सोशल मीडियावर आमदार बेनके यांची बदनामी केल्या प्रकरणी गुन्हा दाखल

सोशल मीडियावर आमदार बेनके यांची बदनामी केल्या प्रकरणी गुन्हा दाखल

सजग वेब टीम, जुन्नर

आळेफाटा | आमदार अतुल बेनके यांचे विषयी सोशल मिडीयावर कोरोना चाचणी व राजकिय द्वेषातून बदनामीकारक मजकूर प्रसिद्ध केल्याबद्दल माजी आमदार शरद सोनवणे यांचे समर्थक व कार्यकर्ते सुशांत दरेकर यांच्यावर आळेफाटा पोलीस स्टेशन याठिकाणी गुन्हा नोंद करण्यात आला आहे अशी माहिती राष्ट्रवादी काँग्रेसचे सोशल मीडिया विभागाचे पदाधिकारी विजय कुऱ्हाडे यांनी दिली आहे.

विद्यमान लोकप्रतिनिधींच्या वैयक्तिक आरोग्य परिस्थितीवर भाष्य करून बेनके परिवार व कार्यकर्ते यांच्या भावना दुखावल्याने दरेकर विरोधात आळेफाटा पोलिसांकडून स्टेशन येथे भा. द. वि. कलम 501, 504, 505(1)(ब) नुसार गुन्हा दाखल करण्यात आला आहे.

या प्रकरणी आमदार बेनके समर्थक ठिकठिकाणी गुन्हे दाखल करणार असल्याची माहिती राष्ट्रवादी काँग्रेसचे सोशल मीडिया विभागाचे पदाधिकारी विजय कुऱ्हाडे यांनी दिली आहे.

अनेक कार्यकर्त्यांनी स्वत:हून नजीकच्या पोलीस स्टेशनला जावून तक्रार देण्यासंबंधीची भूमिका घेतली असून, आमदारांविषयी केलेली बदनामीकारक वक्तव्ये त्यामुळे गटागटात निर्माण होणारी तेढ यामुळे सामाजिक अशांतता पसरू शकते यांची प्रांत अधिकारी व पोलिसांनी वेळीच दखल घेवूव उपाययोजना करावी अशी मागणी राष्ट्रवादी काँग्रेस पक्षाच्यावतीने कुऱ्हाडे यांनी केली आहे.

Read more...

काय आहे पुणे शहरातील लॉकडाऊनचे नियोजन?

काय आहे पुणे शहरातील लॉकडाऊनचे नियोजन?

सजग वेब टीम , पुणे

पुणे | पुणे शहरात लागू करण्यात आलेला नवा लॉकडाऊन एकूण दहा दिवसांचा असणार आहे. १३ जुलैच्या मध्यरात्रीपासून तर २३ जुलैच्या मध्यरात्रीपर्यंत हा टप्पा असेल. यात प्रामुख्याने दोन टप्पे करण्यात आले आहेत.

१) १४ जुलै ते १८ जुलैपर्यंत केवळ औषधे, वैद्यकीय सेवा आणि दूध उपलब्ध असणार
२) १९ जुलैपासून अत्यावश्यक सेवा (वैद्यकीयसह इतर) स. १० ते दु. ४ सुरु राहतील
३) दहा दिवसांच्या कालावधीत अत्यावश्यक सेवेसाठी ऑनलाईन पास देण्याची व्यवस्था असेल.

४) शेवटच्या टप्प्यात आढावा घेऊन पुढचा निर्णय घेण्यात येणार

या संदर्भात लेखी आदेश आज निर्गमित केले जाणार आहेत !

Read more...

कोरोनाचा वाढता संसर्ग विचारात घेता व्यापक सर्वेक्षण व तपासण्या वाढवा – उपमुख्यमंत्री अजित पवार

कोरोनाची साखळी तोडण्यासाठी प्रसंगी पुन्हा लॉकडाऊन घोषित करण्याचा उपमुख्यमंत्री अजित पवार यांचा इशारा

कोरोनाचा वाढता संसर्ग विचारात घेता व्यापक सर्वेक्षण व तपासण्या वाढवा – उपमुख्यमंत्री अजित पवार

सजग वेब टीम,  पुणे

पुणे(दि.१०) | पुणे तसेच पिंपरी चिंचवड शहरासोबतच ग्रामीण भागात कोरोनाबाधित रुग्णांची संख्या दिवसेंदिवस वाढत आहे. अनेक नागरीक कोणत्याही कारणाशिवाय घराबाहेर मास्क न वापरता तसेच प्रशासनाने घालून दिलेल्या नियमांचे पालन न करता गर्दी करत असल्याचे निदर्शनास येत आहे. अशीच परिस्थिती कायम राहिल्यास आणखी कडक भूमिका घ्यावी लागेल. प्रसंगी पुन्हा लॉकडाऊन घोषित करावा लागेल, असा इशारा उपमुख्यमंत्री तथा पुणे जिल्ह्याचे पालकमंत्री अजित पवार यांनी आज दिला. कोरोनाचा वाढता संसर्ग विचारात घेता व्यापक सर्वेक्षण कोरोना चाचण्या वाढविण्यासोबतच कोरोनाची साखळी तोडणे हे आपल्यापुढील प्रमुख आव्हान आहे. सर्वांनी सजग राहून कामे करावीत, असे निर्देशही श्री पवार यांनी दिले.

विभागीय आयुक्त कार्यालयात कोरोना विषाणू प्रादुर्भाव निर्मुलन आढावा बैठक घेण्यात आली. यावेळी ते बोलत होते. बैठकीला मुख्यमंत्री यांचे प्रधान सल्लागार अजोय मेहता, सार्वजनिक आरोग्य विभागाचे प्रधान सचिव डॉ. प्रदीपकुमार व्यास, विभागीय आयुक्त डॉ. दीपक म्हैसेकर, जमाबंदी आयुक्त एस. चोक्कलिंगम, जिल्हाधिकारी नवल किशोर राम, पुणे मनपा आयुक्त शेखर गायकवाड, पिंपरी चिंचवड मनपा आयुक्त श्रावण हर्डीकर, पोलीस आयुक्त डॉ. के. व्यंकटेशम, संदीप बिष्णोई, साखर आयुक्त सौरभ राव, पुणे महानगर प्रदेश विकास प्राधिकरणचे मुख्य कार्यकारी अधिकारी विक्रम कुमार, सहकार आयुक्त अनिल कवडे, भूजल सर्वेक्षण व विकास यंत्रणेचे संचालक कौस्तुभ दिवेगावकर, अतिरिक्त आयुक्त रुबल अग्रवाल, शांतनु गोयल, पोलीस अधीक्षक संदीप पाटील, जिल्हा परिषदेचे मुख्य कार्यकारी अधिकारी आयुष प्रसाद, शासनाचे वैद्यकीय सल्लागार डॉ. सुभाष साळुंके, ससूनचे अधिष्ठाता डॉ. मुरलीधर तांबे यांच्यासह संबंधित विभागाचे वरिष्ठ अधिकारी उपस्थित होते.

उपमुख्यमंत्री अजित पवार म्हणाले, कोरोनाची आपत्ती लक्षात घेता महानगरपालिका व इतर यंत्रणांमार्फत विविध प्रतिबंधात्मक उपाययोजना करण्यात येत आहेत. तथापि, परिसरनिहाय सूक्ष्म नियोजन केल्यास अधिक प्रभावीपणे काम करणे शक्य होईल. टाळेबंदीच्‍या शिथिलीकरणानंतर यंत्रणांची जबाबदारी वाढली आहे. त्यामुळे योग्य अंतर राखणे, मास्क वापरणे आदींचा अवलंब होत नसल्यास कारवाई करून शिस्त निर्माण करण्यासाठी प्रयत्न करावा. कोणत्याही परिस्थितीत कंटेनमेंट झोन्समध्ये कडक बंधने पाळली जातील, याकडे लक्ष द्यावे. कोरोनाची साखळी तोडणे हे आपल्यापुढील प्रमुख आव्हान आहे. जिथे उद्योग- व्यवसायांना परवानगी देण्यात आली तिथे लक्ष केंद्रीत करून अधिक काळजी घ्यावी, अशा सूचनाही श्री पवार यांनी दिल्या.

ग्रामीण भागात कोरोनाचा संसर्ग रोखण्यासाठी वेळीच खबरदारी घेणे आवश्यक असल्याचे सांगून उपमुख्यमंत्री पवार म्हणाले, पुणे शहर तसेच लगतच्या गावात कोरोनाचा संसर्ग वाढत असल्याचे निदर्शनास येत आहे. संसर्ग रोखण्यासाठी वेळीच कडक उपाययोजना कराव्यात तसेच ‘फिव्हर क्लिनिक’मध्ये आवश्यक मनुष्यबळ व सामग्री उपलब्ध करून द्यावी. जेणेकरून ग्रामीण भागातील नागरिकांना लवकरात लवकर उपचार मिळणे शक्य होईल. कोविड केअर सेंटर, डेडीकेटेड कोविड हॉस्पिटलमध्ये राज्य शासनाच्या मार्गदर्शक सूचनेनुसार सर्व आरोग्यविषयक सुविधा सज्ज ठेवाव्यात, अशा सूचनाही त्यांनी दिल्या.

मुख्यमंत्री यांचे प्रधान सल्लागार अजोय मेहता म्हणाले, कोरोनाबाधित रुग्णाच्या संपर्कात आलेल्या व्यक्तीचा शोध, घरोघरी सर्व्हेक्षण तसेच कोरोना चाचण्या वाढविणे आवश्यक आहे. कोरोना चाचणीसाठी स्‍राव नमुना घेतल्यानंतर अहवाल येण्यासाठी विलंब होणार नाही, याची दक्षता घ्या तसेच घरोघरी जावून करण्यात येत असलेले सर्वेक्षण वाढविण्यासोबतच यामध्ये स्थानिक सामाजिक कार्यकर्ते तसेच सोसायटीचे अध्यक्ष यांचाही सहभाग घ्यावा, अशा सूचना करून झोपडपट्टी क्षेत्रातील स्वच्छतागृहांच्या स्वच्छतेबाबत दक्षता घेण्याच्या सूचनाही श्री मेहता यांनी दिल्या.

आरोग्य विभागाचे प्रधान सचिव डॉ. प्रदीप व्यास यांनी पुणे जिल्ह्याची कोरोना बाबतची सद्यस्थितीची सादरीकरणाद्वारे माहिती दिली. कोरोना वाढीचा दर, बरे होण्याचा दर, मृत्यू दर याचा अंदाज घेत जुलैअखेर अपेक्षित असलेल्या नियोजनाबाबत माहिती दिली. प्रतिबंधित क्षेत्राबाहेरही मोठया प्रमाणात कोरोनाचे रुग्ण असल्याने त्यादृष्टीने व्यापक नियोजन करण्यात आल्याचे त्यांनी सांगितले.

विभागीय आयुक्त डॉ. दीपक म्हैसेकर यांनी कोरोना प्रतिबंधासाठीचे करण्यात येत असलेल्या उपाययोजनांबाबत माहिती दिली. कोरोना प्रतिबंधासाठी प्रत्येक विभागाकडून सुरू असलेल्या उपाययोजनांबाबत सातत्याने आढावा घेतला जात असल्याचे त्यांनी सांगितले.

जिल्हाधिकारी नवल किशोर राम यांनी ग्रामीण भागात कोरोनाचा संसर्ग रोखण्यासाठी करण्यात येत असलेल्या उपाययोजनाबाबत सविस्तर माहिती दिली. ज्या गावात कोरोना रुग्ण आढळत आहे, त्या संपूर्ण गावाला प्रतिबंधित क्षेत्र घोषित करून उपाययोजना राबविण्यात येत असल्याचे सांगून शहरानजीकच्या गावातील वाढता संसर्ग विचारात घेत उपाययोजनांवर भर दिला जात असल्याचे त्यांनी सांगितले.

पुणे मनपा आयुक्त शेखर गायकवाड व पिंपरी चिंचवड आयुक्त श्रावण हर्डीकर यांनी महापालिकाक्षेत्रात कोरोना प्रतिबंधासाठी करण्यात येत असलेल्या उपाययोजनाबाबत माहिती दिली. यावेळी विविध यंत्रणांचे अधिकारी उपस्थित होते.

Read more...

सारथी संस्थेला उद्याच्या उद्याच ८ कोटींची मदत – उपमुख्यमंत्री अजित पवार

‘सारथी’चा कारभार राजर्षी शाहूंचा गौरव वाढवणारा असेल

‘सारथी’साठी सर्वस्व पणाला लावणार; ‘व्हिजन 2020-30’ राबवणार – उपमुख्यमंत्री अजित पवार

सजग वेब टीम, मुंबई

मुंबई, (दि.१०) | मराठा समाजाच्या सामाजिक, शैक्षणिक, आर्थिक विकासासाठी स्थापन झालेली ‘सारथी’ संस्था कदापि बंद होणार नाही. संस्थेची स्वायत्तता कायम राहील. ‘सारथी’ला उद्याच तातडीने 8 कोटींचा निधी दिला जाईल. समाजबांधवांच्या शाश्वत विकासासाठी ‘सारथी’कडून ‘व्हिजन 2020-30’ हा दहा वर्षाचा आराखडा तयार केला जाईल. ‘सारथी’ व ‘अण्णासाहेब पाटील आर्थिक मागास विकास महामंडळा’च्या आर्थिक, प्रशासकीय अडचणी दूर होण्यासाठी दोन्ही संस्था पुढच्या काळात नियोजन विभागांतर्गत काम करतील, अशा अनेक घोषणा उपमुख्यमंत्री अजित पवार यांनी आज केल्या.

‘सारथी’च्या विकासासाठी सर्वस्व पणाला लावण्याची तयारी असल्याचे सांगून यापुढच्या काळात ‘सारथी’वरचे हेत्वारोप टाळून बदनामी थांबवावी, असे आवाहनही त्यांनी केले. ‘सारथी’ संस्थेसमोरील प्रश्नांचा आढावा घेऊन ते सोडवण्यासाठी उपमुख्यमंत्री अजित पवार यांच्या अध्यक्षतेखाली आज मंत्रालयात विशेष बैठक आयोजित करण्यात आली होती. बैठकीला इतर मागासवर्गीय विभागाचे मंत्री विजय वडेट्टीवार, कौशल्य विकास मंत्री नवाब मलिक, खासदार छत्रपती संभाजीराजे, आमदार विनायक मेटे आदींसह वरिष्ठ प्रशासकीय अधिकारी, मराठा समाजाचे प्रतिनिधी उपस्थित होते. बैठकीत छत्रपती संभाजीराजे आणि मराठा समाजाच्या प्रतिनिधींनी विचार मांडले. बैठकीनंतर उपमुख्यमंत्री अजित पवार आणि खासदार छत्रपती संभाजीराजे यांनी संयुक्त पत्रकार परिषद घेऊन बैठकीतील निर्णयांची माहिती दिली.

उपमुख्यमंत्री अजित पवार यांनी सांगितले की, ‘सारथी’संस्थेसंदर्भात विविध व्यक्ती, संस्था, मान्यवरांकडून आलेली निवेदने, पत्रे, मागण्यांची नोंद घेण्यात आली आहे, त्यांचा एकत्रित विचार करुन सर्वांच्या मनासारखा सकारात्मक निर्णय व्हावा, ही सरकारची भूमिका आहे. त्याअनुषंगाने मराठा समाजाच्या विविध विद्याशाखा, अभ्यासक्रमात शिकणाऱ्या, स्पर्धापरिक्षांची तयारी करणाऱ्या विद्यार्थ्यांना शिष्यवृत्ती व शैक्षणिक शुल्क त्वरीत मिळावे यासाठी उद्याच 8 कोटी रुपये ‘सारथी’ला उपलब्ध करुन दिले जातील. ‘तारादूत’ यांना दोन महिन्यांचा प्रलंबित निधी तात्काळ दिला जाईल. मराठा समाजाच्या शैक्षणिक विकासासाठी काम करणारी ‘सारथी’ आणि आर्थिक विकासासाठी काम करणारे ‘अण्णासाहेब पाटील आर्थिक मागास विकास महामंडळ’ या दोन्ही संस्था अनुक्रमे ओबीसी व कौशल्य विकास मंत्रालयाऐवजी पुढच्या काळात नियोजन विभागाच्या अंतर्गत काम करतील. यासंबंधीचा प्रस्ताव राज्य मंत्रिमंडळाच्या बैठकीत मंजूर करुन घेण्यात येईल. याचाच अर्थ या दोन्ही संस्थांची जबाबदारी आता नियोजनमंत्री म्हणून उपमुख्यमंत्री अजित पवार यांनी स्वत:कडे घेतली आहे. छत्रपती संभाजीराजे यांनीही उपमुख्यमंत्र्यांच्या निर्णयाचे स्वागत करुन त्यांच्या नेतृत्वावर विश्वास व्यक्त केला  आहे.

उपमुख्यमंत्री अजित पवार हे ‘सारथी’च्या आगामी वाटचालीबद्दल म्हणाले की, ‘सारथी’चा कारभार पुढच्या काळात अधिक पारदर्शक व नियमानुसारंच होईल. संस्थेकडून होणारा खर्च दरमहा वेबसाईटवर प्रसिद्ध करण्यात येईल. दर दोन महिन्यांनी कामाचा आढावा घेऊन, आलेल्या नवीन सूचना, कल्पना विचारात घेऊन वाटचालीची पुढची दिशा निश्चित करण्यात येईल. छत्रपती राजर्षी शाहू महाराजांच्या नावाने सुरु झालेल्या संस्थेचा कारभार राजर्षींच्या नावाला साजेशा पद्धतीनं, त्यांचा गौरव वाढवणारा असेल, याची काळजी घेऊ. ‘सारथी’चा गौरव वाढवण्यासाठी सर्वस्व पणाला लावण्याची तयारी असल्याचेही उपमुख्यमंत्री म्हणाले. ‘सारथी’ची नाहक बदनामी करण्याचे प्रकार थांबवावेत, असं आवाहनही उपमुख्यमंत्री अजित पवार यांनी केलं.

खासदार छत्रपती संभाजी राजे यांनीही उपमुख्यमंत्र्यांनी स्वत:हून पुढाकार घेऊन बैठक आयोजित केल्याबद्दल तसेच या दोन्ही संस्थांची जबाबदारी स्विकारल्याबद्दल आनंद व्यक्त केला. उपमुख्यमंत्री अजित पवार यांनीही छत्रपतीं संभाजीराजेंनी निमंत्रणाचा स्विकार करुन बैठकीला उपस्थित राहिल्याबद्दल त्यांचे आभार मानले.

Read more...

कोरोनाचा रुग्णदर आणि मृत्युदर कमी करण्यासाठी अधिक जबाबदारीने काम करा – जिल्हाधिकारी नवल किशोर राम

कोरोनाचा रुग्णदर आणि मृत्युदर कमी करण्यासाठी अधिक जबाबदारीने काम करा
– जिल्हाधिकारी नवल किशोर राम

 जिल्हा प्रशासनाच्या वतीने समन्वय अधिकाऱ्यांची नियुक्ती

पुणे, (दि. ९) | पुणे जिल्ह्यातील कोरोनाचा रुग्णदर आणि मृत्यूदर कमी करण्यासाठी अधिक जबाबदारीने काम करा, अशा सूचना जिल्हाधिकारी नवल किशोर राम यांनी केल्या.

पुणे जिल्ह्यातील कोरोना नियंत्रणासाठी नियोजन करण्याच्या दृष्टीने आज जिल्हाधिकारी श्री. राम यांच्या अध्यक्षतेखाली बैठक घेण्यात आली, यावेळी ते बोलत होते. बैठकीला निवासी उपजिल्हाधिकारी डॉ.जयश्री कटारे, अपर जिल्हाधिकारी तथा कोरोना नियंत्रणासाठी नियुक्त करण्यात आलेले समन्वय अधिकारी सुरेश जाधव, उपजिल्हाधिकारी अनुक्रमे सुधीर जोशी, आरती भोसले, सुभाष भागडे, एमआयडीसीचे प्रादेशिक अधिकारी अविनाश हदगल व संजीव देशमुख, उपजिल्हाधिकारी प्रमोद केंभावी, तहसीलदार अनुक्रमे सुनील कोळी, रोहिणी आखाडे-फडतरे, राधिका बारटक्के व अन्य अधिकारी उपस्थित होते.

जिल्हाधिकारी श्री. राम म्हणाले, पुणे जिल्ह्यात शहरी भागाबरोबरच ग्रामीण भागातील वाढती रुग्णसंख्या नियंत्रणात आणण्यासाठी गांभीर्याने प्रयत्न करणे गरजेचे आहे. जिल्हा प्रशासनाच्या वतीने नियुक्त करण्यात आलेल्या समन्वय अधिकाऱ्यांनी मिशन मोडवर काम करावे.

छावणी परिषद, हवेली तालुका तसेच ग्रामीण भागातील कोरोना नियंत्रणासाठी विशेष लक्ष द्यावे, असे सांगून जिल्हाधिकारी श्री. राम म्हणाले, कोरोना पॉझिटिव्ह रुग्ण आढळून आलेल्या भागात कंटेन्मेंट झोन तयार करा, पॉझिटिव्ह रुग्णांच्या संपर्कातील व्यक्तींचा शोध व तपासणी प्रभावीपणे करा. कोरोना तपासणी अहवाल लॅब कडून २४  तासात मिळण्यासाठी प्रयत्न करा. शासकीय व खाजगी रुग्णालयात उपलब्ध असलेल्या खाटांची माहिती घेवून हा अहवाल नियंत्रण कक्षाला वेळोवेळी कळवा. रुग्णांना बेड जलदगतीने मिळवून देण्यासाठी नियोजन करा. जिल्ह्यातील कोरोनाचा प्रादुर्भाव रोखण्यासाठी संबंधित इंसिडेंट कमांडर तथा प्रांताधिकारी यांच्या समन्वयाने आवश्यक त्या सर्व बाबींवर नियंत्रण ठेवा. उपाययोजना राबविताना गावातील उद्योग आस्थापनांवर परिणाम होणार नाही, याची दक्षता घ्यावी, असेही त्यांनी सांगितले. अपर जिल्हाधिकारी सुरेश जाधव तसेच उपस्थित समन्वय अधिकाऱ्यांनी आवश्यक ती माहिती दिली.

Read more...

प्लाझ्मा बँक स्थापन करण्यासाठी कोरोनामुक्त व्यक्तींना प्लाझ्मा दान करण्याचे आवाहन – विभागीय आयुक्त डॉ. म्हैसेकर

प्लाझ्मा बँक स्थापन करण्यासाठी कोरोनामुक्त व्यक्तींना प्लाझ्मा दान करण्याचे आवाहन-विभागीय आयुक्त डॉ. दीपक म्हैसेकर

सजग वेब टीम, पुणे

पुणे (दि.०८)|  कोव्हिड-१९ आजारातून उपचाराअंती बरे झालेल्या व्यक्तीचा प्लाझ्मा (रक्तद्रव) जर कोरोनाबाधित असलेल्या गंभीर रुग्णाला दिल्यास त्या रुग्णाचा जीव वाचवण्याची शक्यता असते हे वैज्ञानिक संशोधनातून सिद्ध झाले आहे. परंतु असे लक्षात आले आहे की कोरोना आजारातून बऱ्या झालेल्या व्यक्ती प्लाझ्मा दान करण्यासाठी पुढे येत नाहीत. परिणामी गंभीर कोरोना रुग्णांना प्लाझ्मा उपलब्ध होत नाही. त्यामुळे कोव्हिड-१९ आजारातून उपचाराअंती बरे झालेल्या व्यक्तींनी प्लाझ्मा दान करावे, असे आवाहन विभागीय आयुक्त डॉ. दीपक म्हैसेकर यांनी केले आहे.

विभागीय आयुक्त डॉ म्हैसेकर म्हणाले, प्लाइमा फेरेसिस ही प्रक्रिया रक्तदान प्रकियेप्रमाणेच आहे. प्लाझ्मा फेरेसिस साठी वापरले जाणारे एक अत्याधुनिक मशीन आहे. या मशीनचे वैशिष्ट्य असे की यामध्ये फक्त प्लाझ्मा घेतला जातो व बाकीचे रक्त प्लाइमा दान करणाऱ्या व्यक्तीला परत दिले जाते. ही प्रक्रिया अत्यंत सुरक्षित असून ती तज्ज्ञ डॉक्टरांच्या देखरेखीखालीच केली जाते. प्लाइमा दान करणारी व्यक्ती १८ ते ६० वयोगटातील असावी. प्लाइमा देणाऱ्या कोरोनामुक्त व्यक्तीची सर्वप्रथम वैद्यकीय तपासणी व इतर चाचण्या केल्या जातात आणि जर ती वैद्यकीयदृष्ट्या पात्र असेल तरच त्या व्यक्तीचा प्लाझ्मा घेतला जातो. या सर्व प्रक्रियेसाठी साधारण दीड ते दोन तास लागतात. प्लाझ्मा देणाऱ्या व्यक्तीस अजिबात अशक्तपणा अथवा थकवा जाणवत नाही. म्हणून सर्व करोनामुक्त व्यक्तींनी प्लाइमा दान करण्यास पात्र असल्यास प्लाझ्मा दान करुन गंभीर करोना रुग्णांना जीवनदान द्यावे, असे आवाहनही विभागीय आयुक्त डॉ. दीपक म्हैसेकर यांनी केले.

Read more...

कोरोना चाचणीचा अहवाल २४ तासाच्या आत देणे बंधनकारक – विभागीय आयुक्त डॉ. म्हैसेकर

कोरोना चाचणीचा अहवाल खासगी प्रयोगशाळेने २४ तासाच्या आत जाहीर करणे बंधनकारक – विभागीय आयुक्त डॉ. दीपक म्हैसेकर

सजग वेब टीम, पुणे

पुणे, दि. ८ | कोरोना संशयित व्यक्तींचे चाचणीसाठी घेतलेल्या नमुनांचा अहवाल २४ तासांच्या आत करण्याचे खासगी प्रयोगशाळांना बंधनकारक करण्यात आले आहे. हे अहवाल रुग्ण ज्या भागातील रहिवासी आहे म्हणजेच पुणे महानगरपालिका, पिंपरी चिंचवड महानगरपालिका, ग्रामीण भागासाठी जिल्हा आरोग्य अधिकारी यांच्याकडे सादर करण्याच्या सूचना विभागीय आयुक्त डॉ दीपक म्हैसेकर यांनी दिल्या.

विभागीय आयुक्त डॉ दीपक म्हैसैकर यांच्या अध्यक्षतेखाली कोवीड -१९ संसर्गजन्य आजाराच्या अनुषंगाने खासगी प्रयोगशाळा चालकांसोबत आढावा बैठक घेण्यात आली. यावेळी त्यांनी सूचना दिल्या.
सर्व प्रयोगशाळा चालकांनी दररोज संध्याकाळी सहा वाजेपर्यंत दिलेल्या नमुन्यातील अहवाल न चुकता श्री. कुलकर्णी, आरोग्य उपसंचालक कार्यालय यांच्याकडे सादर करावे. चाचणी बाबत आरटी-पीसीआरवर डेटा दररोज अपलोड करण्यात यावा व दैनंदिन अहवाल सनियंत्रण अधिकारी यांना देण्यासाठी प्रत्येक प्रयोगशाळेने एका नोडल अधिकाऱ्यांची नियुक्ती करावी. नोडल अधिकाऱ्यांच्या दूरध्वनी क्रमांक कळविण्याच्या सूचनाही विभागीय आयुक्त डॉ दीपक म्हैसैकर दिल्या.

Read more...

जुन्नरच्या कोरोना संख्येची शतकाकडे वाटचाल, पिंपळगावचे मा.सरपंच कोरोना पाॅझिटिव्ह

पिंपळगाव (आर्वी) चे माजी सरपंच कोरोना चाचणी अहवालामध्ये आढळले पॉझिटिव्ह

आज जुन्नर तालुक्यामध्ये तीन जणांचा अहवाल आला पॉझिटिव्ह

सजग वेब टीम , जुन्नर 

नारायणगाव | पिंपळगाव (आर्वी) चे माजी सरपंच हे देखील आज आलेल्या कोरोना चाचणी अहवालामध्ये पॉझिटिव्ह आढळले आहेत.
(वारूळवाडी ता. जुन्नर) येथे सध्या रहात असलेल्या पिंपळगाव तर्फे नारायणगाव च्या माजी प्रभारी सरपंचांच्या कोरोना चाचणी पॉझिटिव्ह अहवालामुळे अनेकांनी चिंता व्यक्त केली आहे. वारूळवाडी ते कॉलेज महाविद्यालय या रस्त्यावर हे माजी सरपंच वास्तव्यास आहेत. मात्र त्रास जास्त जाणवू लागल्याने ते चार दिवसांपूर्वी पिंपळगाव येथील आपल्या घरी राहत होते असे समजते. त्यांच्या घरातील काही व्यक्तींचा स्वॅब यापूर्वीच टेस्टिंग साठी पाठवण्यात आला असून त्यांना क्वारंटाईन करण्यात आले आहे. या माजी सरपंचांच्या संपर्कात अनेक व्यक्ती आल्या आहेत असे बोलले जात आहे. त्यांचा स्वँब टेस्टसाठी व त्यांना क्वारंटाईन करण्यासाठी संपर्कात आलेल्या लोकांचा शोध आता प्रशासन घेत आहे.

यापूर्वीच नारायणगाव – वारूळवाडी हे प्रतिबंधित क्षेत्र म्हणून जाहीर करण्यात आले आहे. आजपासून पुढील चार दिवस पूर्ण वारूळवाडी गाव अत्यावश्यक सेवा वगळता बंद राहणार असल्याची माहिती वारूळवाडी चे उपसरपंच सचिन वारुळे यांनी दिली
या अहवालामुळे वारूळवाडी येथील कोरोना रुग्णांची संख्या दोन एवढी झाली आहे. तर नारायणगाव मध्ये एकूण पाच कोरोना पॉझिटिव्ह रुग्ण आढळले आहेत. याशिवाय आज धालेवाडी येथे दोन पॉझिटिव्ह रुग्ण आढळल्यामुळे जुन्नर तालुक्यातील कोरोना बाधितांची संख्या ९१ एवढी झाली आहे यातील ५६ रुग्ण हे पूर्णपणे बरे झाले असून ३ रुग्णांचा मृत्यू झाला आहे. तर उर्वरित ३२ रुग्णांवर लेण्याद्री येथील कोवीड सेंटरमध्ये तसेच इतर हॉस्पिटलमध्ये उपचार सुरू आहेत. अशी माहिती आरोग्य विभाग व डॉ वर्षा गुंजाळ यांनी दिली आहे.

नागरिकांनी प्रशासनाने सांगितलेल्या नियमांचे काटेकोर पालन करुन प्रशासनाला सहकार्य करावे असे आवाहन नारायणगाव पोलिस स्टेशनचे सहाय्यक पोलीस निरीक्षक अर्जुन घोडे पाटील यांनी केले आहे.

Read more...

जुन्नरचे आमदार अतुल बेनके ७ दिवसांसाठी गृह विलगीकरणात

जुन्नरचे आमदार अतुल बेनके ७ दिवसांसाठी गृह विलगीकरणात

सजग वेब टीम, जुन्नर 

नारायणगाव | गेल्या काही दिवसांत पुणे जिल्ह्यातील लोकप्रतिनिधीही कोरोनाबाधित होताना दिसत आहेत. यात पुण्याचे महापौर मुरलीधर मोहोळ, भोसरी चे आमदार महेश लांडगे, हडपसर चे माजी आमदार योगेश टिळेकर, दौंड चे आमदार राहुल कुल आदी लोकप्रतिनिधींना कोरोनाची बाधा झाली आहे. त्यातच आता जुन्नरचे आमदार अतुल बेनके यांनाही त्रास जाणवू लागल्याने व कोरोनासदृश लक्षणे दिसल्याने डॉक्टरांच्या सल्ल्याने त्यांची कोरोना टेस्ट करण्यात आली आहे.

सुदैवाने हि टेस्ट निगेटिव्ह आली आहे. ११ जुलै ला पुन्हा टेस्ट करण्यात येईल परंतु खबरदारी म्हणून डॉक्टरांनी बेनके यांना ७ दिवसांसाठी विलगीकरण कक्षात राहण्यास सांगितले आहे. अशी माहिती त्यांनी आपल्या फेसबुक पेजवर प्रसिद्ध केलेल्या एका पत्रकाद्वारे दिली आहे.

या प्रसिद्धी पत्रकात त्यांनी खालील संदेश जुन्नरकरांना दिला आहे.

कोरोनाच्या पार्श्वभूमीवर उपाययोजना करताना प्रशासनाशी समन्वय साधताना, नागरिकांच्या समस्यांचे निवारण करताना अनेकांशी माझा संपर्क येत आहे.

योग्य ती काळजी घेत असलो तरीही कामानिमित्त फिरताना कोविड पॉझिटिव्ह व्यक्तीशी संपर्क आल्याने आणि काही प्रमाणात लक्षणे आढळून आल्याने सोमवार दि.०६ जुलै रोजी मी त्वरित डॉक्टरांशी संपर्क साधला. डॉक्टरांच्या सल्ल्यानुसार कोरोना टेस्ट करण्यात आली व सुदैवाने ती निगेटिव्ह आली आहे. तसेच दि.११ जुलै रोजी दुसरी टेस्ट करण्यात येणार आहे. परंतु खबरदारी म्हणून डॉक्टरांनी मला ७ दिवसांसाठी विलगीकरण कक्षात राहण्यास सांगितले आहे

माझी आपणा सर्वांना विनंती आहे की या सर्व परिस्थितीत विलगीकरण काळात मी कुणालाही भेटू शकणार नाही. विलगीकरणात असलो तरीही तालुक्यातील बाकीची कामे सुरू राहणार आहेत कुठलेही काम थांबणार नाही याची मी काळजी घेत आहे. तालुक्यातील सर्व घडामोडींवर माझे बारीक लक्ष आहे. प्रशासकीय पातळीवर अधिकाऱ्यांशी संपर्क ठेवून आहे.

आपल्या सेवेसाठी, काही काम असल्यास खालील क्रमांकावर संपर्क साधावा.

पुष्कर ब्रह्मे – ९८६०१७६६४४
प्रसाद पानसरे – ९७६७१४१४१४ / ७७९८३७४६३५

आपण सर्वांनी प्रशासनाच्या सूचनांचे काटेकोर पालन करा, अनावश्यक बाहेर फिरू नका, स्वच्छता पाळा आणि कुटुंबियांची काळजी घ्या हि नम्र विनंती.

आपल्या शुभेच्छा आणि आशिर्वाद नेहमीच माझ्या पाठीशी आहेत लवकरच मी आपल्या सेवेत पुन्हा दाखल होईल… धन्यवाद!

Read more...

सुप्रसिद्ध मानसोपचार तज्ज्ञ डॉ. रुद्रेश पाठक यांचे दुःखद निधन

सुप्रसिद्ध मानसोपचार तज्ज्ञ डॉ. रुद्रेश पाठक यांचे दुःखद निधन

सजग वेब टीम, पुणे

पुणे (दि. ७ ) | प्रख्यात मानसोपचार तज्ज्ञ डॉ. रुद्रेश पाठक (वय ६५) यांचे नुकतेच बोस्टन (इंग्लंड) येथे दु:खद निधन झाले. मागील तीन महिन्यांपासून ते कोरोनाशी लढा देत होते. ७० दिवस व्‍हेंटीलेटरवर राहून देखील त्‍यांनी कोरोनावर मात करुन ते बरे झाले होते. तथापि, मेंदूच्या पक्षाघाताने त्‍यांचे दु:खद निधन झाले.

त्यांच्या पश्चात पत्नी डॉ. भारती, मुलगी नेहा, मुलगा अनिश असा परिवार आहे. पुणे येथील विभागीय आयुक्त डॉ. दीपक म्हैसेकर आणि नाशिक येथील महाराष्ट्र आरोग्य विज्ञान विद्यापीठाचे कुलगुरु डॉ. दिलीप म्हैसेकर यांचे ते मेहुणे होते.

डॉ. रुद्रेश पाठक हे बोस्टन येथील पिलग्रीम हॉस्पिटलमध्ये मानसोपचार तज्ज्ञ म्हणून कार्यरत होते. औरंगाबाद शासकीय वैद्यकीय महाविद्यालयातून त्यांनी एमबीबीएसची पदवी संपादन केली होती. त्यांच्या निधनामुळे विविध क्षेत्रातील मान्यवरांनी शोक व्यक्त केला आहे.

Read more...
Open chat
Powered by