक सुबत्तेबरोबर आरोग्य विकासासाठी कारखान्याने प्रयत्न करावे असे मनोगत व्यक्त केले.

यानिमित्तानं कृषिरत्न अनिल मेहेर म्हणाले की, निवृत्तीशेठ शेरकर यांची अोळख देवमाणुस होती. पुढे सोपानआण्णा नंतर सत्यशिल सक्षमपणे नेतृत्व करतायतं. निवृत्तीशेठ आणि वल्लभशेठ यांनी सोबत काम केलं आज सत्यशिल आणि अतुल सोबत काम करतायतं ही कौतुकाची बाब आहे. विघ्नहर कारखान्याचा नावलौकिक राज्यासह देशात सत्यशिल शेरकर यांनी पोहचवला. तसेच कारखाना प्रयोगशिल, प्रगतीशील असल्याने शेतकर्‍यांचीही प्रगती निश्चित झाली आहे. यांसह विरोधकांच्या प्रश्नांना कृषी जाणकार म्हणुन उत्तरे देत मेहेर यांनी जुन्या आठवणींना उजाळा दिला.

कारखान्याच्या निवडणुका लागल्याने चांगल्या कामासाठी सर्व पक्ष एकत्र आले. आपल्या सर्वांना प्रत्येक गटातुन जास्तीत जास्त मतदान करुन घेण्याची प्रत्येकाची जबाबदारी आहे. मुस्लिम समाजानेही शेठबाबांना साथ दिली आहे. २१ – ० असा निकाल देऊन विरोधकांना जागा दाखवा असे आवाहन जिल्हा परिषद सदस्या आशाताई बुचके यांनी केले.

विघ्नहर कारखान्याने पारदर्शक कारभार करुन शेतकरी, सभासद, कामगार यांचे हित जोपासले आहे. मोफत माती परिक्षण, बायोकंपोस्ट खत ना नफा न तोटा पद्धतीने दिलं जातयं, शेतकर्‍यांना आवश्यक प्रशिक्षण कार्यक्रमातुन मार्गदर्शन केले जातयं. त्यामुळे आज अनेक शेतकरी १०० टनाच्या पुढे ऊस उत्पादन घेतायतं. यासाठी विघ्नहर कारखाना शेतकर्‍यांच्या बांधावर जाऊन समस्या सोडवत आहे. सध्या १३९ कारखान्यांपैकी ६२ बंद पडलेत. ६६ खाजगी आणि ७७ सहकारी कारखाने कार्यरत आहे. कारखाने बंद पडण्यामागे आणि खाजगीकरणासाठी राजकारण कारणीभुत आहे. परंतु आपल्याला कारखाना टिकवायचाय यासाठी आम्ही सर्वपक्षीय नेते शेतकरी हितासाठी एकत्र आलो असे मनोगत चेअरमन सत्यशिल शेरकर यांनी करत सभासदांना कपबशी चिन्हांवर मतदान करुन शिवनेर पॅनेलच्या सर्व उमेदवारांना निवडुन देण्याचे आवाहन केले.

विघ्नहर कारखान्याने शेतकर्‍यांचं समाधान करण्याचं काम केलयं. यानिमित्तानं आमदार अतुल बेनके यांनी कपबशी चिन्हाला मतदान करा असे आवाहन करत विधानसभेला असलेलं आशाताईंचं हे चिन्ह होतं त्या विसणार नाहीत. पण आता मी सांगतोय शिवनेर पॅनेलच्या कपबशील मतदान करा पण माझा लाव रे तो व्हिडिओ बनवु नका असे सांगताच सभेत एकच हशा पिकला. त्याचबरोबर चीन दौरा व कोरोना व्हायरस वरुन माजी आमदारांना बेनके यांनी नाव न घेता कोपरखळी मारली. तसेच धरणातल्या मृतसाठ्याला हात लावु न देण्याचा निर्णय आम्ही केलाय. त्यामुळे जुन्नरमधील शेतकर्‍यांना पाण्याची कमतरता पडु देणार नाही. रोजगार निर्मितीसाठी यशवंतराव चव्हाण स्मारक प्रकल्प होणार आहे. तसेच शिवजयंतीला मुख्यमंत्री उद्धव ठाकरे व उपमुख्यमंत्री अजित पवार जुन्नर तालुक्यासाठी महत्वाची घोषणा करणार असल्याचे आमदार बेनके यांनी सांगितले. यावेळी गुलाब नेहरकर यांनीही मनोगत व्यक्त केेले

या सभेला आमदार अतुल बेनके, चेअरमन सत्यशिल शेरकर, व्हाईस चेअरमन अशोक घोलप, बाळासाहेब पाटे, जि.प.सदस्य आशाताई बुचके, गणपत कोकणे, अनिलतात्या मेहेर, रमेश भुजबळ, एम.डी.भुजबळ, अशोक पाटे, शरद चौधरी, एकनाथ शेटे, संजय पानसरे, सुजित खैरे, संतोष दांगट, सचिन वारळे, संतोष वाजगे, विलास पाटे, यांसह शेतकरी, सभासद, विविध पक्षाचे नेते, पदाधिकारी, आजी माजी संचालक मोठ्या संख्येने उपस्थित होते.

या कार्यक्रमाचे प्रास्तविक लोकनियुक्त सरपंच योगेश पाटे यांनी केले. सुत्रसंचालन आशिष माळवदकर यांनी केले तर आभार शिरोली गटाचे उमेदवार संतोष खैरे यांनी मानले.

Read more...

संपूर्ण जगात जिथे जिथे मराठी माणूस आहे तिथे तिथे ही महाआरती पोहोचणार – वरिष्ठ पोलीस निरीक्षक विश्वासराजे थोरात

महाराष्ट्र पोलीस दलातील अधिकारी व कर्मचारी यांनी बनविलेली छत्रपती शिवरायांची पहिली भव्य दिव्य आरती लवकरच होणार प्रसिद्ध
संपूर्ण जगात जिथे जिथे मराठी माणूस आहे तिथे तिथे ही महाआरती पोहोचणार – वरिष्ठ पोलीस निरीक्षक विश्वासराजे थोरात
सजग वेब टीम पुणे 
पुणे । क्षितिज प्रोडक्शन, पुणे” निर्मित गीतकार विश्वासराजे थोरात यांनी लिहिलेल्या महाराष्ट्राचे आराध्य दैवत छ.शिवाजी महाराजांच्या भव्य दिव्य महाआरतीचे व्हिडिओ चित्रीकरण नुकतेच पुणे येथे चतुःशृंगी मंदिराच्या प्रांगणात मोठ्या दिमाखात पार पडले असून लवकरच ही आरती प्रसिद्ध होणार आहे.या चित्रीकरणाचे उद्घाटन चतुःशृंगी विभागाचे सहाय्यक पोलीस आयुक्त लक्ष्मण बोराटे,सांगली जि.प.माजी अध्यक्ष आनंद डावरे यांचे हस्ते चतुःशृंगी देवी व महाराजांच्या पुतळ्यास श्रीफळ वाढवून करण्यात आले.या प्रसंगी त्यांनी विश्वासराजे थोरात यांचे काव्य लेखनाचे कौतुक करून आरतीच्या उपक्रमात सहभागी असलेल्या महाराष्ट्र पोलीस दलातील सर्व अधिकारी आणि कर्मचारी यांना शुभेच्छा दिल्या.
या प्रसंगी आपल्या भावना व्यक्त करताना या महा आरतीचे गीतकार,वरिष्ठ पोलीस निरीक्षक विश्वासराजे थोरात यांनी संपूर्ण जगात जिथे जिथे मराठी माणूस आहे,तिथपर्यंत शिवरायांची ही महाआरती पोहचेल,असे नमूद करून या आरती बरोबरच आपण लिहिलेले “गणरायाला साकडे” हे गीत आणि ज्ञानेश्वर माऊलींवरील पालखी सोहळा अभंग ही आगामी गीतेही “क्षितिज प्रोडक्शन” ला निर्मितीसाठी विना मोबदला दिली असल्याचे जाहीर केले.त्यांनी यावेळी तिन्ही गीतांचे लेखनाचे रोमहर्षक प्रसंग सांगताच टाळ्यांचा एकच कडकडाट झाला.
यावेळी “क्षितिज प्रोडक्शन” च्या वतीने निर्माती सौ.कल्पना विश्वासराजे थोरात यांचे हस्ते मान्यवरांचे सत्कार करण्यात आले. त्या म्हणाल्या की, “माझे पती यांनी त्यांच्या तिन्ही गीतांचे निर्मितीचे कायदेशीर सर्वाधिकार मला दिले असून शिवरायांची पहिली भव्य दिव्य आरती मी भैरवनाथ पतसंस्थेचे कर्ज काढून शिवरायांच्या चरणी अर्पण करीत आहे”या आरती साठी महाराष्ट्र पोलीस दलातील अधिकारी व कर्मचारी यांनी विना मोबदला अहोरात्र कष्ट घेतले आहेत. आरतीचे गायन महिला पोलिस पूजा पारखी जाधव, मुंबई, पो.शि.सागर घोरपडे, (पुणे शहर,) पो.ना.संघपाल तायडे,जळगाव यांनी केले असून उद्घोषणा सहा. पो.निरी.प्रवीण फणसे,मुंबई यांनी केली आहे. तुतारी वादन हनुमान नेटके, पेठ, मंचर यांनी केले आहे. आरतीची सुरुवात “क्षितिज प्रोडक्शन” चे क्षितिज थोरात यांनी शंख वाजवून केली.

या महाआरतीचे व्हिडिओ चित्रीकरणा मध्ये पोलीस निरीक्षक भास्कर जाधव, पुणे शहर, महिला पोलिस उपनिरीक्षक पल्लवी जाधव, जालना, पो.शि.सागर घोरपडे, पुणे शहर, तसेच गीतकार विश्वासराजे थोरात, यांनी अभिनय केला आहे.उद्घोषणा प्रसिद्ध अभिनेते अमोल मोरे यांनी केली आहे.
 या महा आरतीचे संगीत दिग्दर्शक पंचम स्टुडिओचे श्री. अद्वैत पटवर्धन हे असून व्हिडिओ दिग्दर्शक सुनिल वाईकर आणि जितेंद्र वाईकर हे आहेत.ही महाआरती बनविण्यासाठी महाराष्ट्र पोलीस दलातील वरिष्ठ पोलीस निरीक्षक मोहन जाधव, पुणे,पो. शि.संदिप सूर्यवंशी,पुणे शहर,पो.शि.योगेश गायिके, जालना, पो. ना.राजेश राजगुरे, बुलढाणा, पो.शि.दत्तात्रय गुंजभरे, पो.शि.सोपान निगल, महिला पो.शि.स्नेहलता ढवळे, तसेच प्रसिद्ध उदयोन्मुख गायक संतोष लगड, यांनी मोलाचे योगदान दिले आहे.
याशिवाय आरती मध्ये प्रसिद्ध अभिनेत्री सौ.श्वेता कामत, सौ. पल्लवी अनिरुद्ध पाटील, ओंकार विनायक थोरात, क्षितिज थोरात, निर्माती सौ.कल्पना थोरात,श्री. धनंजय कांबळे, ॲड.प्रताप मुळीक,आगतराव पवार,बाल कलाकार सोहम कैलास औटी, अथर्व मुळीक यांनी अभिनय केला आहे.आरती शूटिंगचे प्रोडक्शन मॅनेजर नितीन जाधव हे असून कॅमेरामन जितू आचरेकर, मुंबई, छायाचित्रकार अविनाश माने, नृत्य दिग्दर्शक किशोर दळवी,केशभूषा निता नागवंशी,वेशभूषा संतोष जगताप तर रंगभूषा नवीन यांनी केली आहे.अक्यूरेट सेक्युरिटीचे  विजय वारुळकर,पिडीसी बँकेचे मोहन पवार,हरिभाऊ औटी, नारायणगाव,माजी सैनिक अशोक पाटील, सिंहगड इन्स्टिट्यूटचे बशीर काझी व चेतन गेगजे,शितल रेणूसे, सकपाळ मॅडम,हरीश हळदे, गोखलेनगर यांनी आपला सहभाग नोंदविला. या महान व अजरामर आरतीसाठी श्री.चतुःशृंगी मंदिर ट्रस्टचे अध्यक्ष देवेंद्र अनगळ यांनी जागा उपलब्ध करून दिली. देशातील सर्वात मोठे ढोल ताशा पथक शिवगर्जना प्रतिष्ठान, (अध्यक्ष अजुभाऊ साळुंके) पुणे यांनी त्यांची अदाकारी पेश केली. तर वाघजई मित्रमंडळ, पुणेचे अध्यक्ष निलेश पवार यांनी त्यांचेकडील छ. शिवरायांचा सगळ्यात मोठा पुतळा उपलब्ध करून दिला.चतुःशृंगी पोलीस स्टेशनचे वरिष्ठ पो.निरी.अनिल शेवाळे यांनी सहकार्य केले.
Read more...

आज अोझर येथे शिवनेर पॅनेलच्या प्रचाराचा शुभारंभ व भव्य जाहिर सभेचे आयोजन

शिवनेर पॅनेलच्या प्रचाराचा शुभारंभ व भव्य जाहिर सभेचे आयोजन

२ फेब्रुवारी रोजी सकाळी ९ वा.श्री.क्षेत्र अोझर येथे होणार प्रचाराचा शभारंभ व भव्य सभा

सजग वेब टीम जुन्नर

शिरोली बु.। श्री.विघ्नहर सहकारी साखर कारखाना लिमिटेड जुन्नर आंबेगावच्या संचालक मंडळाचा २०२० च्या पंचवार्षिक निवडणुक मतदान 9 फेब्रुवारी रोजी होणार असुन निवडणूक निकाल 10 फेब्रुवारी रोजी जाहीर होणार आहे.

या निवडणुकीच्या पार्श्वभूमीवर विद्यमान चेअरमन सत्यशिल शेरकर यांच्या कुशल नेतृत्वात शेतकर्‍यांच्या हितासाठी सातत्याने कार्यरत असणार्‍या शिवनेर पॅनेलच्या प्राचाराचा शुभारंभ दि.२ फेब्रुवारी रोजी सकाळी ९ वा. अोझर येथुन होणार असुन यानिमित्ताने भव्य जाहीर सभेचे आयोजनही करण्यात आले आहे.

या प्रचार शुभारंभ कार्यक्रम व जाहिर शिवनेर पॅनेलचे सर्व उमेदवारांसह सभेला जुन्नर आंबेगाव तालुक्यातील विविध पक्षाचे नेते व कारखान्याचे सभासद हजर राहणार असल्याची माहिती चेअरमन सत्यशिल शेरकर यांनी सजग टाईम्सशी बोलताना दिली.

Read more...

आमदार बेनके यांनी घेतला चिल्हेवाडी पाईपलाईन प्रकल्पाचा आढावा

आमदार बेनके यांनी घेतला चिल्हेवाडी पाईपलाईन प्रकल्पाचा आढावा

सजग वेब टिम, जुन्नर

नारायणगाव दि.२० | जुन्नर तालुक्याच्या उत्तर पूर्व भागातील कृषी सिंचनाच्या दृष्टीने महत्वाचा प्रकल्प म्हणजे चिल्हेवाडी पाईपलाईन प्रकल्प. आमदार अतुल बेनके यांनी आपल्या निवडणूक जाहीरनाम्यात हा प्रकल्प पूर्ण करू आणि तालुक्याच्या उत्तर पूर्व भागात शेतकऱ्यांना पाण्याच्या प्रश्नी दिलासा देऊ असा शब्द निवडणुकीत दिला होता.

याचपार्श्वभूमीवर या चिल्हेवाडी धरण बंदपाईपलाईन प्रकल्पाचा बेनके यांनी अधिकाऱ्यांकडून आढावा घेतला.

चिल्हेवाडी पाचघरचा प्रकल्प हा माजी आमदार वल्लभ बेनके यांचा ड्रीम प्रोजेक्ट होता, हा प्रकल्प आपण प्राधान्याने पूर्ण करणार आणि लाभ क्षेत्रातील शेतकऱ्यांच्या शेतात थेट पाणी पोहचवणार असे बेनके यांनी यावेळी बोलताना सांगितले.

सदर पाईपलाईनच्या कामाच्या संबंधित सर्व वरिष्ठ अधिकाऱ्यांसमवेत तसेच जि. प. सदस्य पांडुरंग पवार साहेब यांच्यासह बैठक घेऊन बेनके यांनी या प्रकल्पाचा आढावा घेतला.

या बैठकीत आमदार बेनके यांनी प्रकल्पाची सखोल माहिती घेतली. कामाची सध्याची स्थिती, धरणालगतचे पाण्याचे पाईपलाईन मधून पाण्याचा होणारा विसर्ग व शेवटच्या टोकापर्यंत मिळणारे पाणी, एकूण वितरिका, लाभक्षेत्रातील गावांसाठी मिळणारं पाणी, आवर्तनाचा कालावधी, भिजणारं लाभक्षेत्र, प्रलंबित काम पूर्ण होण्यासाठी लागणारा कालावधी या सर्वच बाबींचा अाढावा काल आमदार बेनके यांनी अधिकाऱ्यांकडून घेतला.

नारायणगाव याठिकाणी झालेल्या या बैठकीत अशोकनाना घोडके, प्रदीपजी पिंगट, विजय कुऱ्हाडे, जयरामशेठ भुजबळ, रानमळा गावचे माजी सरपंच सुरेश तिकोणे , मयुर मनोहर गुंजाळ, पंढरी गुंजाळ माजी (शाखा अभियंता जलसिंचन) आदी मान्यवर उपस्थित होते.

Read more...

कर्जत-भीमाशंकर राष्ट्रीय महामार्गास केंद्राचा हिरवा कंदिल : खा.डॉ.अमोल कोल्हे

कर्जत-भीमाशंकर राष्ट्रीय महामार्गास केंद्राचा हिरवा कंदिल : खा.डॉ.अमोल कोल्हे

सजग वेब टिम, पुणे

पुणे दि.१९ | संसदीय हिवाळी अधिवेशनात शिरूर लोकसभेचे खासदार डॉ.अमोल कोल्हे यांनी केंद्रीय भ्रूपुष्ट मंत्री मा.नितीनजी गडकरी यांची भेट घेऊन तीर्थक्षेत्र भीमाशंकरच्या सर्वांगीण विकासासाठी भीमाशंकरला जाणारा मार्ग हा राष्ट्रीय दर्जाचा व्हावा असे निवेदन दिले होते.
तीर्थक्षेत्र भीमाशंकर हे भाविकांचे श्रद्धास्थान असून या ठिकाणी येण्यासाठी माहामार्गची नितांत आवश्यकता आहे , राष्ट्रीय महामार्ग घोषित झाल्यामुळे या ठिकाणीच्या पर्यटनास निश्चितच चालना मिळेल , पर्यटनवृद्धीमुळे या भागातील रोजगाराच्या संधी उपलब्ध होतील. सोबतच मुंबईला जाण्यासाठी वेळेची बचत होईल, या राज्यमार्गाला राष्ट्रीय महामार्गचा दर्जा मिळवा अशी मागणी केली होती.
खा.डॉ अमोल कोल्हे यांनी केलेल्या मागणीला केंद्रिय मंत्रालयाने हिरवा कंदील दाखवला आहे कर्जत-भीमाशंकर मार्ग हा राष्ट्रीय महामार्ग म्हणुन घोषित करण्यासाठी व तसेच या संबधी राज्यमार्ग मंत्रालय सचिव यांना कळविले आहे , महामार्गाच्या मजबुतीकरणासाठी लवकरच कार्यवाही करण्यात येईल असे लेखी पत्र डॉ कोल्हे यांच्या कार्यालयास प्राप्त झाले आहे.

Read more...

पुणे- नाशिक महामार्ग बायपाससाठी एकूण २१६ कोटी रुपये मंजूर : खा.डॉ अमोल कोल्हे

पुणे- नाशिक महामार्ग बायपाससाठी एकूण २१६ कोटी रुपये मंजूर : खा.डॉ अमोल कोल्हे

सजग वेब टिम, पुणे

पुणे दि.१८| शिरूर लोकसभा मतदारसंघातील विकास कामे वेगाने मार्गी लावण्यासाठी या विभागाचे खा.डॉ.अमोल कोल्हे प्रयत्नशील आहेत असं दिसतं आहे. कोल्हे यांनी आपल्या पहिल्याच अधिवेशनात आपल्या भाषणात लोकसभा मतदारसंघातील वाहतूक कोंडीच्या समस्येवर आवाज उठवला होता, त्यानंतर पुन्हा हिवाळी अधिवेशनात तोच प्रश्न उपस्थित केला. भृपुष्टमंत्री नितीन गडकरी यांची भेट घेऊन पुणे -नाशिक महामार्गावरील वाहतूक कोंडी संदर्भात लेखी निवेदनही त्यांनी दिले होते. याचेच फलित म्हणून खेड-सिन्नर महामार्गात सर्वात जास्त वाहतूक कोंडी होणाऱ्या खेड बायपास , मंचर-एकलहरे,पेठ याठिकाणी बायपास करण्यासाठी २१६ कोटी रुपयांची निविदा प्रक्रिया सुरू झाली आहे.
यामध्ये एकूण १४.१३७ किमी
प्रस्तावित खेड बायपास (किमी ४२ ते किमी ४६.९८) , पेठ (किमी ५६.१००ते ५६७८०)मंचर-एकलहरे बायपास (किमी ६०.१०० ते ६८.५७६) साठी निविदा प्रक्रिया सुरू झाली असून लवकरच पुणे-नाशिक महामार्ग लवकरच वाहतुक कोंडीपासून मुक्त होईल असा विश्वास खासदार डॉ अमोल कोल्हे यांनी व्यक्त केला.
सदर बायपास हा ४ पदरी असेल यातील फेज-१ साठी खेड-सिन्नर महामार्ग पूर्ण करण्यासाठी २ वर्षाच्या कालावधीमध्ये पूर्ण होईल , लवकरात लवकर निविदा प्रक्रिया पूर्ण करण्यासाठीच्या सूचना राष्ट्रीय महामार्गाच्या अधिकाऱ्यांना दिल्या आहेत.

Read more...

शिरुर लोकसभेच्या विकासासाठी लवकरच मेट्रो लोणी काळभोर पर्यंत : खा.डॉ अमोल कोल्हे

शिरुर लोकसभेच्या विकासासाठी लवकरच मेट्रो लोणी काळभोर पर्यंत : खा. डॉ अमोल कोल्हे

सजग वेब टिम, पुणे

पुणे दि.१७ | स्वारगेट ते हडपसर येथील हडपसर ऐवजी लोणीकाळभोर पर्यंत मेट्रो मार्ग वाढविण्याचा निर्णय शुक्रवारी झालेल्या बैठकीत घेण्यात आला. जुना आराखडा हा स्वारगेट ते हडपसर होता तो बदलून पुढील अहवाल सादर करण्याचा सूचना राज्याचे उपमुख्यमंत्री ना अजितदादा पवार , खासदार डॉ अमोल कोल्हे यांनी ‘पीएमारडीए’ च्या अधिकाऱ्यांना केल्या.
शुक्रवारी पुणे येथे ‘पीएमआरडीएच्या’ च्या सर्व प्रकल्पांची आढावा बैठक घेतली, लोकसभा मतदारसंघात चालू असलेली विविधविकास कामांचा याठिकाणी आढावा घेण्यात आला.

स्वारगेट ते हडपसर येथील हडपसर ऐवजी लोणीकाळभोर पर्यंत मेट्रो मार्ग वाढविण्याचा निर्णय शुक्रवारी झालेल्या बैठकीत घेण्यात आला. जुना आराखडा हा स्वारगेट ते हडपसर होता तो बदलून पुढील अहवाल सादर करण्याचा सूचना खासदार डॉ अमोल कोल्हे यांनी ‘पीएमारडीए’ च्या अधिकाऱ्यांना केल्या.
ना अजितदादा पवार ,डॉ कोल्हे यांनी शुक्रवारी पुणे येथे ‘पीएमआरडीएच्या’ च्या सर्व प्रकल्पांची आढावा बैठक घेतली, लोकसभा मतदारसंघात चालू असलेली विविधविकास कामे , नव्याने सुरू करावयाची कामे याचा आढावा घेण्यात आला.

हडपसर भागात होणारे ट्राफिक समस्या दूर करण्यासाठी प्रस्तावित मेट्रो मार्गामुळे ट्राफिक निश्चितच कमी होईल व शिरूर लोकसभेचा विकास होण्यासाठी महत्वाचा टप्पा ठरेल . यावेळी राज्याचे उपमुख्यमंत्री मा.ना अजितदादा पवार , खासदार डॉ आमोल कोल्हे , हडपसरचे आमदार श्री चेतन तुपे , खेडचे आमदार श्री दिलीप मोहिते पाटील,महानगर आयुक्त श्री विक्रम कुमार, महामेट्रोचे व्यवस्थापकीय संचालक श्री ब्रिजेश दिक्षित व अधिकारी वर्ग उपस्थित होता .

Read more...

सार्वजनिक संपत्तीचे नुकसान करू नका राज्यपाल भगतसिंह कोश्यारी यांचे आवाहन

सार्वजनिक संपत्तीचे नुकसान करू नका राज्यपाल भगतसिंह कोश्यारी यांचे आवाहन

९ वा राष्ट्रधर्मपूजक दादाराव कराड राज्यस्तरीय पुरस्काराने नवरत्नांचा सन्मान

डॉ.संदीप मनोहर डोळे यांचा आरोग्यरत्न पुरस्काराने सन्मान

सजग वेब टिम, पुणे

पुणे | “ सार्वजनिक संपत्तीचे नुकसान होवू न देता शांततेच्या मार्गाने आंदोलन होणे गरजेचे असून हे शिक्षण विद्याथ्यार्ंना विद्यापीठामधून देणे गरजेचे आहे. जेव्हा आम्ही एकदुसर्‍यांची गोष्ट मान्य करू, तेव्हाच या विश्‍वात शांतता निर्माण होईल,”असे विचार महाराष्ट्रचे राज्यपाल महामहिम भगत सिंह कोश्यारी यांनी मांडले.

एमआयटी वर्ल्ड पीस युनिव्हर्सिटी, पुणे,विश्‍वशांती केंद्र (आळंदी), माईर्स एमआयटी शिक्षण संस्था समूह, पुणे व भारत अस्मिता फाउंडेशन, पुणे यांच्यातर्फे आयोजित करण्यात आलेल्या ९ व्या राष्ट्रधर्मपूजक दादाराव कराड राज्यस्तरीय पुरस्काराच्या प्रदान समारंभ प्रसंगी प्रमुख पाहुणे म्हणून ते बोलत होते. पुण्याचे महापौर मुरलीधर मोहळ हे सन्माननीय पाहुणे म्हणून उपस्थित होते. अध्यक्षस्थानी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ.विश्‍वनाथ दा. कराड हे होते.

या प्रसंगी सुप्रसिद्ध संगणक तज्ञ पद्मभूषण डॉ. विजय भटकर, एमआयटी वर्ल्ड पीस युनिव्हिर्सिटीचे कार्याध्यक्ष राहुल विश्‍वनाथ कराड, एमआयटी आर्ट डिझाइन अ‍ॅण्ड टेक्नॉलाजी विद्यापीठाचे कार्याध्यक्ष प्रा.डॉ.मंगेश तु. कराड आणि एमआयटी डब्ल्यूपीयूचे कुलगुरू डॉ. एन.टी.राव हे उपस्थित होते.
यावेळी कृषीरत्न हा पुरस्कार विष्णुपंत केरू गायखे (रा.पळसे, ता.जि.नाशिक), समाजरत्न कुशावर्ता चंद्रशेखर बेळे (मु.पो.ता. देवणी, जि. लातूर), आरोग्यरत्न डॉ.संदीप मनोहर डोळे (मु.पो.नारायणगांव, ता.जुन्नर, जि.पुणे), शिक्षणरत्न सुधीर बाळासाहेब खाडे (नळदुर्ग,ता. तुळजापूर, जि.उस्मानाबाद), क्रीडारत्न ऋचा राहुल धोपेश्‍वर (पुणे), ग्रामरत्न पुरूषोत्तम अंबादास घोगरे (खिरगव्हाण समशेरपूर, जि. अमरावती), बचतगटरत्न पुजा नितीन खडसे (दोंडाईचे, ता. सिंदखेड, जि. धुळे), जनजागरण रत्न जयप्रकाश आसाराम दगडे (लातूर) व अध्यातरत्न ह.भ.प. सुधाकर महाराज इंगळे (मु.पो. राजेश कोठे नगर, सोलापूर) यांना प्रदान करण्यात आले. शाल, श्रीफळ, सन्मानपत्र, स्मृती चिन्ह, संत श्री ज्ञानेश्‍वर माऊलीची प्रतिमा व प्रत्येकी रू.११,००० रोख असे या पुरस्काराचे स्वरूप होते. या वेळेस ‘राष्ट्रधर्मपूजक दादाराव कराड नवरत्न परिचय’ पुस्तकाचे लोकार्पण मान्यवरांच्या हस्ते झाले.

राज्यपाल भगत सिंह कोश्यारी म्हणाले,“ फीट इंडियासाठी सर्वांना प्रयत्न करणे गरजेचे आहे. आज समाजातील मत भिन्नतेमुळे शांती निर्माण होऊ शकत नाही. त्यामुळे विद्यार्थ्यांना असे शिक्षण देणे गरजेचे आहे, की ज्यामुळे सरकारी संपत्तीचे नुकसान होणार नाही. विश्‍व शांतीसाठी सर्वप्रथम आत्मज्ञान होणे गरजेचे आहे. समाज एकत्रित आणण्यासाठी या देशात गणेशोत्सवाची सुरूवात झाली होती. पण, आज याची स्थिती वेगळी झाली आहे. या वर्ल्ड पीस युनिव्हर्सिटीने जे नऊरत्न शोधले त्यामुळे नक्कीच येथील विद्यार्थी हा नवरत्नसारखा बनेल.”

मुरलीधर मोहळ म्हणाले,“ शिक्षण व संस्कृतीची पार्श्‍वभूमी लाभलेल्या या पुण्यनगरीत डॉ. कराड यांनी शून्यातून शिक्षणाचे काम सुरू केले आहे. ही संस्था सामाजमन व सामाजिक बांधिलकी ओळखते. या पुरस्कारचा मुख्य उद्देश हाच आहे की समाजात चांगले कार्य घडत रहावे. दादाराव कराड यांच्या विचारातून व मार्गदर्शनातून समाजात लोक चांगले कार्य करतील.”

प्रा.डॉ.विश्‍वनाथ दा. कराड म्हणाले,“ ही संस्था स्वामी विवेकानंद यांच्या तत्वज्ञानावर कार्य करीत आहे. स्वातंत्रसेनेच्या रूपाने कार्य करणारे आमचे वडील खर्‍या अर्थाने ते राष्ट्रधर्मपूजक होते. या देशाला ‘वसुधैव कुटुंबकम’ची वैश्‍विक परंपरा आहे. भगवदगीता व ज्ञानेश्‍वरी हे धार्मिक ग्रंथ नसून ते जीवन ग्रंथ आहे. भारतीय संस्कृतीचे छोटे दर्शन येथे होत आहे. त्याग आणि समर्पणाचे येथे दर्शन घडले आहे. आपल्यासारख्या लोकांच्या कार्यातून भारत हा २१व्या शतकात विश्‍वगुरू म्हणून उदयास येईल.

डॉ. विजय भटकर म्हणाले,“ विश्‍वशांती व संस्कार देणारे हे विद्यापीठ पुढील काळात संस्कार देणारे पीठ बनेल. १३५ कोटीच्या लोकसंख्येच्या या देशातील गावा गावापर्यंत चांगले कार्य पोहचविण्याचे कार्य या विद्यापीठातून होत राहील.”
पुरस्काराला उत्तर देताना जयप्रकाश दगडे म्हणाले,“ मनापासून ऋण व्यक्त करतो. ज्यांचा येथे सत्कार होत आहे ते सर्व ग्रामीण भागातील हिरो आहेत. त्यांनी केलेल्या कामाचा आज खर्‍या अर्थाने गौरव झाला आहे. तळागळात काम करणार्‍या व्यक्तींचा शोध एमआयटीने पूर्ण केला. जगाला सध्या पर्यावरणाचा धोका आहे त्या दृष्टीने कार्य करावे अशी आशा त्यांनी व्यक्त केली.”
राहुल विश्‍वनाथ कराड यांनी आपल्या प्रास्ताविकात सांगितले की, आम्ही समाजातील उत्तम कार्य करणारे व्यक्ती ज्यांचे नाव अद्याप जनतेपर्यंत पोहचले नाही अशा व्यक्तिंचा येथे गौरव केला जात आहे. यांचे उदाहरण तरूण पिढीसमोर आदर्श ठेवण्याचा आमचा प्रयत्न आहे.

प्रा. गौतम बापट यांनी सूत्रसंचालन केले. प्रा.डॉ. मंगेश तु. कराड यांनी आभार मानले.

Read more...

सत्यशील शेरकर यांना सहकारातील सामाजिक कार्यकर्ता पुरस्कार प्रदान

शेरकर यांना सहकारातील सामाजिक कार्यकर्ता पुरस्कार प्रदान

सजग वेब टिम, जुन्नर

संगमनेर | दंडकारण्य अभियानाचे प्रणेते सहकारमहर्षी भाऊसाहेब थोरात व कृषी औद्योगिक क्रांतीचे प्रणेते डॉ.अण्णासाहेब शिंदे यांच्या संयुक्त जयंती निमित्त आज रविवार, दि.१२ रोजी मालपाणी लॉन्स, संगमनेर येथे प्रेरणादिन पुरस्कार व सहकारातील सामाजिक कार्यकर्ता पुरस्कार वितरण सोहळ्याचे आयोजन करण्यात आले होते. या वर्षीचा ‘स्वातंत्रसैनिक भाऊसाहेब थोरात स्मृती पुरस्कार’ एबीपी माझा चे मुख्य संपादक राजीव खांडेकर यांना, तर कृषी शिक्षण व संशोधन क्षेत्रात उल्लेखनीय कार्याबद्दल ‘डॉ अण्णासाहेब शिंदे स्मृती पुरस्कार’ पर्यावरण तज्ञ डॉ गिरीश गांधी यांना प्रदान करण्यात आला.

तसेच थोरात सेवाभावी संस्थेचा ‘सहकारातील सामाजिक कार्यकर्ता पुरस्कार’ शिरोली बु| येथील श्री विघ्नहर सह. साखर कारखान्याचे चेअरमन सत्यशिल शेरकर व त्यांच्या सुविद्य पत्नी योगिता शेरकर यांना राजस्थानचे उपमुख्यमंत्री सचिन पायलट, महाराष्ट्र विधानसभेचे अध्यक्ष नाना पटोले यांच्या हस्ते व महसूलमंत्री बाळासाहेब थोरात यांच्या अध्यक्षतेखाली व आमदार डॉ.सुधीर तांबे यांच्या प्रमुख उपस्थितीत पुरस्कार प्रदान करण्यात आला. ह्यावेळी शेरकर यांच्या मातोश्री सुमित्राताई शेरकर, थोरात कारखान्याचे चेअरमन माधवराव कानडे तसेच विविध क्षेत्रातील मान्यवर व दादांचा मित्र परिवार मोठ्या संख्येने उपस्थित होता.

सत्यशिल शेरकर यांचे कमी वयात सहकार क्षेत्रात पदार्पण, विघ्नहर साखर कारखान्याच्या माध्यमातून सभासदांच्या ऊसाला सर्वाधिक भाव, कारखान्याची मागील निवडणूक बिनविरोध,१८ मेगावॉटचा वीज प्रकल्प तसेच विविध सहकारी संस्थाचा मुख्य पदभार स्विकारून त्या ठिकाणी योग्य निर्णय आणि उत्तम कामगिरी व याच बरोबर ही सर्व जबाबदारी पेलत असताना त्यांच्या पत्नी योगिता शेरकर यांची मिळालेली साथ व महिला वर्गासाठी त्यांनी दिलेले योगदान अशा आदी निकषांवर निवड समितीने निवड केली होती. ५१ हजार रुपये व सन्मानचिन्ह असे या पुरस्काराचे स्वरूप आहे.

शेरकर यांच्या नेतृत्वाखाली विघ्नहर कारखान्याला देश व राज्य पातळीवरील पुरस्कार मिळाले आहेत तसेच भारतीय शुगर संस्थेचा देश पातळीवरील ‘भारतीय युथ आयकॉन ऑफ शुगर इंडस्ट्रीज’ हा मानाचा पुरस्कार मिळालेला आहे. आजच्या राज्यस्तरीय ‘सहकारातील सामाजिक कार्यकर्ता’ पुरस्काराने जुन्नर तालुक्याच्या शिरपेचात अजून एक मानाचा तुरा रोवला गेला आहे असे दिसून येते.

Read more...
Open chat
Powered by