जुन्नर तालुका राष्ट्रवादी म्हणतेय ‘आमचं ठरलंय’ अतुल बेनकेच

जुन्नर विधानसभा मतदारसंघातून राष्ट्रवादी काँग्रेसकडून युवक प्रदेश उपाध्यक्ष अतुल बेनके यांचाच एकमेव अर्ज पक्षाकडे दाखल करायचा, असा निर्णय जुन्नर तालुका राष्ट्रवादी काँग्रेसच्या बैठकीत सर्वानुमते घेण्यात आला आहे. – पांडुरंग पवार 

सजग वेब टिम, जुन्नर , स्वप्नील ढवळे

नारायणगाव | जुन्नर विधानसभा मतदारसंघातून निवडणुकीसाठी राष्ट्रवादी काँग्रेसकडून युवक प्रदेश उपाध्यक्ष अतुल बेनके यांचाच एकमेव अर्ज पक्षाकडे दाखल करायचा, असा निर्णय आज झालेल्या तालुका बैठकीत सर्वानुमते घेण्यात आला. तालुकाध्यक्ष पांडुरंग पवार यांनी ही माहिती दिली.

राष्ट्रवादी काँग्रेसच्या उमेदवारीबाबत इच्छुकांशी चर्चा करण्यासाठी आज नारायणगाव येथील शासकीय विश्रामगृहात तालुक्‍यातील पदाधिकारी व कार्यकर्ते यांची बैठक झाली. या वेळी पांडुरंग पवार, बाजार समितीचे सभापती संजय काळे यांनी उमेदवारीसाठी बेनके यांची शिफारस केली. जिल्हा परिषद सदस्य शरद लेंडे यांनी त्यास अनुमोदन दिले. यावेळी उपस्थित कार्यकर्ते व पदाधिकारी यांनी टाळ्या वाजवून या निर्णयाचे स्वागत केले.

” आमचं ठरलंय “
सभापती संजय काळे म्हणाले, “सन २०१४ च्या विधानसभा निवडणुकीसाठी मी इच्छुक होतो. आमच्यातील मतभेदाचा फटका पक्षाला बसला. परंतु आता बेनके व माझ्यातील मतभेद संपुष्टात आले असून पक्ष तालुक्‍यात एकसंध झाला आहे. जुन्नरचा पुढील आमदार राष्ट्रवादी काँग्रेसचा असेल, अशी ग्वाही आम्ही आमचे नेते शरद पवार, माजी उपमुख्यमंत्री अजित पवार यांना दिली आहे. उमेदवारीसाठी आम्ही बेनके यांच्या नावाची शिफारस १५ जून रोजी मुंबईत झालेल्या पक्षाच्या बैठकीत केली होती. कोणत्याही परिस्थितीत अतुल बेनके यांना आमदार करायचं, असं आमचं ठरलंय. याबाबत शंका घेण्याचे कारण नाही.”

या बैठकीस अनिल मेहेर, महिला तालुकाध्यक्षा सुरेखा वेठेकर, राजश्री बोरकर, जिल्हा परिषद सदस्य मोहित ढमाले, अंकुश आमले, प्रवक्ते भाऊसाहेब देवाडे, आदिवासी नेते दादाभाऊ बगाड, तुळशीराम भोईर, तुषार थोरात, फिरोज पठाण, सूरज वाजगे, वाय. जी. गायकर आदी पदाधिकारी व कार्यकर्ते उपस्थित होते.

बैठकीत बोलताना पवार म्हणाले की, जुन्नर तालुक्‍यात राष्ट्रवादी काँग्रेसची ताकद चांगली असल्याने सर्व मतभेद बाजूला ठेवून या वेळी जुन्नरच्या उमेदवारीसाठी अतुल बेनके यांची शिफारस करण्याचा निर्णय सर्वानुमते घेण्यात आला आहे. पक्षाचे जिल्हाध्यक्ष प्रदीप गारटकर यांच्याकडे एक जुलै रोजी बेनके यांचेच एकमेव नाव उमेदवारीसाठी देण्याचा निर्णय घेण्यात आला आहे. ज्येष्ठ नेत्यांनीही बेनके यांच्या नावाला एकमुखी पाठिंबा दिला आहे.

यावेळी बोलताना बेनके म्हणाले, “माझ्या नावाची सर्वानुमते शिफारस केली, याबद्दल मी सर्वांचा आभारी आहे. मागील पाच वर्षांतील चुकीच्या धोरणाचा फटका तालुक्‍यातील जनतेला बसला आहे. शेतकऱ्यांमध्ये लोकप्रतिनिधींविषयी प्रचंड नाराजी आहे. कुकडीच्या पाण्यासाठी मी सर्वस्व देऊन शेतकऱ्यांना न्याय देण्याचे काम करील.”

या बैठकीचे सूत्रसंचालन विकास दरेकर, अरविंद लंबे यांनी केले.

Read more...

पिंपरी-चिंचवड शहर व परिसरातील रेडझोनचा प्रश्न संसदेत मांडणार – अमोल कोल्हे

पिंपरी-चिंचवड शहर व परिसरातील संरक्षण खात्यासंदर्भतील रेडझोनचा प्रश्न संसदेत मांडणार आहे. हा प्रश्न मार्गी लावण्यासाठी मी प्रयत्नशील आहे. संरक्षण मंत्री राजनाथ सिंह यांच्यासोबत रेडझोनबाबत चर्चा करुन हा प्रश्न मार्गी लावण्याचे आश्वासन शिरुरचे राष्ट्रवादी काँग्रेसचे खासदार डॉ. अमोल कोल्हे यांनी आज रेडझोन संबंधित शिष्टमंडळाला दिले.

सजग वेब टिम, पुणे
पुणे | भोसरी आणि पिंपरी चिंचवड परिसरातील रेडझोन प्रश्नी आज रेडझोन संघर्ष समितीच्या शिष्टमंडळाने आज खा. डॉ.अमोल कोल्हे यांची भेट घेतली. या शिष्टमंडळाकडून डॉ. कोल्हे यांनी आज (शुक्रवारी)पुण्यात ‘रेडझोन’ची सविस्तर माहिती घेतली. संघर्ष समितीचे अध्यक्ष सुदाम तरस, सचिव गुलाबराव सोनवणे, सदस्य यदुनाथ डाखारे, नगरसेवक अजित गव्हाणे, रोहित खर्गे आदी सदस्य यावेळी उपस्थित होते.

पिंपरी-चिंचवड शहर आणि परिसरातील विविध ठिकाणच्या संरक्षण खात्याच्या वतीने रेडझोन क्षेत्र निर्धारित करण्यात आलेल्या भागातील नागरिकांना विविध समस्यांचा सामना करावा लागत आहे. यात शिरुर लोकसभा मतदारसंघातील भोसरी भागातील दिघी, वडमुखवाडी, तळवडे, मोशी, चिखली, यमुनानगर, निगडी परिसरातील नागरिकांना प्रामुख्याने रेडझोनचा सामना करावा लागत आहे. तसेच पिंपरी महापालिकेच्या हद्दीतील किवळे, मामुर्डी तसेच देहूरोड, शेलारवाडी, किन्हई, चिंचोली, झेंडेमळा, बोडकेवाडी, माळवाडी (देहू), देहूगाव, विठ्ठलवाडी या परिसरातील नागरिकांनाही रेडझोनचा सामना करावा लागत आहे. रेडझोन असल्यामुळे प्रशासनाला विकासकामे करण्यास देखील अडचणी येत आहेत.

रेडझोन संघर्ष समितीचे अध्यक्ष सुदाम तरस यांनी रेडझोनची सविस्तर माहिती दिली. खासदार डॉ. अमोल कोल्हे म्हणाले, रेडझोनचा नागरिकांना सामना करावा लागत असून विविध अडचणींना त्यांना सामोरे जावे लागत आहे. रेडझोनच्या हद्दीतील रहिवाशी चिंताग्रस्त आहेत. अनेक घरांवर असलेली टांगती तलवार आहे. ती दूर करण्यासाठी मी प्रयत्नशील आहे. चालू असलेल्या अधिवेशनातच रेडझोनचा प्रश्न मांडणार आहे. संरक्षण मंत्री राजनाथ सिंह यांच्यासोबत रेडझोनबाबत चर्चा करुन हा प्रश्न मार्गी लावण्याबाबतही आम्ही प्रयत्नशील असल्याचे, त्यांनी यावेळी बोलताना सांगितले.

Read more...

खेड घाटातील बाह्यवळणाची कामे लवकरात लवकर पूर्ण करा : खा. डॉ अमोल कोल्हे.

प्रकल्पबाधीत शेतकऱ्यांना व अधिकाऱ्यांना सोबत घेऊन केली घाटाची पाहणी

सजग वेब टिम, राजगुरूनगर
राजगुरूनगर | शिरूरचे नवनिर्वाचित खासदार डॉ. अमोल कोल्हे यांनी पुणे -नाशिक महामार्गावरील खेड घाटाचे अपूर्ण काम, ट्रॅफिक समस्या या संदर्भात संबंधित अधिकाऱ्यांसमवेत घाटाची पाहणी केली व त्यासंबंधीत कामे पूर्ण करण्याच्या सूचना अधिकाऱ्यांना दिल्या.

पुणे-नाशिक महामार्गावर ट्राफिकची समस्या ही दिवसेंदिवस वाढत चालली असून याकडे कदापि दुर्लक्ष करून चालणार नाही लवकरात लवकर हि समस्या सोडवण्यासाठी कटीबद्ध असल्याचं डॉ अमोल कोल्हे यांनी यावेळी सांगितले.

प्रकल्पबाधित शेतकऱ्यांना सोबत घेऊन आज डॉ. कोल्हे यांनी शेतकऱ्यांच्या समस्या जाणून घेतल्या

यावेळी शेतकऱ्यांनी आपल्या समस्या खासदारांसमोर मांडल्या या आधीच्या लोकप्रतिनिधींनी शेतकऱ्यांना विश्वासात न घेता अधिकारी वर्गास सोबत घेऊन जमीन अधिग्रहित केली, तसेच स्वार्थासाठी व स्वतःची जमीन वाचवण्यासाठी हा शेतकऱ्यांच्या जमिनी घालवल्या असा आरोप स्थानिक शेतकऱ्यांनी केला आहे.

याप्रसंगी खेड तालुक्याचे मा. आ. दिलीप मोहिते पाटील, राष्ट्रवादी काँग्रेसचे खेड तालुका अध्यक्ष कैलासराव सांडभोर, कृषी उत्पन्न बाजार समिती खेडचे संचालक धैर्यशील पानसरे, तुकाईवाडीचे सरपंच महेंद्र ठिगळे, प्रवीण कोरडे, ग्रामस्थ व शेतकरी मोठ्या संख्येने उपस्थित होते.

Read more...

दिल्लीत अमोल कोल्हेंच्या नावाची चर्चा पंतप्रधानांनी केलं कौतुक

दिल्लीत अमोल कोल्हेंच्या नावाची चर्चा, पहिल्या भाषणावर मोदी म्हणाले…
अमोल कोल्हे यांनी संसदेत शेती, शेतकरी आत्महत्या, बैलगाडा शर्यत, गडकिल्ले अशा अनेक विषयांबाबत भाष्य करत सरकारचं लक्ष वेधून घेतलं.

सजग वेब टिम
नवी दिल्ली | शिरूर लोकसभेचे नवनिर्वाचित खासदार डॉ.अमोल कोल्हे यांनी संसदेत केलेल्या भाषणाची सध्या जोरदार चर्चा आहे. पंतप्रधान नरेंद्र मोदी यांनीही अमोल कोल्हे यांच्या भाषणाचं कौतुक केल्याचं पाहायला मिळालं.

शिरुर लोकसभा मतदारसंघातून राष्ट्रवादीच्या तिकीटावर निवडून गेलेल्या अमोल कोल्हे यांनी संसदेत शेती, बैलगाडा शर्यत, गडकिल्ले अशा अनेक विषयांबाबत भाषण करत सरकारचं लक्ष वेधून घेतलं. यावेळी त्यांनी केलेली विषयांची अचूक मांडणी आणि वक्तृत्वशैली यामुळे कोल्हे यांचं कौतुक झालं. पंतप्रधान नरेंद्र मोदी यांनीही अभ्यासपूर्ण भाषण केल्याबद्दल काही मोजक्या खासदारांचा उल्लेख केला. त्यात अमोल कोल्हे यांच्याही नावाचा समावेश होता.

Read more...

आशाताईंच्या हकालपट्टी वर काँग्रेस राष्ट्रवादीची मानसिक मलमपट्टी

शिवसैनिकांची ‘विठ्ठला कोणता झेंडा घेऊ हाती’ अवस्था

सजग पॉलिटिकल , स्वप्नील ढवळे
जुन्नर | पुणे जिल्हा परिषदेच्या गटनेत्या शिवसेनेचे आक्रमक नेतृत्व आशाताई बुचके यांच्यावर शिवसेनाप्रमुखांनी केलेल्या हकालपट्टीच्या करवाईचे पडसाद काल जुन्नर तालुक्यात पाहायला मिळाले.

या कारवाईने व्यथित झालेल्या आशाताई बुचके यांना प्रकृती अस्वास्थामुळे काल जुन्नर याठिकाणी हॉस्पिटलमध्ये दाखल करण्यात आले होते. हि माहिती बुचके समर्थकांना तसेच विरोधकांना समजताच त्यांनीही त्याठिकाणी जाऊन बुचके यांची भेट घेतली. राष्ट्रवादी काँग्रेसचे नेते अतुल बेनके व सहकाऱ्यांनी तसेच विघ्नहर चे चेअरमन सत्यशील शेरकर यांनीही बुचके यांची भेट घेऊन तब्येतीची विचारपूस केली.

एकीकडे काँग्रेस राष्ट्रवादी काँग्रेसच्या नेत्यांनी दाखवलेल्या या आत्मीयतेचे कौतुक सोशल मीडियावरून होत असतानाच दुसरीकडे सेना नेतृत्वाने बुचके यांच्यावर अन्याय केल्याची भावना सोशल मीडियावरून त्यांच्या समर्थकांनी व्यक्त केली.

या सर्व घडामोडींमुळे मात्र जुन्नर तालुक्याच्या राजकारणात नवीन ट्विस्ट आला आहे. बुचके यांची भूमिका आणि सहकारी काय निर्णय घेतात याकडे राजकीय वर्तुळाचे लक्ष लागले आहे.

तर तटस्थ शिवसैनिकांमध्ये मात्र विठ्ठला कोणता झेंडा घेऊ हाती अशी अवस्था कार्यकर्त्यांमध्ये पाहायला मिळत आहे.

Read more...

जिल्हा परिषद गटनेत्या आशाताई बुचके यांची शिवसेनेतून हकालपट्टी

जुन्नर तालुका शिवसेनेत खळबळ

सजग वेब टिम, जुन्नर

जुन्नर | पुणे जिल्हा परिषदेच्या गटनेत्या शिवसेनेचे आक्रमक नेतृत्व आशाताई बुचके यांची पक्षाने हकालपट्टी केल्याचे वृत्त आज सामना दैनिकात प्रसिद्ध झाले आहे. या वृत्ताने जुन्नर तालुका शिवसेनेत खळबळ उडाली आहे.

पक्ष विरोधी कारवाया केल्याचा ठपका ठेवून त्यांच्या वर हि कारवाई केली आहे. शिवसेनेच्या मध्यवर्ती कार्यालयातून या संबंधित एक पत्रकही प्रसिद्ध करण्यात आले आहे.

हि कारवाई उद्धव ठाकरे यांच्या आदेशाने झाली आहे असे जरी वृत्तात म्हंटले असले तरी या कारवाई मागे असणाऱ्या बुचके यांच्या विरोधी गटाच्या पारड्यात पक्षाने वजन टाकले आहे असे स्पष्टपणे दिसत आहे.

या कारवाई नंतर बुचके यांचा गट काय भूमिका घेतो हे महत्वाचे ठरेल. जुन्नर शिवसेनेत सोनवणे गट आणि बुचके गट असा अंतर्गत संघर्ष होता परंतु या कारवाईने पक्षाने सोनवणे यांना विधानसभेसाठी रस्ता मोकळा करून दिला आहे असंच म्हणावं लागेल.

Read more...

आंबेगाव तालुक्यात महासुविधा केंद्राच्या दिरंगाई ला पालक,विद्यार्थी वैतागले

विद्यार्थ्यांना शैक्षणिक कामासाठी दाखले मिळेना वेळेत

सजग वेब टिम, आंबेगाव

लोणी-धामणी | आंबेगाव तालुक्यात विद्यार्थ्यांना महासुविधा केंद्र व प्रशासनाकडून विविध शैक्षणिक प्रवेशासाठी आवश्यक असे विविध प्रकारचे दाखले मिळताना प्रशासनाच्या आडमुठेपणाला तसेच दिरंगाई ला सामोरे जावे लागत आहे.ज्यामुळे संबंधीत विद्यार्थी व त्यांचे पालक यांना मानसिक तणावाला सामोरे जावे लागत आहे. वेळेत कागदपत्र न मिळाल्याने विद्यार्थी प्रवेशापासून वंचित राहण्याचा धोका यामुळे निर्माण होऊ शकतो यामुळे विद्यार्थ्यांचे शैक्षणिक नुकसान झाल्यास शिवसेना नेते, युवासेनाप्रमुख मा.आदित्यजी ठाकरे व कार्यसम्राट मा.खासदार शिवाजीराव दादा आढळराव पाटील यांच्या मार्गदर्शनाखाली प्रशासनाच्या विरोधात युवासेनेच्या वतीने तीव्र आंदोलन छेडण्याचा इशारा दिला आहे.

संपूर्ण महाराष्ट्रात अभियांत्रिकी, औषधनिर्माणशास्त्र, वैद्यकीय, व्यवस्थापन, कृषी व इतर विद्या शाखांतील अभ्यासक्रमांसाठी प्रवेश प्रक्रिया सुरू असून सदर प्रवेशप्रक्रियेसाठी विविध प्रकारचे दाखले व प्रमाणपत्रांची आवश्यकता असते. आंबेगाव तालुक्यातील बहुतांशी भाग ग्रामीण व दुर्गम असल्याने ह्या भागातील मुलांना दाखले व प्रमाणपत्रे मिळविण्यासाठी महासुविधा केंद्रांवर व तहसील कचेरीत वारंवार हेलपाटे मारावे लागत आहेत. दाखले वितरित करण्यासाठी शासनाने विहित मुदत देखील ठरवून दिली आहे. मात्र याचे पालन प्रशासनाकडून केले जात नाही.

सुविधा केंद्रातील विद्यार्थ्यांचे प्राप्त अर्ज केंद्र चालकांकडून वेळेत संगणकावर अपलोड न केल्याने तसेच दाखले मंजूर करण्यासाठी तहसील प्रशासनाकडून विलंब होत असल्याने आंबेगाव तालुक्यातील शेकडो विद्यार्थी विविध शाखांच्या प्रवेशापासून वंचित राहण्याची शक्यता आहे.

विद्यार्थ्यांच्या ह्या प्रश्नांवर युवासेनेचे राज्य विस्तारक मा.सचिन बांगर यांच्या नेतृत्वाखालील युवासेनेच्या शिष्टमंडळाने विद्यार्थ्यांसमवेत आज तहसीलदार श्रीमती सुषमा पैकीकरी मॅडम यांची भेट घेऊन युवासेनेच्या वतीने याबाबत निवेदन दिले. विद्यार्थ्यांच्या सर्व अर्जांची लगेच पडताळणी करून सर्व विद्यार्थ्यांना तात्काळ दाखले व प्रमाणपत्रे वितरित करण्यात यावीत तसेच एकही विद्यार्थी कागदपत्र व प्रमाणपत्रांअभावी प्रवेशापासून वंचित राहू नये याची खबरदारी तहसील प्रशासनाने घ्यावी अन्यथा युवासेनेच्या वतीने तीव्र आंदोलन छेडण्यात येईल असे यावेळी सचिन बांगर यांनी म्हटले आहे. तसेच विद्यार्थ्यांनी देखील आवश्यक दाखले मिळवण्यासाठी मुदतीपूर्वीच अर्ज दाखल करावेत असे आवाहनही युवासेनेच्या वतीने करण्यात आले.

यावेळी शिवसेनेचे मा.उपतालुकप्रमुख मिलिंद काळे, आंबेगाव तालुका शिवसेना आय.टी. सेल संघटक देविदास आढळराव पाटील, ग्राहक संरक्षक कक्षाचे तालुका अध्यक्ष अमोल काळे, शिवसेना गटप्रमुख धनेश शेवाळे, सुनिल बांगर यांच्यासह मोठ्या संख्येने विद्यार्थी व पालक उपस्थित होते.

Read more...

‘मिनाई’ पुनर्जीवित करण्याचा एकमुखी संकल्प करा. – डॉ.राजेंद्रसिंह राणा

नारायणगाव | आपण आपल्या आईचा, नदी मिनाईचा मृत्यू डोळ्याने पहिला आहे,तिच्या मृत्यूला आपणच सर्वस्वी कारणीभूत आहोत.
मिना नदीचे नैसर्गिक आणि पर्यावरणीय वैभव पुन्हा प्राप्त आणण्यासाठी आम्हांला मिनाईला पुनर्जीवित करावे लागेल त्यासाठी आपण सर्वांनी एकमुखी संकल्प करा असे मनोगत जगविख्यात जलतज्ञ डॉ. राजेंद्रसिंह राणा यांनी नारायणगाव याठिकाणी व्यक्त केले.
ग्रामपंचायत नारायणगाव/वारूळवाडी यांच्या वतीने आयोजित केलेल्या “निर्मल मिनाई संकल्प” अभियानाच्या शुभारंभ प्रसंगी श्री.राणा प्रमुख पाहुणे म्हणून बोलत होते.

नारायणगावचे लोकनियुक्त सरपंच योगेश पाटे हे पर्यावरणप्रेमी युवक असून त्यांनी वृक्षलागवड,प्लास्टिक बंदी,पाणी आडवा पाणी जिरवा प्रकल्प राबवून गावाला नवीन दिशा देण्याचे कार्य केले आहे.
अशा निसर्गप्रेमी सरपंचाच्या नेतृत्वावर विश्वास ठेवून सर्वांनी सहकार्य करावे असे आवाहन डॉ.राणा यांनी केले.

मिना नदीच्या पुनर्जीवीकरण प्रकल्प राबविण्यासाठी पाच कलमी कार्यक्रम राबवून आपल्याला ठोस परिवर्तन घडवून आणावे लागेल.
सर्व नागरिक,परीसरातील शैक्षणिक,धार्मिक,सामाजिक संस्थांनी या उपक्रमात कृतीशील सहभाग घेणे आवश्यक आहे.
शासन स्तरावरील अधिकारी व संबंधित अधिकारी व संभधित विभागांनी सकरात्मक भूमिका ठेवून नदीच्या उगमापासून ते संगमापर्यंत नदी पुनर्जीवनाचा कार्यक्रम यशस्वी होण्यासाठी समाजास दिशा द्यावी एकत्रित व सांघिक प्रयत्नाशिवाय हे कार्य शक्य नाही.
त्यासाठी सर्वांनी एकत्रित येऊन या पवित्र कार्यात सहभागी व्हा असेही डॉ.राणा यांनी सांगितले.

यावेळी महाराष्ट्र राज्याचे माजी अतिरिक्त सचिव लिना मेहेंद्रळे,महाराष्ट्र जीवन प्राधिकरण अधीक्षक अभियंता सुभाष भुजबळ,यशदाचे कार्यकारी संचालक सुमंत पांडे,कृषी विज्ञान केंद्रचे अध्यक्ष अनिलतात्या मेहेर,आमदार शरद सोनवणे,गटनेत्या आशाताई बुचके,तात्यासाहेब गुंजाळ,बाळासाहेब पाटे,स्वाती दीक्षित,विना पाटील,पंचायत समिती सदस्या अर्चना माळवदकर,मनोहर डोळे मेडिकल फाउंडेशनचे डॉ.संदीप डोळे,डॉ.सदानंद राऊत, डॉ.आनंद कुलकर्णी,डॉ.अनिल शेवाळे,मा.उपसरपंच संतोष वाजगे,संतोषनाना खैरे,उपसरपंच मनीषा मेहेत्रे,वारूळवाडीचे उपसरपंच सचिन वारुळे,अरविंद ब्रमहें इत्यादी मान्यवर उपस्थित होते.

दरम्यान मिना नदी स्वच्छतेसाठी श्री विरोबा पतसंस्थेच्या वतीने १ लाख रु.ची रक्कम देण्यात आली.
या अभियानाची सुरुवात जलदिंडीने करण्यात आली सकाळी ९ वाजता ग्रामदैवत हनुमान मंदिरामध्ये ब्रम्ह कुमारी विश्वविद्यालयाच्या प्रमुख संगीता बहेनजी,ज्येष्ठ सामाजिक विचारवंत अरविंद ब्रमहें यांच्या हस्ते व डॉ.राजेंद्रसिंह राणा,सुभाष भुजबळ यांच्या प्रमुख उपस्थित झाले झाले.

जलदिंडीमध्ये गावातील नागरिक,शालेय विद्यार्थी,विविध सामाजिक संस्था यांनी उत्स्फूर्तपणे सहभाग घेतला.
या दिंडीचे स्वागत ठिकठिकाणी मोठ्या उत्साहात करण्यात आले.

ग्रामपंचायत नारायणगाव यांच्या वतीने सुरू करण्यात आलेल्या स्पर्धा केंद्राचे उदघाटन डॉ.राजेंद्रसिंह राणा यांच्या हस्ते करण्यात आले.
निर्मल मिनाई संकल्प अभियानासाठी डॉ.राणा यांच्या सूचनेनुसार लोकनियुक्त सरपंच योगेश पाटे यांच्या नेतृत्वाखाली विविध स्थरातील प्रतिनिधी समितीची स्थापना करण्यात आली कार्यक्रमासाठी महाराष्ट्रातील अनेक जलदूतांनी उपस्थित राहुन या अभियानास सक्रिय सहभागाची तयारी दर्शवली.
यावेळी गटनेत्या आशाताई बुचके,कृषी केंद्राचे अनिलतात्या मेहेर,यशदाचे संचालक सुमंत पांडे,लीला मेहंदळे यांची भाषणे झाली.

कार्यक्रमाचे प्रास्ताविक सरपंच योगेश पाटे यांनी केले कार्यक्रमाच्या यशस्वी आयोजनासाठी उपसरपंच संतोष दांगट,आरिफ आतार,राजेश बाप्ते,गणेश पाटे,भाग्येश्वर डेरे,सर्व ग्रामपंचायत सदस्य ग्रामविकास अधिकारी नितीन नाईकडे,गटविकास अधिकारी विकास दांगट,आशिष माळवदकर,अजित वाजगे,दीपक वारुळे,जितेंद्र गुंजाळ,निलेश जाधव, जयेश कोकणे,अंगणवाडी सेविका व आशा वर्कर्स,ग्रामपंचायत कर्मचारी यांनी विशेष परिश्रम घेतले.
या कार्यक्रमाचे सूत्र संचालन तंटामुक्तीचे अध्यक्ष ज्ञानेश्वर औटी व मेहबूब काझी यांनी केले.

Read more...

नारायणगाव येथे एमपीएससी – युपीएससी अभ्यासिकेचे उद्घाटन संपन्न

नारायणगाव परिसरातील विद्यार्थ्यांना होणार अभ्यासिकेचा फायदा

सजग वेब टिम, नारायणगाव

नारायणगाव| ग्रामपंचायत नारायणगावच्या माध्यमातुन श्री. छत्रपती शिवाजी सार्वजनिक वाचनालय येथे सुरु करण्यात अालेल्या MPSC – UPSC अभ्यासिकेचे उद्घाटन नोबेल पुरस्कार विजेते जलपुरुष राजेंद्रसिंह राणा व महाराष्ट्र जीवन प्राधिकरणचे अधिक्षक अभियंता सुभाष भुजबळ यांच्या हस्ते करण्यात आले. या अभ्यासिकेचा फायदा स्पर्धा परिक्षेची तयारी करणार्‍या विद्यार्थ्यांना होणार असून अभ्यासिका सुरु केल्याबद्दल नागरिकांनी ग्रामपंचायतचे कौतुक केले आहे.

यावेळी गटविकास अधिकारी विकास दांगट, सरपंच योगेश पाटे, मनिषा मेहेत्रे, संतोष दांगट, बाळासाहेब पाटे, आरिफ आतार, राजेश बाप्ते, भागेश्वर डेरे, ड‍ाॅ.संदिप डोळे, नितीन नाईकडे यांसह ग्रामपंचायत सदस्य व ग्रामस्थ मोठ्या संख्येने उपस्थित होते.

Read more...

तेलदरा आपतग्रस्त कुटुंबियांची अतुल बेनके यांनी घेतली भेट

राष्ट्रवादी काँग्रेसकडून आपतग्रस्तांना भरीव मदत

सजग वेब टिम, जुन्नर

ओतूर | जुन्नर तालुक्यातील तेलदरा याठिकाणी पावसाने घर कोसळून वैष्णवी भुतांबरे आणि कार्तिक केदार या दोन लहान मुलांचा दुर्दैवी मृत्यू झाला. राष्ट्रवादी काँग्रेसचे युवा नेते  अतुल बेनके यांनी काल या दोन्ही कुटुंबियांची भेट घेऊन सांत्वन केले आणि मानसिक आधार दिला.

या भेटी दरम्यान बेनके यांनी घटनेची माहिती घेऊन लागलीच जिल्हाधिकारी नवल किशोर राम यांना या संबंधीची माहिती कळवून या दोन्ही आपतग्रस्त कुटुंबियांना शासनाच्या माध्यमातून ४ लाख रु. मदत खासदार डॉ अमोल कोल्हे आणि राष्ट्रवादी काँग्रेसच्या प्रयत्नातून शासकीय मदत मिळवून दिली.

तसेच जिल्हा परिषद सदस्य मोहित ढमाले व पंचायत समिती सदस्य विशाल तांबे यांच्या माध्यमातून जिल्हा परिषद मधून घरकुलही मंजूर करून देण्यात आले आहे. पावसामुळे झालेलं घराचं नुकसान आणि संपूर्ण संसारच वाऱ्यावर आल्याने त्या कुटुंबियांना मदत म्हणून बेनके यांनी तातडीने २१ हजार रु.चा किराणाही भरून दिला अशी माहिती राष्ट्रवादी काँग्रेसच्या मीडिया विभागाकडून देण्यात आली आहे.

Read more...