पांडुरंग पवार यांच्या निधीतून बांगरवाडी पाझरतलाव दुरुस्ती ग्रामस्थांमध्ये समाधान

बांगरवाडी परिसर कायमस्वरूपी दुष्काळमुक्त करण्यासाठी नियोजनपूर्वक प्रयत्न करणार – पांडुरंग पवार
बेल्हे | बांगरवाडी येथील १९७८ साली बांधलेला व त्यावेळी झालेल्या निकृष्ट कामामुळे सध्या कुचकामी ठरलेल्या पाझरतलावाचे दुरुस्तीचे काम जिल्हा परिषदेच्या माध्यमातून जिल्हा परिषद सदस्य पांडुरंग पवार यांच्या विशेष प्रयत्नांतून प्रगतीपथावर आहे.
यामुळे पावसाळ्यानंतर परिसरातील विहिरींची व विंधनविहीरींची पाणीपातळी वाढण्यास मदत होणार असून, आगामी काळात परिसरातील दुष्काळी परिस्थितीवर मात करण्यासाठी हा पाझरतलाव विशेष फायदेशीर ठरणार आहे.बांगरवाडी येथे गावठाण हद्दीजवळ दुधवडी व बांधुडा या दोन डोंगरांच्यामध्ये सुमारे चाळीस वर्षांपूर्वी झालेला जुना पाझरतलाव आहे. या पाझर तलावातून पावसाळ्यात तलाव भरल्यावर मोठ्या प्रमाणावर पाण्याची गळती होत होती असून अडचण व नसून खोळंबा अशी या पाझरतलावाची परिस्थिती होती व  गळतीमुळे पाणी वाहून जात असल्याने पाण्याचा विशेष फायदा होत नव्हता. या पाझर तलावाच्या दुरुस्तीसाठी जिल्हा परिषद सदस्य पांडुरंग पवार यांच्या विशेष प्रयत्नांतून, जिल्हा परिषदेच्या माध्यमातून जवळपास २२ लाख रुपयांचा निधी मंजूर झालेला आहे.
या दरम्यान या पाझर तलावाच्या दुरुस्तीचे काम सध्या प्रगतीपथावर असून, काल (ता.२९) सकाळी या कामाची जिल्हा परिषद सदस्य पांडुरंग पवार यांनी प्रत्यक्ष पाहणी केली. याप्रसंगी सरपंच जालिंदर बांगर, उपसरपंच हेमलता बांगर, बाळशीराममहाराज  बांगर, प्रदीप पिंगट, मोहन बांगर, मंगेश बांगर, बाबू बांगर, सचिन बांगर, गोविंद बिचारे आदींसह ग्रामस्थांची उपस्थिती होती. दरम्यान या पाझर तलावाची पाण्याची गळती थांबविण्यासाठी बंधाऱ्याच्या भिंतीत ६० ते ७० फूट खोल चर खोदून ५०० मायक्रोन जाडीचा प्लास्टिक कागद टाकून माती टाकून त्यावर रोलिंग करण्यात आले असल्याचे पांडुरंग पवार यांनी सांगितले. हा प्लास्टिक कागद सुमारे ६० वर्षे टिकू शकतो.या बंधाऱ्यात एकूण २.४३ दशलक्ष घनमीटर एवढा पाणीसाठा होणार असून बांगरवाडीचा पाणिप्रश्न सुटणार असल्याचेही पांडुरंग पवार यांनी सांगितले.आगामी काळात बांगरवाडी परिसर कायमस्वरूपी दुष्काळमुक्त करण्यासाठी नियोजनपूर्वक प्रयत्न करणार असल्याचेही पांडुरंग पवार यांनी स्पष्ट केले.

(more…)

Read more...

राज्याच्या आदिवासी विकास आढावा समिती अध्यक्षपदी विवेक पंडित 

पदाचा वापर केवळ आदिवासी विकासासाठीच – विवेक पंडित

सजग वेब टिम, मुंबई

उसगाव/ मुंबई राज्यातील आदिवासी भागातील दुर्बल घटक  आदिवासींच्या विकासाशी निगडित शासनाच्या विविध उपक्रमांचा, उपाययोजनांचा, शासनाच्या धोरणांचा अमलबजावणीबाबत आढावा घेण्यासाठी शासनाने स्थापन केलेल्या आदिवासी क्षेत्र आढावा समितीच्या अध्यक्ष पदावर श्रमजीवी संघटनेचे संस्थापक आणि  विधानसभेचे माजी सदस्य विवेक पंडित यांची फेब्रुवारी महिन्यात नियुक्ती करण्यात आली होती. आज (दि.२८ मे) रोजी राज्य शासनाने शासन निर्णय पारित करून शासनाने पंडित यांना राज्यमंत्री दर्जा दिला आहे.मंत्रिपदाचा मोह कधीही नव्हता आणि नसेल,या पदाचा वापर केवळ आदिवासी विकास आणि आदिवासी दुर्बलांच्या हितासाठी करण्यात येईल असे पंडित यांनी सांगितले. विवेक पंडित यांच्या सामाजिक योगदान आणि अनुभवाचा सन्मान केल्याबद्दल मुख्यमंत्री देवेंद्र फडणवीस यांचे श्रमजीवी संघटनेच्या वतीने अध्यक्ष रामभाऊ वारणा यांनी आभार व्यक्त केले.
राज्यातील आदिवासी क्षेत्रात आजही कुपोषण, बेरोजगारी, आरोग्याचे प्रश्न, आदिवासींचे स्थलांतर, आदिवासींचे शिक्षण इत्यादी अनेक प्रश्न वर्षानु वर्षे प्रलंबित आहेत. याबाबत अनेकदा मागण्या,  आंदोलन होतात, सरकार दरबारी निर्णय होतात, धोरणं बनवली जातात, निधीची तरतूद केली जाते मात्र अमलबजावणीतील त्रुटींमुळे हे सर्व प्रश्न प्रलंबीतच राहतात. वेळोवेळी योग्य पाठपूरठा आणि आढाव्याच्या अभावी त्या धोरणांना न्याय मिळत नाही. याबाबत आदिवासी विकासाशी संबंधित सर्व खात्यांवर लक्ष केंद्रित करून आढावा घेणाऱ्या यंत्रणेच्या निर्मीती बाबत सरकार विचारधीन होते. नुकतेच सरकारने राज्यस्तरीय आढावा समितीची निर्मिती करून या समितीच्या अध्यक्षपदी विवेक पंडित यांची नियुक्ती केल्याचे जाहीर केले. या समिती मध्ये , वित्त विभाग, शालेय शिक्षण विभाग,
पाणी पुरवठा व स्वछता विभाग,  विभागांचे अपर मुख्य सचिव तसेच सार्वजनिक आरोग्य विभाग, अन्न नागरी पुरवठा व ग्राहक संरक्षण विभाग, नगर विकास विभाग, आदिवासी विकास विभाग,(ग्राम विकास व पंचायत राज), ग्राम विकास व जलसंधारण विभाग या विभागाचे प्रधान सचिव,  महिला व बाल विकास विभागाचे सचिव, माहिती व प्रसिद्धी विभागाचे महासंचालक, आयुक्त, अन्न व औषध प्रशासन, मुंबई, राष्ट्रीय ग्रामीण आरोग्य मिशन आणि राजमाता जिजाऊ माता- बाल आरोग्य व पोषण मिशन मुंबई, चे मिशन महासंचालक, आयुक्त , आदिवासी विकास, नाशिक ,आयुक्त, एकात्मिक बाल विकास सेवा योजना हे सर्व उच्च पदस्थ अधिकारी या समितीचे सदस्य म्हणून काम पाहणार असून आदिवासी विकास विभागाचे सह सचिव/ उपसचिव  समीतीचे सदस्य सचिव असतील.
आज या बाबत शासना तर्फे राज्य शासनाचे कार्यासन अधिकारी प्रकाश वाजे यांनी शासन निर्णय जारी करून अध्यक्ष पंडित यांना राज्यमंत्री दर्जा आणि या पदासाठी उपलब्ध सुविधा आणि सेवा याबाबतचा तपशील जाहीर केला.
आदिवासी विभागासह आदिवासी भागात राबविण्यात येणाऱ्या इतर विभागांच्या योजनांच्या अंमलबजावणीतील त्रुटीचा आढावा घेऊन योजनांचा लाभ प्रत्यक्ष तळागाळातील घटकापर्यंत पोहचविण्याचा प्रयत्न आधी करणार असून, येत्या काळात आदिवासींच्या जीवनाशी निगडित कुपोषण, बेरोजगारी, शिक्षण, स्थलांतर, वनाचा हक्क या आणि  यासारख्या इतर प्रश्नाबाबत प्रभावी कृती कार्यक्रम आखण्यात येईल असेही यावेळी विवेक पंडित यांनी सांगितले.

Read more...

समर्थ इन्स्टिट्यूट व टोयोटा किर्लोस्कर मोटार प्रा.लि.यांच्यात तिसरा सामंजस्य करार

सजग वेब टिम, जुन्नर (सुधाकर सैद)
बेल्हे | समर्थ रूरल एज्युकेशनल इन्स्टिट्यूट संचलित समर्थ औद्योगिक प्रशिक्षण संस्था बेल्हे व टोयोटा किर्लोस्कर मोटर प्रा.लि.यांच्यामध्ये पुणे जिल्ह्यातील दुसरा व महाराष्ट्र राज्यातील तिसरा सामंजस्य करार करण्यात आलेला आहे.टोयोटा किर्लोस्कर मोटार या कंपनीच्या माध्यमातून समर्थ शैक्षणिक संकुलात ऑटोमोबाईल बॉडी रिपेअर व ऑटोमोबाईल पेंट रिपेअर हे एक एक वर्षाचे दोन अभ्यासक्रम प्रशिक्षण व तांत्रिक शिक्षण विभाग,एन सी व्ही टी दिल्ली सरकारच्या सहकार्याने विकसित करण्यात आलेले आहेत.या अभ्यासक्रमांना प्रत्येकी २१ याप्रमाणे ४२ विद्यार्थी प्रवेशित झालेले होते.
अद्ययावत प्रशिक्षण उपकरणे, प्रशिक्षण सामग्री,साधने, तज्ञ व्यक्तीचे मार्गदर्शन इत्यादी सर्व प्रकारच्या सुविधा या विद्यार्थ्यांना प्रदान केलेल्या आहेत.ग्रामीण भागातील विद्यार्थ्यांना दर्जेदार तांत्रिक व गुणवत्तापूर्ण शिक्षण देणे आणि कुशल व सक्षम होण्यासाठी प्रशिक्षित करणे हे आमच्या संस्थेचे ब्रीद आहे असे शॉ टोयोटा पुणे चे मुख्य कार्यकारी अधिकारी प्रताप पालवनकर यांनी सांगितले.
सदरच्या कॅम्पस ड्राइव्ह मध्ये २८ विद्यार्थ्यांची निवड करण्यात आली.या विद्यार्थ्यांना संपत हाडवळे व स्वप्नील कवडे यांनी प्रशिक्षण दिले.
यावेळी टोयोटा किर्लोस्कर मोटर्स प्रा.लि.चे पश्चिम विभाग ट्रेनिंग हेड प्रदीप दत्त गुप्ता,बिक्रम वर्मा आदी उपस्थित होते.या कामगिरीबद्दल संस्थेचे अध्यक्ष वसंतराव शेळके,उपाध्यक्ष माऊली शेळके,सचिव विवेक शेळके,विश्वस्त वल्लभ शेळके यांनी सर्व प्रशिक्षकांचे अभिनंदन केले व सातत्यपूर्ण काम हाच यशाचा गाभा असून त्याचे उदात्तीकरण व अंमलबजावणी यापुढेही अशीच वृद्धींगतपणे होवोत अशा सदिच्छा दिल्या.
Read more...

“दिल्या घरी सुखी राहा” निकमांचा गिरेंना टोला

 

सजग वेब टीम, आंबेगाव

मंचर | ” शिरूर लोकसभा मतदार संघात २०१४ मध्ये मोदी लाटेमुळे मला यश आले नाही. मात्र त्यावेळी आमच्यात राहून विरोधकांना मदत करण्याचे काम राष्ट्रवादी काँग्रेसचे तत्कालीन तालुकाध्यक्ष अरुण गिरे यांनी केले. त्यांनी सूर्याजी पिसाळ यांनाही लाजवेल असा दगाफटका केला.” असा पलटवार शिरूर लोकसभा मतदार संघाचे राष्ट्रवादी कॉंग्रेसचे प्रचार प्रमुख व मंचर बाजारसमितीचे सभापती देवदत्त निकम यांनी केला आहे.

घासून नव्हे तर अगदी ठासून १८ हजार मतांचा दगाफटका गेल्या लोकसभा निवडणुकीत दिलीप वळसे पाटील यांनी दिल्यामुळेच निकम पराभूत झाल्याची कबुली निकम यांनी दिली. असा आरोप गिरे यांनी पत्रकारांशी बोलताना केला होता.

या आरोपाला सडेतोड उत्तर देताना देवदत्त निकम म्हणाले, ” राष्ट्रवादी कॉंग्रेस पक्षाचे अध्यक्ष शरद पवार आणि विधानसभेचे माजी अध्यक्ष दिलीप वळसे पाटील यांनी मला लोकसभेची उमेदवारी दिली. निवडून आणण्यासाठी वळसे पाटील यांनी जीवाचे रान केले. पण मोदी लाटेमुळे माझा पराभव झाला. माझ्या सारख्या शेतकरी कुटुंबातील तरुणाला भीमाशंकर कारखान्याच्या अध्यक्ष पदावर दोन वेळा व बाजारसमितीच्या सभापतीपदी काम करण्याची संधी वळसे पाटील यांनी दिली आहे. प्रामाणिकपणे काम करणाऱ्याला संधी देण्याचे धोरण वळसे पाटील व राष्ट्रवादी कॉंग्रेस पक्षाचे आहे.”

गिरे हे एका गॅरेज मध्ये काम करत होते. त्यांना विद्यार्थी काँग्रेसचा युवक अध्यक्ष करण्यासाठी मी पुढाकार घेतला होता. त्यानंतर त्यांना निवडून आणून पुणे जिल्हा परिषदेच्या उपाध्यक्षपदी काम करण्याची संधी वळसे पाटील यांनी दिली. त्यावेळी शिक्षकांच्या बदल्याचे प्रकरण संपूर्ण राज्यात गाजले होते. शिवसेनेच्या एका महिला सदस्याने गिरे यांना जिल्हा परिषद सभागृहात झोडपून काढल्याचे सर्वश्रुत आहे. जून २०१४ मध्ये मंचर येथे राष्ट्रवादी कॉंग्रेस पक्षाच्या मेळाव्यात आपणच बोलला होता की, मी पक्ष बदलला तर मला फाशी द्या. हे आपले फेकू वाक्‍य जनता विसरलेली नाही.

गेल्या लोकसभा निवडणुकीत गिरे हे राष्ट्रवादी कॉंग्रेस पक्षाचे तालुकाध्यक्ष होते. सदसदविवेक बुद्धीला स्मरून त्यांनी सांगावे की, तुम्ही माझे मनापासून काम केले की विरोधात काम केले ? हे संपूर्ण जनतेला ठाऊक आहे. तुम्ही विरोधी काम करूनही व कमी कालावधी मिळूनही या मतदार संघातील जनतेने चांगले मताधिक्‍य दिले. याच मतदारसंघात तुम्हाला राष्ट्रवादी कॉंग्रेस पक्षाने व पक्षनेतृत्वाने एवढी मोठी पदे देऊनही आपण पक्षाशी व पक्ष नेतृत्वाशी बेइमानी करून शिवसेनेचे उमेदवार म्हणून उभे राहिलात, तेव्हा ह्याच जनतेने आपल्याला थोडेथोडके नव्हे तर तब्बल ५८ हजारांच्या फरकाने उचलून टाकले आहे. स्वतःच्या मेंगडेवाडीतही बहुमत मिळाले नाही. यावरून आपली आपल्या गावातील लोकप्रियता समजून येते. नेतृत्वाशी बेईनामी करणे हे आमचे पिंड नाही. आमचे एवढेच सांगणे आहे की, ‘दिल्या घरी सुखी रहा’.

केंद्र व राज्य पातळीवरील विविध कामे, प्रकल्प याचे निर्णय कोण घेते. हे आपले अज्ञान आहे. त्यामुळे विमानतळ , रेल्वे, महामार्ग ह्या प्रश्नावर कोणाला जबाबदार धरावे? याचेही ही आपल्याला भान राहत नाही, त्यामुळे अर्थहीन प्रश्न उपस्थित करून जनतेची दिशाभूल करणे थांबवा. ह्या प्रश्नांबाबत निवडणूक प्रचारात मी “लावरे तो व्हिडीओ” हे आपण पाहिले नसेल तर जरूर पाहून घ्या.

पराग साखर कारखान्याची उभारणी ही शिरूर तालुक्‍यातील शेतकऱ्यांच्या मागणीनुसार करण्यात आली आहे. पराग मुळे रोजगार निर्मिती झाली आहे. पराग कारखाना यावर्षी नसता तर शिरूर तालुक्‍यातील पाण्याअभावी जळणाऱ्या उसाचे काय झाले असते ? हे तेथील शेतकऱ्यांकडून जाणून घ्या. भीमाशंकर च्या बाबतीत तुम्ही चिंता करण्याचे अजिबात कारण नाही, जनतेने निवडून दिलेले लोकनियुक्त संचालक मंडळ सक्षम आहे व ते चांगले काम करत आहे.

२३ तारखेला आढळराव पाटील यांचे काय होणार याचा अंदाज आला आहे. आढळराव हे विधानसभेला उभे राहतील. त्यानंतर आपले भवितव्य काय आहे ? असा प्रश्न गिरे यांना भेडसावू लागल्याने आपले अपयश झाकण्यासाठी इतरांवर बिनबुडाचे आरोप ते करत आहेत. विधानसभेला राष्ट्रवादी कॉंग्रेस पक्षाच्या उमेदवारीची तुम्ही चिंता करण्यापेक्षा शिवसेनेचा उमेदवार कोण असेल व त्यात आपला नंबर कुठे आहे. याचे आत्मचिंतन करावे. असा सल्लाही गिरे यांना निकम यांनी दिला आहे.

Read more...

शिवसेनेतील नाराजांचा आणि सोनवणेंच्या जातीयवादी प्रचाराचा आढळरावांना फटका – अतुल बेनके

 

सजग वेब टिम, जुन्नर

नारायणगाव : जुन्नर विधानसभा मतदार संघातून शिरूर लोकसभा मतदार संघाचे राष्ट्रवादी कॉंग्रेस,कॉंग्रेस आघाडीचे उमेदवार डॉ. अमोल कोल्हे यांना चाळीस ते पंचेचाळीस हजार मतांची आघाडी निश्‍चित मिळेल.असा विश्‍वास युवक राष्ट्रवादी कॉंग्रेसचे राज्य उपाध्यक्ष अतुल बेनके यांनी व्यक्त केला आहे.

जुन्नर तालुका हा कोल्हे यांचा तालुका असल्याने येथून ते किती मताधिक्य घेणार यावर त्यांच्या विजयाचे गणित अवलंबून आहे. जुन्नरमधून त्यांना मोठी आघाडी भेटली तर ते चांगली लढत देऊ शकतील. राष्ट्रवादीच्या नेत्यांना तरी त्यांनाच आघाडी मिळेल, याचा विश्वास वाटतो आहे.

बेनके म्हणाले, विधानसभेचे माजी अध्यक्ष दिलीप वळसे पाटील यांच्या मार्गदर्शनाखाली राष्ट्रवादी कॉंग्रेसच्या वतीने जुन्नर तालुक्‍यात नियोजनबद्ध प्रचार यंत्रणा राबवली होती. प्रचारात राष्ट्रवादी कॉंग्रेस,कॉंग्रेस व मित्र पक्षाचे कार्यकर्ते एकदिलाने सहभागी झाले होते. खासदार शिवाजीराव आढळराव पाटील हे उद्योजक असल्याने या भागात तरुणांना रोजगार मिळवून देण्यासाठी प्रयत्न करतील,शेती पूरक व्यवसाय सुरू करतील या भावनेने मतदारांनी मागील तीन निवडणुकीत आढळराव पाटील यांना मोठ्या विश्‍वासाने संधी दिली होती. मात्र शेती, सिंचन, सहकार, दळणवळण या सर्व आघाडीवर खासदार आढळराव पाटील अपयशी ठरले.

निवडणुकीच्या तोंडावर खासदार आढळराव पाटील यांच्या पुढाकारामुळे आमदार शरद सोनवणे यांनी शिवसेनेत प्रवेश केला. महामार्गाचे काम अपूर्ण असताना आमदार सोनवणे यांनी चाळकवाडी येथे टोल सुरू करुण टोलचा झोल केला. यामुळे शिवनसेच्या गटनेत्या अशा बुचके यांच्या नाराज समर्थकांच्या नाराजीचा फटका आढळराव पाटील यांना बसणार आहे. निवडणुकीच्या अंतिम टप्प्यात आमदार सोनवणे यांनी तालुक्‍यात जातीयवादी प्रचार सुरू केला. धर्मवीर संभाजी महाराज यांच्या भूमिकेमुळे घराघरांत पोचलेले डॉ. अमोल कोल्हे यांना महिला, युवती व तरुणांकडून चांगला प्रतिसाद मिळाला. निवडणूक प्रचारात खासदार आढळराव पाटील व शिवसेनेचे नेते डॉ.कोल्हे यांच्यावर खालच्या पातळीवर वैयक्तिक टीका केली.मात्र डॉ.कोल्हे यांनी सुसंस्कृतपणे प्रचार केला.ठिकठिकाणच्या ग्रामस्थांनी वर्गणी काढून डॉ. कोल्हे यांना मदत केली, असे बेनके यांनी सांगितले.

Read more...

विनापरवाना बैलगाडा शर्यत भरवल्या प्रकरणी ७ जणांवर गुन्हा दाखल

सजग वेब टिम, आंंबेगाव (प्रमोद दांगट)

गावडेवाडी | येथे बैलगाडा शर्यतीवर न्यायालयाची बंदी असतानाही विनापरवाना बैलगाडा शर्यतीचे आयोजन केल्याप्रकरणी ७ जणांच्या विरोधात मंचर पोलिस ठाण्यात गुन्हा दाखल करण्यात आला आहे.
विजय विलास कराळे वय ३३,गौरव रामदास गावडे वय ३१,सचिन बबन गावडे वय २९,कैलास भगवन्त गावडे ४०,देवराम बाळकृष्ण गावडे वय ५०,भास्कर बाबासाहेब जगताप वय ४०,संदीप भाऊसाहेब गावडे सर्व रा गावडेवाडी ता आंबेगाव अशी गुन्हा दाखल झालेल्याची नावे आहेत.

मंचर पोलीस ठाण्याचे पोलीस हवालदार राजेंद्र हिले यांनी याबाबत फिर्याद दिली आहे
गावडेवाडी येथे शनिवारी (दि १८ रोजी) सकाळी ८.४५ वाजता गावडेवाडी येथील बैलगाडा घाटात विनापरवाना काही लोकांनी बैलगाडा शर्तीचे आयोजन केल्याची माहिती मंचर पोलीस निरीक्षक कृष्णदेव खराडे, बिटजमादार सुनील शिंदे,राजेंद्र हिले,पोलीस शिपाई योगेश रोडे ,रमेश करंडे याना माहिती मिळाली असता पोलीस उपनिरीक्षक सोमनाथ पांचाळ,पोलीस नाईक राजेंद्र हिले यांनी तात्काळ घटनास्थळी जाऊन तेथील लोकांना न्यायालयाच्या निर्देशानुसार बैलगाडा शर्यतीस बंदी असल्याचे सांगितले,तसेच नियमाचे उल्लंघन केल्यास कायदेशीर कार्यवाई करण्याचा इशारा दिला तरी देखील काहींनी बैलगाडा शर्यत चालू ठेवली ,त्यामुळे पोलिसांनी बैलगाडा शर्यतीचे आयोजक व बैलगाडा मालक अश्या ७ जणांवर गुन्हा दाखल केला आहे पोलीस जमादार सुनील शिंदे पुढील तपास करत आहे. मा. न्यायालयाच्या आदेशानुसार बैलगाडा शर्यती वर बंदी असून कुठेही बैलगाडे पळवणे हा कायद्याने गुन्हा आहे.त्यामुळे कुणीही बैलगाडे पळवून कायदा हातात घेऊ नहे असे आवाहन पोलीस निरीक्षक कृष्णदेव खराडे यांनी केले आहे.

Read more...

खेड तालुक्यातून अमोल कोल्हेंना ३० हजाराचे लिड : दिलीप मोहिते पाटील

 

सजग वेब टीम, राजगुरूनगर

राजगुरूनगर : शिरूर लोकसभा मतदारसंघाचे राष्ट्रवादी काँग्रेसचे उमेदवार डॉ. अमोल कोल्हे यांना खेड तालुक्यातून ३० ते ४० हजारांचे मताधिक्य मिळेल, असा दावा खेडचे माजी आमदार दिलीप मोहिते पाटील यांनी केला आहे. महिला, तरुण, माळी समाज आणि इतर मागासवर्गीयांची बहुतांश मते राष्ट्रवादीला मिळतील असा विश्वास त्यांनी बोलून दाखविला आहे.

आम्ही तालुक्याच्या गावागावात प्रचार केला, शंभर ते सव्वाशे कोपरसभा आणि नऊ-दहा मोठ्या सभा घेतल्या. सर्वठिकाणी आम्हाला उत्तम प्रतिसाद मिळाला. याउलट विरोधी लोकांच्या सभांना गर्दी होत नव्हती. त्यांची उद्धव ठाकरेंची सभाही फ्लॉप झाली. पंतप्रधान मोदींची हवाही कुठे दिसली नाही. प्रचाराच्या शेवटच्या दिवशी त्यांना तालुक्यात सभाही घेता आली नाही. शेवटच्या दिवशी राजगुरूनगरमध्ये झालेल्या शिवसेनेच्या रॅलीला दोनशे लोकही नव्हते. याउलट त्याच दिवशी डॉ. कोल्हेंच्या रॅलीला प्रचंड गर्दी उसळली होती. मात्र डॉ. कोल्हे यांना सर्वठिकाणी उदंड प्रतिसाद मिळणारा यावरून तालुक्यात त्यांना ३० ते ४० हजारांचे मताधिक्य मिळेल, असा विश्वास मला वाटतो, असे मोहिते म्हणाले.

आम्ही नेत्यांनी गावागावात प्रचार केला, मात्र गावातील कार्यकर्त्यांना गावातच ठाण मंडून बसण्यास सांगितले होते. आम्ही गावात गेल्यावर खासदारांनी तुमच्या गावात काय काम केले ? आणि खासदार कधी तुमच्या गावात आले होते का ? एवढे दोन प्रश्न आवर्जून विचारायचो. त्यांची उत्तरे बहुतांशवेळा नकारार्थी यायची. त्यावर मग त्यांना मत कशासाठी द्यायचे असा प्रश्न विचारल्यावर लोकांच्या लक्षात वस्तुस्थिती यायची आम्हाला सकारात्मक वातावरण तयार व्हायचे. याउलट नोटबंदी, जीएसटी, बैलगाडा शर्यती आणि खोट्या आश्वासनांमुळे विरोधी बाजूंवर लोकांचा राग दिसत होता. शिवसेना आणि भाजपचे लोक एकमेकांबरोबर प्रचंड भांडत होते आणि त्यानंतर अचानक गळ्यात गळे घालू लागले हेही लोकांना पटले नाही, त्यामुळे तालुक्यात आम्हाला मताधिक्य निश्चित असल्याचे असेही मोहिते यांनी सांगितले.

Read more...

आंबेगाव विधानसभेचा शिवसेनेचा उमेदवार कोण? शिरूरच्या निकालाकडे तालुक्याचे लक्ष

सजग वेब टीम, आंबेगाव

मंचर : पुणे जिल्ह्यातील आंबेगाव विधानसभा मतदारसंघात शिवसेनेकडून उमेदवारी मिळविण्यासाठी शिवसेनेचे सहसंपर्क प्रमुख अँड अविनाश रहाणे, प्रदूषण नियंत्रण मंडळाचे सदस्य सुरेश भोर, पुणे जिल्हा परिषदेचे माजी उपाध्यक्ष अरुण गिरे, जिल्हा परिषदेच्या माजी सदस्या जयश्री पलांडे आदी इच्छुकांची गर्दी वाढली आहे. शिरूर लोकसभा निवडणूक निकालाच्या गणितावरच आंबेगावचा शिवसेनेचा उमेदवार ठरणार आहे. विधानसभेचे माजी अध्यक्ष दिलीप वळसे पाटील यांची उमेदवारी राष्ट्रवादी कॉंग्रेस कडून निश्‍चित आहे.

आंबेगाव विधानसभा मतदारसंघ हा दिलीप वळसे पाटील यांचा बालेकिल्ला म्हणून ओळखला जातो. गेल्या सहा विधानसभा निवडणुका वळसे पाटील यांनी जिंकल्या आहेत. विशेष म्हणजे प्रत्येक निवडणुकीत मताधिक्‍याची कमान वाढती ठेवण्यात ते यशस्वी ठरले आहेत. गेल्या लोकसभा निवडणुकीत आंबेगाव मधून आढळराव यांनी १८ हजार ७०० मताधिक्‍य घेतले होते. त्यानंतर झालेल्या विधानसभा निवडणुकीत म्हणजे २०१४ च्या विधानसभा निवड़णुकीत अरुण गिरे यांना विधानसभेला उमेदवारी देवून वळसे पाटील यांच्यासमोर आव्हान उभे करण्याचा प्रयत्न झाला होता.

प्रत्यक्षात निवडणूक निकालात वळसे पाटील ५९ हजार मताधिक्‍याने विजयी झाले. त्यामुळे वळसे पाटील यांच्या विरोधात कोणता तगडा उमेदवार द्यावा याची चर्चा शिवसेनेत सुरु झाली आहेत.

वळसे पाटील यांचा विजय रथ रोखण्यासाठी २००९ च्या विधानसभा निवडणुकीत कल्पना आढळराव पाटील यांना उतरविले होते. पण त्यांचाही पराभव झाला होता. वळसे पाटील यांना ३७ हजाराचे मताधिक्‍य मिळाले होते. या उमेदवारा व्यतिरिक्त राष्ट्रवादी कॉंग्रेसचा एखादा मोठा कार्यकर्ता गळाला लावण्याची खेळीही शिवसेनेकडून होवू शकते. शिवाजीराव आढळराव पाटील यांचा कोणाला ग्रीन सिग्नल मिळणार यावर उमेदवारीचे गणित अवलंबून आहे.

आंबेगाव विधानसभेला शिरूर तालुक्‍यातील ३९ गावे जोडलेली आहेत. तेथील उमेदवार देण्याचा निर्णय झाल्यास जयश्री पलांडे यांच्या नावाचा विचार होऊ शकतो. अरुण गिरे यांनीही गेली पाच वर्ष मतदारसंघ पिंजून काढला आहे. या निवडणुकीत तेदेखील भक्कम दावेदार आहेत. लोकसभा निवडणुकीच्या निकालावरच आंबेगाव विधानसभेचा शिवसेनेचा उमेदवार ठरणार आहे. शिवसेनेच्या दृष्टीने लोकसभेला दगा फटका झाला तर शिवाजीराव आढळराव पाटील यांना विधानसभा निवडणुकीच्या मैदानात उतरविण्याच्या हलचाली मातोश्रीकडून होण्याची शक्‍यता आहे. तसे झाल्यास वळसे पाटील विरुद्ध आढळराव पाटील अशी थेट लढत होवू शकते अशी चर्चा मतदार संघात सुरु आहे.

Read more...

ग्रामीण भागातील विद्यार्थ्यांनाही मिळाल्या रोजगाराच्या संधी

सजग वेब टीम, जुन्नर (सुधाकर सैद)

बेल्हे | समर्थ रूरल एज्युकेशनल इन्स्टिट्यूट संचलित बेल्हे येथील समर्थ शैक्षणिक संकुलातील इंजिनिअरिंग व पॉलिटेक्निक मधील विद्यार्थ्यांची विविध कंपन्यांमध्ये निवड झाल्याची माहिती संस्थेचे विश्वस्त वल्लभ शेळके यांनी दिली.

औद्योगिक क्षेत्रात इंजिनिअरिंग व पॉलिटेक्निक च्या विद्यार्थ्यांना रोजगाराच्या हजारो संधी उपलब्ध असून विद्यार्थ्यांची संख्या आणि तंत्रज्ञान झपाट्याने वाढत आहे.तांत्रिक ज्ञान,संभाषण कौशल्य,सॉफ्ट स्किल, मुख्य विषयाबाबतचे सखोल ज्ञान,प्रात्यक्षिक ज्ञान व्यवहारिक दृष्टिकोन या सर्व बाबींचा विचार करूनच कंपनी विद्यार्थ्यांची निवड करत असल्याचे किला कंपनीचे अधिकारी म्हणाले.समर्थ अभियांत्रिकी महाविद्यालयाच्या सिव्हिल इंजिनिअरिंग मध्ये शिकत असलेल्या कौस्तुभ चव्हाण याची इंडियन ऑइल कार्पोरेशन मध्ये टेक्निशियन अँपरेंटीस म्हणून तर सुशांत हाडवळे याची जे.कुमार इन्फ्रास्ट्रक्चर प्रा.लि.मुंबई मध्ये ट्रेनी इंजिनियर म्हणून निवड झाल्याची तसेच २.२० लाखाचे वार्षिक पॅकेज सदर विद्यार्थ्यांना देण्यात येणार असल्याचे विभागप्रमुख प्रा.प्रवीण सातपुते यांनी दिली.

कॅम्पस ड्राइव्ह २०१९ अंतर्गत समर्थ पॉलिटेक्निकच्या सिव्हिल इंजिनिअरिंग मधील आकाश ढोबळे,पवन शिंदे,अक्षय दुश्मन, पल्लवी गुंजाळ,बाबू शिंदे व सौरभ कुटे यांची तर समर्थ इंजिनिअरिंग च्या सिव्हील विभागातून ओंकार शिंदे व अनंत करंडे यांची द किला कोटिंग कंपनी मुंबई मध्ये निवड करण्यात आली.टाटा मोटर्स पिंपरी चिंचवड मध्ये मेकॅनिकल इंजिनिअरिंग मधील धनेश भोर व तुषार पवार यांची निवड झाली असून २.५ लाख वार्षिक पॅकेज त्यांना देण्यात येणार असल्याचे प्राचार्य अनिल कपिले यांनी सांगितले.

निवड झाल्याबद्दल सदर विद्यार्थ्यांचे संस्थेचे अध्यक्ष वसंतराव शेळके,उपाध्यक्ष माऊली शेळके,सचिव विवेक शेळके,विश्वस्त वल्लभ शेळके सर यांनी विशेष अभिनंदन केले व पुढील वाटचालीसाठी हार्दिक शुभेच्छा दिल्या.

Read more...

मांजरवाडी जळीतकांड करणाऱ्या आरोपींना कठोर शिक्षा व्हावी


मुस्लिम समाजाची पोलीस अधीक्षकांकडे मागणी

सजग वेब टीम, जुन्नर
मांजरवाडी|येथील मुस्लिम अल्पसंख्यांक समाजातील सर्वसामान्य गरीब टपरीधारक रशीद तांबोळी (वय५५) यांच्यावर जून्या भांडणाचा राग मनात धरून मध्यरात्री सिगारेट विकत घेण्याच्या बहाण्याने बोलावून अंगावर पेट्रोल टाकून जीवे मारण्याच्या उद्देशाने केलेल्या भ्याड हल्ल्याबाबत जुन्नर तालुका मुस्लिम समाजाच्या वतीने पुणे ग्रामीणचे पोलीस अधीक्षक संदिप पाटील यांना पोलीस अधीक्षक कार्यालय पुणे येथे प्रत्यक्ष भेटून समाज शिष्टमंडळाद्वारे आरोपी ॠषीकेश पोपट लोखंडे व किरण कानिफनाथ जाधव यांना कठोर शिक्षा व्हावी या मागणीचे निवेदन देण्यात आल्याची माहीती अल्पसंख्यांक संनियंत्रण समितीचे सदस्य राजू ईनामदार व कादरीया वेलफेअर सोसायटी जुन्नरचे अध्यक्ष अब्दूल रऊफ खान यांनी दिली.

यावेळी शिष्टमंडळ प्रतिनिधी म्हणून सादिक आतार,अकबरखान पठाण,मेहबूब काझी, अकबर बेग,मुबारक तांबोळी,एजाज चौधरी,गफूर तांबोळी, उस्मान तांबोळी,रज्जाक तांबोळी,अहमद सय्यद,जाकीर तांबोळी,शोएब तांबोळी आदींसह मोठ्या संख्येने मुस्लीम समाजबांधव हजर होते.
तपासात कुठल्याही प्रकारची कमतरता न ठेवता आरोपींचे यापूर्वीच्या स्थानिक कायदेशीर नोंदी तपासून कठोर शिक्षेसाठी कारवाई केली जाईल असे आश्वासन पोलीस अधीक्षक संदिप पाटील यांनी शिष्ठमंडळाला दिले.
नारायणगाव पोलीसठाण्याचे सहाय्यक पोलीस निरीक्षक अर्जून घोडे पाटील यांनी कर्तव्यदक्षपणे तपासकरून तत्परतेने आरोपींना अटक केल्याबद्दल तसेच मांजरवाडी येथील ग्रामस्थांनी सदभावनेने पीडीत रशीद तांबोळी यांना वैद्यकीय उपचारासाठी मदत केल्याबद्दल पोलीस प्रशासन आणि मांजरवाडी ग्रामस्थांचे व्यावेळी शिष्टमंडळाने पोलीस अधीक्षकांसमोर आभार व्यक्त केले.


पवित्र रमजान महिण्याचे उपवास सुरू असताना रशीद तांबोळी यांच्यावर झालेल्या या भ्याड हल्ल्याबद्दल सर्वत्र खेद व्यक्त होत आहे.तांबोळी यांना पुणे येथील सुर्या हाॅस्पिटल येथे दाखल केले आहे.मोठ्याप्रमाणात भाजल्यामुळे त्यांची तब्येत गंभीरच आहे. आर्थिक परीस्थिती अतिशय बिकट असल्याने सर्व समाजातील दानशूर व्यक्ती व संस्थांनी श्री.तांबोळी यांना आर्थिक मदत करावी असे आवाहन यावेळी जुन्नर तालुका मुस्लीम समाजाच्या वतीने करण्यात आले.

Read more...